ފަރިވާ ފިހާރަ އެނދީ ސްޓެލްކޯގެ އިހުމާލަކުން ނޫން: ސްޕްރީމް ކޯޓް

މިހާދިސާގެ ސަބަބުން ލިބުނު ގެއްލުމުގެ ބަދަލެއް ގޮތުގައި 33 މިލިއަން ރުފިޔާ ހޯދުމަށް ފިހާރައިގެ ވެރިމީހާ އެންމެ ފުރަތަމަ މައްސަލަ ހުށަހަޅައިފައި ވަނީ ސިވިލް ކޯޓުގައެވެ. އެހެން ނަމަވެސް ފިހާރައިގައި އަލިފާން ރޯވީ ސްޓެލްކޯއިން ބަހައްޓައިފައި ހުރި ކަރަންޓު ޑިސްޓްރިބިއުޝަން ފޮށީގެ ސަބަބުންކަން، މައްސަލައިގައި ހުށަހެޅި ލިޔުންތަކުން ޝަރީއަތަށް ސާބިތުނުވާތީ މިހާދިސާގެ ސަބަބުން ފިހާރައަށް ލިބުނު ގެއްލުމަށް ސްޓެލްކޯ ޒިންމާކުރެވެން ނެތްކަމަށް ސިވިލް ކޯޓުން ވެސް ވަނީ ނިންމައިފައެވެ.

އެހެންކަމުން ފިހާރައިގެ ވެރިމީހާ ދެން މިމައްސަލަ ވަނީ ހައިކޯޓަށް ހުށައަޅައިފައެވެ. އެހެން ނަމަވެސް ސިވިލް ކޯޓުގެ ނިންމުމަށް ހައިކޯޓުން ވެސް ތާއިދު ކުރުމުން އޭނާ ދެން މި މައްސަލަ ހުށަހެޅީ ސްޕްރީމް ކޯޓަށެވެ.

މިމައްސަލައިގައި ސްޕްރީމް ކޯޓުން ކުރި ހުކުމުގައި ވިދާޅުވީ އަލިފާންގަނޑު ފެށިގެން ދިޔައީ ސްޓެލްކޯގެ ޑިސްޓްރިބިއުޝަން ފޮށްޓަކުން ކަމަށް ބުނި ނަމަވެސް، އެ ޑިސްޓްރިބިއުޝަން ފޮށިން ، ހެކީގެ ގޮތުގައި ގެންދިޔަ ކަރަންޓް ކޭބަލްގެ ފޮރެންސިކް ފިޒިކަލް އެގްޒެމިނޭޝަނުން، އެ ފޮށީގައި ހުރި ކަރަންޓް ކޭބަލްތަކުގައި ރޯވެފައި ނުވާކަން ފާހަގަކޮށްފައިވާ ކަމަށެވެ. އަދި މިމައްސަލަައި ފިހާރަައިގެ ވެރި މީހާ ހުށައެޅި ކަންކަމަކީ އަލިފާން ފެށިގެން އައި ގޮތް ސާބިތުކޮށްދޭ ހެކިބަހަކަށް ނުވާއިރު، ފޮރެންސިކް ފިޒިކަލް އެގްޒެމިނޭޝަންގެ ނަތީޖާ ނަފީކުރެވޭ ފަދަ ހެއްކެއް ނޫން ކަމަށް ސްޕްރީމް ކޯޓުން ވިދާޅުވެފައި ވެއެވެ.