ސޮވެރިން ގެރެންޓީ ފަސޭހައިން ލިބޭނެ ގޮތް ހެދުމަށް ހުށަހެޅި މައްސަލަ ބޭރުކޮށްލައިފި
ބޮޑެތި ކުންފުނިތަކަށް ފަސޭހައިން ސޮވެރިން ގެރެންޓީ ލިބޭނެގޮތް ހެދުމަށް ގޮވައިލާ ހުށަހެޅި މައްސަލަ ބޭރުކޮށްލައިފިއެވެ.
ދިވެހި ރާއްޖޭގެ އިގްތިސާދަށް މުހިންމު، ބޮޑެތި ކުންފުނިތަކަށް، ފަސޭހަކަމާ އެކު ސަރުކާރުގެ ސޮވެރިން ގެރެންޓީ ހަމަޖެހޭނެ އުސޫލު ޤާއިމް ކުރުމަށް ހުށަޅައިފައި ވަނީ ކާށިދޫ ދާއިރާގެ މެމްބަރު އަބްދުﷲ ޖާބިރުއެވެ.
ޖާބިރު ހުށަހެޅި މައްސަލާގައި ބުނެފައި ވަނީ ދިވެހި ރާއްޖޭގެ އިގްތިސާދަށް ތިޔާގިކަން ގެންނަ ބޮޑެތި ވިޔަފާރިތަކުން ބޭނުން ކުރަމުންދާ ގިނަ ބިންތަކުގެ މިލްކުވެރިކަން ދިވެހި ސަރުކާރުގެ އަތުގައި އޮވެ، ކޮވިޑް-19ގެ ސަބަބުން، ދިވެހި ރާއްޖޭގައި ހިނގަމުން ދިޔަ ވިޔަފާރީގެ ބޮޑެތި ޕްރޮޖެކްޓްތައް ހުއްޓި،
ދިވެހިރާއްޖޭގައި އިންވެސްޓްކޮށްގެން ތިބި ވިޔަފާރިވެރިންނާއި، ދިވެހި އެތަކެއް ރައްޔިތުންގެ ބަނޑުފުރާނަ މުއްތިކުރުމާއި ގުޅިފައިވާ ކުންފުނިތަކަށް، ފޫނުބެއްދޭވަރުގެ ގެއްލުންވަމުންދާކަމަށެވެ. އަދި އިތުރަށް އިގްތިސާދަށް ގެއްލުންދެނިވި އުސޫލުން ސަރުކާރުގެ އަމަލުތައް ހުރި ހިނދު، ދިވެހި ސަރުކާރާއެކު ވެފައިވާ އެއްބަސްވުމަކަށް އެކަނި ބަލައިގެން، ބޭންކުތަކުން ޕްރައިވެޓް ކުންފުނިތަކަށް ލޯނު ދޭން ޖެހިލުންވެ، ފައިނޭންސް ހޯދުން އުނދަގޫވެ، ދިވެހި ރާއްޖެއިން ބޭރުން ފައިނޭންސް ހޯދުން ނޫން ގޮތެއް، ދިވެހި ކުންފުނިތަކަށް ނެތިފައި ވާ ކަމަށް ވިދާޅުވިއެވެ.
މީގެ އިތުރުން، އިގްތިސާދީގޮތުން މި އުނދަގޫ ދަނޑިވަޅުން އަރައިގަތުމަށް ޓަކައި، މީގެ ކުރިން ވެސް ދިވެހި ސަރުކާރުން ކަންކުރައްވާފައިވާ ފަދައިން، ރަހުނުގެ ގޮތުގައި އަގުބޮޑެތި މުދާ ބެހެއްޓުމުގެ ގާބިލިއްޔަތު ހުރި، އަދި އެހެން ވެސް ޝަރުތުތައް ފުރިހަމަވާ ޕްރައިވެޓް ކުންފުނިތަކަށް، ފަސޭހަކަމާ އެކު ދިވެހި ސަރުކާރުގެ ސޮވެރިން ގެރެންޓީ ހަމަޖެހޭނެ އުސޫލު ޤާއިމް ކުރަން ޖެހޭ ކަމަށް އެ މައްސަލައިގައި ބުނެފައިވެއެވެ.
ޖާބިރުގެ މި މައްސަލަ މަޖިލީހުން ބޭރުކޮށްލައިފައި ވަނީ 15 ވޯޓުންނެވެ.
Ads by STO
