އުތުރުތިލަފަޅު އެއްބަސްވުން ހަދައިފައި ވަނީ ގާނޫނާ ހިލާފަށްކަން ހާމަވެއްޖެ: ސައީދު
އިންޑިއާ ސަރުކާރާ އެކު ދިވެހި ދައުލަތުން ހެދި އުތުރުތިލަފަޅު ތަރައްގީކުރުމުގެ އެއްބަސްވުން ހަދައިފައި ވަނީ ގާނޫނާއި ހިލާފަށް ކަމަށާއި އެ އެއްބަސްވުން މިހާރު ބާތިލު އެއްޗަކަށް ވެފައިވާކަމަށް ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.
އުތުރުތިލަފަޅުގައި އަސްކަރީ ޑޮކްޔާޑަކާއި ބަނދަރެއް ތަރައްގީކުރުމަށް އިންޑިއާ ސަރުކާރާއި ހަވާލުކޮށްފައިވާއިރު އެތަނުގައި އިންޑިއާ ސިފައިން ބޭތިއްބުމުގެ ހުއްދަ ދިވެހި ސަރުކާރުން ދީފައިވާކަމުގެ އަޑުތަކެއް ވަނީ ފެތުރިފައެވެ. މިހާތަނަށް އައިއިރު އެ އެއްބަސްވުމުގެ އެއްވެސް ތަފްސީލެއް ސަރުކާރުން ހާމަކޮށްފައި ނުވާތީ އެކަމުގެ ކަންބޮޑުވުން އިދިކޮޅުން ދަނީ ފާޅުކުރަމުންނެވެ.
މިކަމާ ގުޅިގެން ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އަދި ކުރީގެ ޑިފެންސް މިނިސްޓަރު އާދަމް ޝަރީފު އުމަރު މިއަދު ވަނީ އުތުރުތިލަފަޅު އެއްބަސްވުން މަޖިލީހުގެ 241 ކޮމިޓީއާ ހިއްސާކުރަން އެދިފައެވެ. މިކަމާ ގުޅިގެން މަޖިލީހުގެ ރައީސް މުހައްމަދު ނަޝީދު ވަނީ އެ އެއްބަސްވުން ހިއްސާކުރުމުގެ މައްސަލަ މިއަދު ކޮމިޓީއަށް ފޮނުވާނެކަމަށެވެ.
މީގެ ކުރިން އިކޮނޮމިކް މިނިސްޓަރުކަން ވެސް ކުރައްވާފައިވާ މުހައްމަދު ސައީދު މިކަމާ ގުޅިގެން ވިދާޅުވީ މަޖިލީހާއި ތަފްސީލު ހިއްސާނުކޮށް ހަދާފައިވާތީ އުތުރުތިލަފަޅު އެއްބަސްވުން ގާނޫނާ ހިލާފުކަމަށެވެ. އަދި މިހާރު އެ އެއްބަސްވުން ބާތިލުވެފައިވާކަމަށް ވެސް ސައީދު ވިދާޅުވިއެވެ. ސައީދު ވިދާޅުވީ މިއީ ވަރަށް ނުރައްކާތެރި މައްސަލައެއް ކަމަށެވެ.
އުތުރުތިލަފަޅު ތަރައްގީކުރަން އިންޑިއާއިން ގެންނަ ސިފައިން އެމަސައްކަތް ނިމުމުން ވެސް ދިގު މުއްދަތަކަށް ރާއްޖޭގައި ތިބުމުގެ ހުއްދަ ސަރުކާރުން ދީފައިވާކަން މީގެ ކުރިން ލީކުވި ލިޔުމަކުން ވަނީ ހާމަވެފައެވެ. އުތުރުތިލަފަޅު އެއްބަސްވުންކަމަށް ބެލެވޭ އެ ލިޔުމުގައި ބުނާގޮތުން އިންޑިއާ ސިފައިންނަށް ރާއްޖޭގައި 15 އަހަރުގެ މުއްދަތަކަށް ތިބެވޭނެއެވެ. އަދި އެގައުމުން ބޭނުންވެއްޖެ ނަމަ މިމުއްދަތު އިތުރު 15 އަހަރަށް އިތުރު ކުރެވޭނެއެވެ.
ދެން މިގައުމުގެ ސިފައިންނަށް ވެސް އެއްވެސް ގޮތަކުން މި ގައުމު ހިމާޔަތް ކުރުމުގެ އާރެއް ބާރެއް ނޯންނާނެ.