އަންނަ އަހަރުގެ ބަޖެޓު: ވެރިންގެ ސެކިއުރިޓީ ވަރުގަދަ ކުރުމަށް 50 މިލިއަން ރުފިޔާ

އަންނަ އަހަރަށް ކަނޑައެޅިފައިވާ ބަޖެޓުގައި، ވެރިންގެ ސެކިއުރިޓީ ވަރުގަދަ ކުރުމަށް 50 މިލިއަން ރުފިޔާ ހިމަނައިފިއެވެ.

Ads by Sosun Fihaara

މި އަދަދު ބަޖެޓުގައި ހިމަނައިފައި ވަނީ މި އަހަރުގެ މެއި މަހުގެ 6ވަނަ ދުވަހުގެ ރޭ، ރައްޔިތުންގެ މަޖިލީހުގެ ރައީސް މުޙައްމަދު ނަޝީދުއަށް ދިން ނިރުބަވެރި ހަމަލާގައި، އެމަނިކުފާނުގެ ސެކިއުރިޓީ ބްރީޗްވި ގޮތް ބަލަން ހިންގި އިންކްއަަރީއަށް ފަހު، އަޅަން ހުށަހެޅި ފިޔަވަޅުތައް ތަންފީޒުކުރުމުގެ ގޮތުންނެވެ.

އެގޮތުން ރައީސް ނަޝީދުގެ ސެކިއުރިޓީ ބްރީޗްވިގޮތް ބަލަން ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ)އިން ހުށަހެޅި ކަންތައްތައް ތަންފީޒުކުރަން، އަންނަ އަހަރުގެ ބަޖެޓްގައި ހިމަނައިފައިވާ 50 މިލިޔަން ރުފިޔާ ދޭން ކަނޑައަޅައިފައި ވަނީ އެމްއެންޑީއެފަށެވެ.

އަންނަ އަހަރުގެ ބަޖެޓުގައި، ވެރިންގެ ސެކިއުރިޓީގެ ކަންކަން ބެލެހެއްޓުމަށް ޓަކައި، މަޖިލީހުން ހެދި އިންކުއަރީން އެނގިފައި ވަނީ ދައުލަތުގެ ތިން ބާރުގެ ވެރިންގެ ސަލާމަތީ ކަންތައްތައް އެންމެ އެކަށީގެންވާ ގޮތެއްގައި ބެލެހެއްޓުމަށާއި، ޓެރަރިޒަމް ހުއްޓުވުމަށް ކުރަން ޖެހޭ މަސައްކަތްތައް ކުރަން އެމްއެންޑީއެފަށް ގިނަ އަދަދެެއްގެ ޒަމާނީ ވަސީިލަތްތައް ބޭނުންވާ ކަމަށެވެ. އެ މަސައްކަތްތައް ރަނގަޅަށް ކުރުމަށް ޓަކައި ތަމްރީނާއި ތައުލީމު ދިނުމަށާއި އެކިއެކި ނިޒާމުތައް ގާއިމްކުރަން ވެސް އެމްއެންޑީއެފުން ބޮޑު ޚަރަދެއް ކުރަން ޖެހޭކަން، ރައްޔިތުންގެ މަޖިލީހަށް މިއަދު ބަޖެޓު ހުށަހަޅަމުން ފިނޭންސުން ފާހަގަ ކޮށްފައިވެއެވެ.