ޚަބަރު

ކާމިޔާބީތަކަށް ހިޔަނި އެޅިފައިވަނީ ރައީސް ޔާމީންއަށް ނުހައްގު އަނިޔާ ދެމުން ގެންދާތީ: ޕީޕީއެމް

ރައުފާ ރަޝީދު ، ދެން އޮންލައިން

ޕާޓީގެ ކާމިޔާބީތަކަށް ހިޔަނި އެޅިގެން ގޮސްފައި ވަނީ ރައީސް ޢަބްދުﷲ ޔާމީން ޢަބްދުލްޤައްޔޫމްއަށް ނުހައްގު އަނިޔާ ދެމުން ގެންދާތީ ކަމަށް ޕީޕީއެމްއިން ބުނެފިއެެވެ.

Ads by Sosun Fihaara

ޕީޕީއެމްގެ 10 ވަނަ އަހަރީ ދުވަހުގެ މުނާސަބަތުގައި އެ ޕާޓީން ނެރުނު ބަޔާނުގައި ބުނެފައި ވަނީ ޕާޓީއަށް އެކި ގޮތް ގޮތުން އެހީތެރިވެދެއްވާ ޚިދުމަތް ކުރައްވަމުން ގެންދަވާ އެންމެހާ މެންބަރުންނަށް ޝުކުރު އަދާކުރައްވާ ކަމަށާއި ޕީ.ޕީ.އެމްގެ 10 އަހަރުގެ ތާރީހަށް ބަލައިލާއިރު، ޕީ.ޕީ.އެމް ހިމެނިގެންދަނީ ކުރު މުއްދަތެއްގެ ތެރޭގައި ދިވެހިރާއްޖެގެ އެންމެ ކާމިޔާބު ސިޔާސީ ޕާޓީގެ ގޮތުގައި ކަމަށެވެ.

އެގޮތުން ޕާޓީ އުފެދުނު ފަހުން ކުރިމަތިލީ އެންމެ ބޮޑު އިންތިޚާބަކީ 2013ވަނަ އަހަރުގެ ރިޔާސީ އިންތިޚާބު ކަމަށާއި އެ އިންތިޚާބުގައި ޕާޓީގެ އެ ފަހަރުގެ ކެނޑިޑޭޓް ރައީސް ޢަބްދުﷲ ޔާމީން ޢަބްދުލްޤައްޔޫމް ވާދަކުރައްވާ ކާމިޔާބު ކުރައްވައިފައިވާ ކަމަށާއި 2013ވަނަ އަހަރުގެ ނޮވެމްބަރު 17އިން ފެށިގެން މިޤައުމާއި ރައްޔިތުންނަށް އެތައް ކާމިޔާބަކާއި ކުރިއެރުން ގެނެސްދެއްވި 5 އަހަރުގެ ވެރިކަމެއް ފުރިހަމަ ކުރައްވައިފައިވާ ކަމަށެވެ. އަދި ތަރައްޤީގެ ބިޔަ ބޮޑެތި މަޝްރޫޢުތަކެއް ގެނެސްދެއްވައިފައިވާ ކަމަށާއި ދިވެހި ރައްޔިތުންނަށް ވަޒީފާގެ ފުރުޞަތުތައް ތަނަވަސްކޮށްދެއްވައި، ދިވެހީންނަކީ ފުދުންތެރި ބަޔަކަށް ހެއްދެވުމަށް ކުރެއްވި މަސައްކަތްޕުޅުން ވެސް އެތައް ކާމިޔާބީއެއް ޙާސިލު ކުރައްވައިފައިވާ ކަމަށެވެ.

"އަދި ޢުމްރާނީ ގޮތުންނާއި، ތަޢުލީމީ ދާއިރާއިންނާއި، ސިއްޙީ ދާއިރާންނާއި، ކުޅިވަރުގެ ދާއިރާއިން އަދިވެސް އެ ނޫން ދާއިރާތަކުން ވެސް މި ޤައުމާ ރައްޔިތުންނަށް ކުރިއެރުމާއި ތަރައްޤީ ގެނެސްދެއްވައިފައިވާ ކަމަށާއި 2013ގެ ރިޔާސީ އިންތިޚާބަށް ފަހު، 2014ވަނަ އަހަރު އޮތް ރައްޔިތުންގެ މަޖިލީހުގެ އިންތިޚާބުގެ މެޖޯރިޓީ ވެސް ވަނީ ޕީ.ޕީ.އެމް ހޯދާ އެ އިންތިޚާބު ވެސް ކާމިޔާބުކޮށްފައެވެ.

