ޒުވާނުން ތިބީ ބޮޑު ޚަރަދުކޮށްގެން ޒުވާނުންގެ ދުވަސް ފާހަގަކުރާ ވަރަށް ވުރެ ހާލުގައި: އަލީ ވަހީދު

ޒުވާނުން ތިބީ ބޮޑު ޚަރަދުކޮށްގެން ޒުވާނުންގެ ދުވަސް ފާހަގަކުރާ ވަރަށް ވުރެ ހާލުގައި ކަމަށް ކުރީގެ ޓުވަރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.
އަލީ ވަހީދު މިފަދައިން ވިދާޅުވީ ޒުވާނުންގެ ދުވަސް ފާހަގަކުރުމަށް ބޭއްވި ހަރަކާތްތަކުގައި ބައިވެރިވެ ވަޑައިގެންނެވުމަށް ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް ކުޅުދުއްފުށި ސިޓީއަށް ވަޑައިގެންފައިވާ ދަނޑިވަޅެއްގައެެވެ.
އަލީ ވަހީދު ވިދާޅުވީ ޒުވާނުންގެ ދުވަސް ބޮޑު ޚަރަދުކޮށް ފާހަގަކުރާ ވަރެއް އަދި ނުވާކަމަށާއި މަސްތުވާތަކެތީގެ ވަބާގައި އެތައް ޒުވާނުންނެއް ތިބީ މަގުމަތިވެ ވާނުވާގައި ކަމަށެވެ. އަދި ހުކުމެއް ނެތި ބޭސްފަރުވާ ނުލިބި އެތައް ޒުވާނުންނެއް ނުހައްޤުން ޖަލުގައި ވާނުވާގައި އެބަތިބި ކަމަށާއި ކިޔެވި ސަނަދަކަށް ދެކޮޅުޖެހޭ މުސާރައެއް ނުލިބި ޒުވާނުން ތިބި ކަމަށް ވެސް އަލީ ވަހީދު ވިދާޅުވިއެެވެ.
ރައީސް ކުޅުދުއްފުޓަށް ކުރެއްވެވި ދަތުރުފުޅުގައި ކުޅުދުއްފުށި ސިޓީގައި ތަރައްޤީކޮށްފައިވާ ފުޓްބޯޅަދަނޑު ރަސްމީގޮތުން ހުޅުއްވައިދެއްވައި އެ ދަނޑުގައި ޤައުމީ ޓީމާ ކުޅުދުއްފުށީގެ ޒުވާނުންގެ ޓީމެއް ބައްދަލުކުރި އެކުވެރިކަމުގެ ފުޓްބޯޅަ މެޗް ވަނީ ބައްލަވައިލައްވައިފައެވެ.
މީގެ އިތުރުން ޔޫތު އެވޯޑް ޙާޞިލުކުރި ޒުވާނުންނަށް އެވޯޑް ހަވާލުކުރުމުގެ އިތުރުން ޒުވާނުންގެ ދުވަސް ފާހަގަކުރުމަށް ކުޅުދުއްފުށި ސިޓީގައި ބޭއްވި ޒުވާނުންގެ މިއުޒިކް ޝޯއެއް ވެސް އެމަނިކުފާނު ވަނީ ބައްލަވައިލައްވައިފައެވެ.



ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.