"ޕްރެކްޓިސް ޕާލަމެންޓް ފޯރ ޔޫތު" ޕްރޮގްރާމުގައި ބައިވެރިވުމުގެ ފުރުޞަތު ހުޅުވައިލައިފި
"ޕްރެކްޓިސް ޕާލަމެންޓް ފޯރ ޔޫތު" ޕްރޮގްރާމުގައި ބައިވެރިވުމުގެ ފުރުޞަތު ހުޅުވައިލައިފިއެވެ.
ރައްޔިތުންގެ މަޖިލީހުގެ އިދާރާއިން ވިދާޅުވީ "ޕްރެކްޓިސް ޕާލަމެންޓް ސީރީޒް"އަކީ ރައްޔިތުންގެ މަޖިލީހުގެ އިދާރާއާއި ޔޫއެންޑީޕީ މޯލްޑިވްސް ގުޅިގެން އޮސްޓްރޭލިއާގެ ޑިޕާޓްމަންޓް އޮފް ފޮރިން އެފެއާޒް އެންޑް ޓްރޭޑްގެ އެހީތެރިކަމާއެކު ހިންގާ ޕްރޮގްރާމެއް ކަމަށެވެ.
މި ޕްރޮގްރާމްގައި ހިމެނޭ މައިގަނޑު ބަޔަކީ، ޕްރެކްޓިސް ޕާލަމެންޓް ފޯރ ޔޫތު އަދި ޕްރެކްޓިސް ޕާލަމެންޓް ފޯރ ވިމެން ކަމަށާއި ޕްރޮގްރާމްގެ މައިގަނޑު މަޤްސަދަކީ، ޒުވާނުން އަދި އަންހެނުން ސިޔާސީ ހަރަކާތްތަކުގައި ބައިވެރިވުމަށް ހިތްވަރުދީ، އެހީތެރިވެ އަދި ކުރިމަގުގައި ސިޔާސީ މަގާމުތަކަށް ކުރިމަތިލުމަށް ބާރުއެޅުން ކަމަށެވެ.
މީގެ އިތުރުން މަޖިލިސް އިދާރާއިން ވިދާޅުވީ "ޕްރެކްޓިސް ޕާލަމެންޓް ފޯރ ޔޫތް"ގެ އުންމީދަކީ ޒުވާނުން މިފަދަ ހަރަކާތްތަކުގައި ބައިވެރިވެ ގައުމުގެ އެކިއެކި ނިންމުންތަކުގައި ބައިވެރިވެ، މުޖުތަމަޢަށް ފައިދާހުރި ބަދަލުތަކެއް ގެންނަން އެކީ މަސައްކަތްކުރުމަށް ހިތްވަރުދިނުން ކަމަށެވެ. އަދި ޕްރެކްޓިސް ޕާލަމެންޓްގެ މައިގަނޑު މަޤްސަދަކީ މަޖިލީހުގެ މަސައްކަތްތައް ކުރިއަށްދާ ގޮތް ރަނގަޅަށް ދެނެގަނެ، ގިނަ ޒުވާނުންނާއި އަންހެނުން މަޖިލީހަށް ކުރިމަތިލުމަށް ހިތްވަރުދިނުން އަދި ޕޮލިސީތަކުގައި ހުންނަ އުނިކަންކަން ދެނެގަނެ، ރަނގަޅު ބަދަލުތަކެއް ގެނައުމަށް އެކީގައި މަސައްކަތްކުރުން ކަމަށެވެ.
"ޕްރެކްޓިސް ޕާލަމެންޓް ފޯރ ޔޫތް"ގައި ހިމެނެނީ މައިގަނޑު 3 ބައެވެ. އެއީ، ޕޮލިސީތަކާއި މަޖިލީހުގެ މަސައްކަތްތައް ކުރިއަށްދާ ގޮތުގެ މަޢުލޫމާތު ދިނުމުގެ ސެޝަންއަކާއި ރައްޔިތުންގެ މަޖިލީހުގެ ނަމޫނާ މާދިރީއެކެވެ.
މި ޕްރޮގްރާމްގައި ބައިވެރިވުމުގެ ފުރުސަތު ހުޅުވައިލައިފައި ވަނީ 16 އަހަރާއި 25 އަހަރާ ދެމެދުގެ ދިވެހި ޒުވާނުންނަށެވެ. ބައިވެރިވާ ޒުވާނުން މި އިވެންޓުގެ ހުރިހާ ހަރަކާތްތަކުގައި ބައިވެރިވާން ވާނެއެވެ. ޕްރޮގްރާމްގައި ބައިވެރިވުމުގެ ފޯމު ހުށަހެޅުމުގެ ސުންގަޑިއަކީ މިމަހުގެ 15 ވަނަ ދުވަހެވެ.
މަޖިލިސް އިދާރާއިން ވިދާޅުވީ "ޕްރެކްޓިސް ޕާލަމެންޓް ފޯރ ޔޫތް"ގައި ބައިވެރިވުމަށް ބޭނުންވާ ޚާއްސަ އެހީއަށް ބޭނުންވާ ފަރާތްތަކަށް ވެސް ޖާގަ ކަނޑައެޅިފައިވާ ކަމަށެވެ. އަދި އިތުރު އެހީތެރިކަން ބޭނުންވާ ފަރާތްތައް މިސާލަކަށް ތަރުޖަމާކުރާނެ ފަރާތެއް ނުވަތަ އިޝާރާތުން ވާހަކަދައްކާ ފަރާތެއް ބޭނުންވާ ނަމަ، އެކަން ފާހަގަކުރުމުން، އެ އިންތިޒާމް ހަމަޖައްސައިދެވޭނެކަމަށް ވެސް މަޖިލިސް އިދާރާއިން ވަނީ ވިދާޅުވެއެވެ.
މި ޕްރޮގްރާމް ބޭއްވުމަށް ހަމަޖެހިފައި ވަނީ ޑިސެންބަރު 5 އިން 9 އަށް މާލޭ ސިޓީގައެވެ. މި ޕްރޮގްރާމުގައި ބައިވެރިވުމުގެ ފުރުޞަތު ދެވިގެންދާނީ ޝަރުތު ހަމަވާ ފަރާތްތަކާ ފޯނުން އިންޓަރވިއުކުރުމަށް ފަހު އެންމެ މަތިން ޕޮއިންޓް ލިބޭ 40 ފަރާތަކަށްކަމަށް މަޖިލިސް އިދާރާއިން ވިދާޅުވެއެވެ.
Ads by STO
