މުހުލަތު ހަމަވިއިރު ވެސް އުތުރުތިލަފަޅު އެއްބަސްވުން ހާމައެއް ނުކުރި!
އިންޑިއާ ސަރުކާރާ އެކު ހަދައިފައިވާ އުތުރުތިލަފަޅު ތަރައްގީކުރުމުގެ އެއްބަސްވުން ހާމަކުރަން އިންފޮމޭޝަން ކޮމިޝަނަރުގެ އޮފީހުން ޑިފެންސް މިނިސްޓްރީއަށް ދިން މުހުލަތު ހަމަވިއިރު ވެސް އެ އެއްބަސްވުން ހާމައެއް ނުކުރިއެވެ.
އެއްބަސްވުމުގައިވާ ބައެއް ކަންކަން ސާފުކުރަން "ދިޔަރެސް"އިން އެންމެ ފުރަތަމަ އެދުނީ ޑިފެންސް މިނިސްޓްރީގައެވެ. އެހެން ނަމަވެސް އެ މުއައްސަސާއިން ތަކުރާރުކޮށް އެމައުލޫމާތު ހާމަކުރަން ދެކޮޅު ހެދުމުން އެ ނޫހުން ދެން މައްސަލަ ހުށަހެޅީ އިންފޮމޭޝަން ކޮމިޝަނަށެވެ.
މިމައްސަލައިގެ އަޑުއެހުންތައް ނިންމައިލައި މިމަހުގެ 14ވަނަ ދުވަހު އިންފޮމޭޝަން ކޮމިޝަނަރުގެ އޮފީހުން ވަނީ އުތުރުތިލަފަޅު އެއްބަސްވުމުގައިވާ މައުލޫމާތުތަކަކީ ގައުމީ ސަލާމަތަށް ނުރައްކާވެދާނެ ފަދަ މައުލޫމާތުތަކަކަށް ވަނީ ކީއްވެކަން ޑިފެންސް މިނިސްޓްރީއަށް ބުނެދެވިފައި ނުވާ ކަމަށެވެ. އެހެންކަމުން އެގޮތަށް ގަބޫލު ނުކުރެވޭ ކަމަށާއި އެއްބަސްވުމުން "ދިޔަރެސް" ނޫހުން ހާމަކުރަން ބޭނުންވާ ކަންކަން 7 ދުވަހުގެ ތެރޭގައި ހާމަކުރަން ޑިފެންސް މިނިސްޓްރީއަށް، ކޮމިޝަނަރުގެ އޮފީހުން އެންގިއެވެ.
ކޮމިޝަނަރުގެ އޮފީހުން ދިން މުއްދަތު ހަމަވެފައި ވަނީ މިމަހުގެ 21 ވަނަ ދުވަހަށެވެ. އެހެން ނަމަވެސް އެމައުލޫމާތު މިނިސްޓްރީން ހާމަކޮށްފައެއް ނުވެއެވެ.
އުތުރުތިލަފަޅު އެއްބަސްވުންކަމަށް ބެލެވޭ ލިޔުމެއް މީގެ ކުރިން ވަނީ ސޯޝަލް މީޑިއާގައި ލީކުވެފައެވެ. އެލިޔުމުގައި ބުނާ ގޮތުން އެއްބަސްވުމުގެ ދަށުން އިންޑިއާ ސިފައިންނަށް ރާއްޖޭގައި 15 އަހަރުގެ މުއްދަތަކަށް ތިބެވޭނެއެވެ. އަދި އިންޑިއާއިން ބޭނުންވެއްޖެ ނަމަ އެމުއްދަތު އިތުރު 15 އަހަރަށް އިތުރު ކުރެވޭނެއެވެ.
މިކަމާ ގުޅިގެން އެމްއެންޑީއެފްއިން މިހާތަނަށް ހާމަކޮށްފައި ވަނީ ވަރަށް މަދު މައުލޫމާތެކެވެ. އެގޮތުން އުތުރުތިލަފަޅުގައި ތިބެނީ ޓެކްނިކަލް ބައެއް ކަމަށާއި، އެ މަސައްކަތުގެ މުއްދަތަކީ ތިން އަހަރު ކަމާއި، އެއަށް ފަހު އިތުރު 15 އަހަރަށް އެއްބަސްވުން ދެމިގެންދާނެކަން އެމްއެންޑީއެފްއިން ވަނީ ހާމަކޮށްފައެވެ.
އުތުރުތިލަފަޅު އެއްބަސްވުމާއި، އިންޑިއާ ސަރުކާރާ އެކު ހަދާފައިވާ އެހެނިހެން ދިފާއީ އެއްބަސްވުންތަކުގެ ތަފްސީލު ހޯދަން ރައްޔިތުންގެ މަޖިލީހުގެ 241 ކޮމިޓީން ވެސް ވަނީ މަސައްކަތް ފަށައިފައެވެ. މިކަމާ ގުޅިގެން ރައީސް އޮފީހުން މީގެ ކުރިން ބުނެފައި ވަނީ އެކަމުގައި މަޖިލީހަށް ފުރިހަމަ އެއްބާރުލުން ދޭނެކަމަށެވެ.
