ކޮވިޑް-19: 22 ރަށެއް އަދިވެސް މޮނިޓަރިންގައި!
ކޮވިޑް-19 ވޭދަނަތައް މުޖުތަމައު ތެރެއަށް ފެތުރި މޮނިޓަރިންއަށް ލައިފައިވާ ރަށްރަށުގެ އަދަދު 22އަށް އަރައިފިއެވެ.
ހެލްތު ޕްރޮޓެކްޝަން އެޖެންސީގެ އެންމެ ފަހުގެ ކޮވިޑް މައުލޫމާތުތައް ދައްކާގޮތުން މިހާރު މޮނިޓަރިންއަށް ލައިފައިވާ ރަށްރަށުގެ ތެރެއިން އެންމެ ގިނަ ދުވަހު މޮނިޓަރިންގައި އޮތީ މިދިޔަ އޮގަސްޓު މަހުގެ 28 ވަނަ ދުވަހު މޮނިޓަރިންއަށް ލީ އައްޑޫ ސިޓީގެ ގުޅިފައިވާ ރަށްތަކުގެ ތެރެއިން ހިތަދޫ، މަރަދޫ، މަރަދޫފޭދޫ، ފޭދޫ އެވެ. ދެން އެންމެ ގިނަދުވަހު މޮނިޓަރިންގައި އޮތީ އައްޑޫ ސިޓީ ހުޅުމީދޫއެވެ. އެރަށް މޮނިޓަރިންއަށް ލީ މިދިޔަ ސެޕްޓެމްބަރު މަހުގެ 9 ވަނަ ދުވަހުއެވެ.
މޮނިޓަރިންގައި މިވަގުތު އޮތް އިތުރު ރަށްތަކުގެ ތެރޭގައި ފ.ނިލަންދޫ، ލ.ގަން، ށ.ފީވައް، ބ.ތުޅާދޫ، ބ.ގޮއިދޫ، ނ.ހޮޅުދޫ، މ.މުލައް، ނ.ކެނދިކުޅުދޫ، ކ.ގުރައިދޫ، ށ.ފުނަދޫ، ށ.މަރޮށި، މ.ދިއްގަރު، ގއ.ކޮލަމާފުށި، ށ.ފޯކައިދޫ، ނ.މިލަންދޫގެ އިތުރުން ކ.ހުރާ އަދި މ. މުލި ހިމެނެއެވެ.
ރާއްޖޭގެ ކޮވިޑް-19 ގެ އެންމެ ފަހުގެ އަދާހަމަތަކަށް ބަލާލާއިރު މުޅިއަކު މިބައްޔަށް ފައްސިވެފައި ވަނީ 87،915 މީހުންނެވެ.
ބަލިން ފަސޭހަވެފައި ވަނީ 85،823 މީހުންނެވެ. ރާއްޖެއިން ކޮވިޑް-19އަށް ހޮސްޕިޓަލުތަކުގައި މިވަގުތު ފަރުވާ ދެމުންދަނީ 29 މީހުންނަށެވެ. އަދި މި ބަލީގައި ރާއްޖެއިން މިހާތަނަށް 243 މީހުން ނިޔާވެފައި ވެއެވެ.
