ބަހަނާތައް ހުސްވެއްޖެ، މިއީ ކަންކަން ރަނގަޅުކުރަންވީ ވަގުތު:ޝާހިދު
މޫސުމީ ބަދަލުތަކުން އަރައިގަތުމަށް ކުރަމުންދާ މަސައްކަތުގައި ދައްކަމުންދާ ބަހަނާތައް މިހާރު ހުސްވެއްޖެ ކަމަށާއި މިއީ ކަންކަން ރަނގަޅުކުރުމަށް އަމަލީ ގޮތުން ކަންކަން ކުރަންވީ ވަގުތުކަމަށް އ.ދގެ އާއްމު މަޖިލީހުގެ 76ވަނަ ރައީސް ޢަބްދުﷲ ޝާހިދު ވިދާޅުވެއްޖެއެވެ.
ގްލާސްލޯގައި މިހާރު ކުރިއަށްދާ ކޮޕް26 ބައްދަލުވުން ހުޅުވުމުގެ ރަސްމިއްޔާތުގައި ވާހަަކަ ދައްކަވަމުން ޝާހިދު ވިދާޅުވީ އިންސާނުންނަށް މިހާރު ކުރިމަތިވެފައި މިވަނީ އިންސާނުންގެ ދިރިހުރުމާ މެދު އުފެދިފައިވާ ކާރިސާއެއް ކަމަށެވެ. މިކަން ހައްލުކުރުމުގެ ގާބިލުކަމާއި ވަސީލަތްތައް ވެސް އެބަހުރި ކަމަށާއި ނަމަވެސް މިކަން ހައްލުކުރުމަށް އެއްވެސް ކަމެއް ކޮށްފައި ނުވާ ކަމަށް ވިދާޅުވިއެވެ.
ރާއްޖޭގެ ފޮރިން މިނިސްޓަރުގެ މަގާމުގައި ވެސް ހުންނެވި ޝާހިދު އިތުރަށް ވިދާޅުވީ މިކަމުގައި އެންމެން ވެސް އެމީހެއްގެ އަމިއްލަ ނަފުސަށާއި އެކަކު އަނެކަކަށް އަދި މުޅި ދުނިޔެއަށް ވެސް ތެދުވެރިވާން ޖެހޭކަމަށެވެ. އަދި މޫސުމީ ބަދަލުތަކުގެ ބަހުސުގައި އެތައް އަހަރެއް ހޭދަކޮށްފި ކަމަށާއި ހަކަތަ އުފެއްދުމުގައި އިޔާދަކުރަނިވި ހަކަތައަށް ދިޔުމުގެ ވާހަކަދައްކާތާ އެތައް ދުވަހެއް ވެއްޖެކަމަށް ވެސް ފޮރިން މިނިސްޓަރު ވިދާޅުވިއެވެ.
މީގެ އިތުރުން ޝާހިދު ވިދާޅުވީ އ.ދ ގެ އާއްމު މަޖިލީހުގެ ރައީސްގެ ހައިސިއްޔަތުން އެހެން އެއްވެސް ވާހަކައަކަށް ވުރެ ބޮޑަށް މޫސުމީ ބަދަލުތަކުގެ ވާހަކަ އަޑު އިވިވަޑައިގަނެފައިވާ ކަމަށެވެ. އެގޮތުން ދުނިޔޭގެ ލީޑަރުންނާއި، ޒުވާނުންނާއި، ސިވިލް ސޮސައިޓީއާއި އަންހެނުންގެ ފަރާތުން ވެސް އެ ވާހަކަ އަޑު އިވިވަޑައިގަނެފައިވާކަމަށް ޝާހިދު ވިދާޅުވިއެވެ.
