ރައީސް ނަޝީދާއި ޤާސިމް ބައްދަލު ކުރައްވައި ސަން އައިލެންޑް ރިސޯޓަށް ވަޑައިގަންނަވައިފި
ރައްޔިތުންގެ މަޖިލީހުގެ ރައީސް މުޙައްމަދު ނަޝީދުއާއި މާމިގިލީ ދާއިރާގެ މެންބަރު ޤާސިމް އިބްރާހިމް ކުއްލި ގޮތަކަށް މިއަދު މެންދުރު ފަހު އދ. މާމިގިލިން ބައްދަލު ކުރައްވައިފިއެވެ.
އެނގިފައިވާ ގޮތުގައި ރައީސް ނަޝީދު މާމިގިއްޔަށް ވަޑައިގަތުމުން އެމަނިކުފާނަށް ވަނީ ރަތް ދޫލައިން މަރުޙަބާ ދަންނަވައިފައެވެ. އެމަނިކުފާނާ އެކު މި ދަތުރުފުޅުގައި ބައިވެރިވެވަޑައިގަތީ އެމްޑީޕީގެ ނައިބް ރައީސް މުހައްމަދު ޝިފާޒުއާއި، އެމްޑީޕީގެ ޗެއާޕާސަން ހަސަން ލަތީފްގެ އިތުރުން އެމްޑީޕީގެ ޕީޖީ ގުރޫޕް ލީޑަރު އަލީ އާޒިމެވެ.
ޤާސިމްއާއި ރައީސް ނަޝީދުގެ މި ބައްދަލުކުރެއްވުމާ ގުޅިގެން ޖުމްހޫރީ ޕާޓީން ވެސް އަދި އެމްޑީޕީން ވެސް އެއްވެސް މައުލޫމާތެއް އަދި ދެއްވައިފައެއް ނުވެއެވެ. ނަމަވެސް މާމިގިއްޔަށް ރައީސް ނަޝީދު ވަޑައިގަތްތާ ކުޑަ އިރުކޮޅެއް ފަހުން، ޤާސިމްގެ ސަން އައިލެންޑް ރިސޯޓަށް އެ ދެބޭފުޅުން ވަޑައިގެންފައިވާ ކަމަށް މައުލޫމާތު ލިބެއެވެ.
މެއި މަހުގެ 6 ވަނަ ދުވަހު ރައީސް ނަޝީދަށް ދިން ނިރުބަވެރި ހަމަލާއާ ގުޅިގެން ބޭސްފަރުވާއަށް ރާއްޖެއިން ބޭރަށް ވަޑައިގަތުމަށް ފަހު އެމަނިކުފާނު އެނބުރި ރާއްޖެ ވަޑައިގަތީ މިމަހުގެ 11 ވަނަ ދުވަހުގައެވެ. ނަމަވެސް ބޭސްފަރުވާގެ ކަންތައް އަދި އެއްކޮށް ނުނިމޭ ކަމަށާއި އެހެންކަމުން ދުވަސްކޮޅެއް ފަހުން އިނގިރޭސިވިލާތަށް އެނބުރި ވަޑައިގަންނަވާނެ ކަމަށް އެމަނިކުފާނު ވިދާޅުވިއެވެ.