ޕާޓީގެ ކާމިޔާބުގެ ޞަފްޙާތައް ލިޔަމުން ގެންދަނިކޮށް މި ކާމިޔާބީތަކަށް ހިޔަނި އެޅިގެން ގޮސްފައި ވަނީ،
ޕާޓީއަށް ފާއިތުވެ ދިޔަ ތަނުގައި ކާމިޔާބީ ހޯއްދަވައިދެއްވުމުގެ އެންމެ މުހިންމު އަދި އެންމެ އިސް ދައުރެއް އަދާ ކުރެއްވި އަދިވެސް ކުރައްވަމުން ގެންދަވާ މޭސްތިރިޔާ، ރައީސް ޢަބްދުﷲ ޔާމީން ޢަބްދުލްޤައްޔޫމް ޙައްޤު ނޫން ގޮތެއްގައި ސިޔާސީ ނުފޫޒާއި ބާރުން ޖަލުގައި ބަހައްޓައިގެން އަނިޔާދެމުން ގެންދާ ގެންދިއުން. އެ ޙާލަތުގައި އަނިޔާ ލިބެމުން ދިޔަ ނަމަވެސް އެ މަނިކުފާނަށް ނުޙައްޤުން ދެމުން ގެންދާ އަނިޔާއާ ދެކޮޅު ހަދާ އެމަނިކުފާނު ޖަލުން މިނިވަން ކުރުމަށް ޓަކައި ޕާޓީއާ އެކު ގިނަ ޢަދަދެއްގެ ދިވެހި ރައްޔިތުން ގެންދަނީ މުޙިންމު މަސައްކަތްތަކެއް ކުރަމުން” އެ ބަޔާނުގައި ބުނެފައިވެއެވެ.

ރައީސް ޔާމިން މިނިވަންކުރުމަށް ކުރެވޭ މަސައްކަތްތަކުގެ ނަތީޖާއެއްގެ ގޮތުން އެންމެ ފަހުން ބޭއްވުނު ލޯކަލް ކައުންސިލްތަކުގެ އިންތިޚާބު ބޮޑުތަނުން ކާމިޔާބުކޮށްފައިވާ ކަމަށާއި މިވަގުތު ދިވެހިރާއްޖެއަށް އެކި ގޮތްގޮތުން ކުރިމަތިވަމުން ދާ ގެއްލުންތަކާއި ކުރިމަތިވަމުންދާ ގޮންޖެހުންތަކުން އަރައިގަނެވޭނެ ހަމައެކަނި ލީޑަރަކީ ރައީސް ޢަބްދުﷲ ޔާމީން ޢަބްދުލްޤައްޔޫމްކަން ދިވެހި ރައްޔިތުންގެ ތެރެއިން ގިނަ ބަޔަކު ޤަބޫލުކުރާ ކަމަށް ޕީޕީއެމުން ބުނެއެވެ.

އަދި، ޕާޓީގެ ފަރާތުން އިންތިޒާމު ކުރާ ކަންކަމުގައި ބައިވެރިވާ ދިވެހި ރައްޔިތުންގެ ޢަދަދު ވެސް އެއް ދުވަހުން އަނެއް ދުވަހަށް އިތުރުވަމުން އަންނަކަން ފާހަގަ ކުރެވޭ ކަމަށާއި ޕާޓީއާ ގުޅެމުން ގެންދާ ދިވެހި ރައްޔިތުންގެ ޢަދަދު ވެސް އަންނަނީ އިތުރުވަމުންދާ ކަމަށް އެ ޕާޓިން ބުނެއެވެ.

މީގެ އިތުރުން، ރައީސް ޢަބްދުﷲ ޔާމީން މިނިވަންކޮށް 2023ވަނަ އަހަރުގެ ރިޔާސީ އިންތިޚާބު އެމަނިކުފާނަށް ކާމިޔާބުކޮށްދިނުމަށް މަސައްކަތް ކުރަމުން ގެންދާ ދިވެހި ރައްޔިތުންގެ ޢަދަދު ވެސް ހާހުން އިތުރުވަމުންދާ ކަމީ މިއަދު ޕާޓީއަށް ލިބެމުންދާ އެންމެ ބޮޑު ހިތްހަމަޖެހުމާއި ކާމިޔާބީ ކަމަށް ވެސް ޕީޕީއެމުން ނެރުނު ބަޔާނުގައި ބުނެފައިވެއެވެ.

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!