މޫސުމީ އަސަރުތަކުން އަރައިގަތުމަށް އަންހެނުން ބައިވެރިކުރަން ޖެހޭ: ޢަބްދުﷲ ޝާހިދު
މޫސުމީ ބަދަލުތަކުގެ ސަބަބުން އަންނަ ނޭދެވޭ އަސަރުތަކުން އަރައިގަތުމަށް އަންހެނުން ބައިވެރިކުރަން ޖެހޭ ކަމަށް އ.ދގެ އާންމު މަޖިލީހުގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.
ރާއްޖޭގެ ފޮރިން މިނިސްޓަރުކަން ވެސް ކުރައްވާ ޝާހިދު މިހެން ވިދާޅުވީ އދގެ އާއްމު މަޖިލީހުގެ "ހައި-ލެވެލް ތީމެޓިކް ޑިބޭޓް އޮން ޑެލިވަރިން ކްލައިމެޓް އެކްޝަން: ފޮރ ޕީޕަލް، ޕްލެނެޓް އެންޑް ޕްރޮސްޕެރިޓީ"ގައި ވާހަކަފުޅު ދައްކަވަމުންނެވެ.
"މޫސުމާއި ބަޔޯޑައިވަރސިޓީ ދިރާސާކުރާ ފަރާތްތަކުގެ ތެރޭގައި އަންހެނުން ހިމެނެނީ %30އަށް ވުރެ މަދު އަދަދަކަށް. އަދި ތިމާވެށީގެ ޤައުމީ ވަފުދުތަކުގެ ތެރެއިން އަންހެނުން ހިމެނެނީ 38އިންސައްތައިގައި. އަދި މިނިސްޓީރިއަލް ލެވެލްގައި ތިމާވެށީގެ އެންމެ އިސްވެރިން ގޮތުގައި ތިބީ 12 އިންސައްތަ އަންހެނުން. މިއަށް ވުރެ ރަނގަޅަށް އަޅުގަނޑުމެން މަސައްކަތް ކުރަން ޖެހޭ." ޢަބްދުﷲ ޝާހިދު ވިދާޅުވެފައިވެއެވެ.
މީގެ އިތުރުން ޝާހިދު ވިދާޅުވީ 76 އަހަރު ވަންދެން އ.ދ.އޮތީ ބައިނަލްއަޤްވާމީ އެއްބާރުލުމުގެ މޫނުމައްޗެއްގެ ގޮތުގައި ކަމަށާއި މިހާރު ކުރިމަތިވެފައިވާ ކޮވިޑް-19އާއި މޫސުމަށް އަންނަ ބަދަލުތަކާއި ބަޔޯޑައިވަރސިޓީ ގެއްލުންފަދަ ގޮންޖެހުންތަކަކީ، އިމެއް ނެތް، އަދި މުޅި ދުނިޔެއަށް ވެސް ކުރިމަތިވެފައިވާ ގޮންޖެހުންތަކެއް ކަމަށެވެ. އަދި މި ގޮންޖެހުންތަކަކީ ދުނިޔޭގެ އުތުރަކަށް ދެކުނަކަށް އަދި ވަކި ކުލައަކަށް ބެލުމެއް ނެތް ދިމާވާ ގޮންޖެހުންތަކެއް ކަމަށް ވެސް ވިދާޅުވިއެވެ.
Ads by STO
