ޑޯނިއާ މަތިންދާބޯޓާ އެކު ތިބޭ އިންޑިއާގެ ސިފައިންނަށް ޑިޕްލޮމެޓިކް އިމިޔުނިޓީ ލިބޭނެ
އިންޑިއާއިން ރާއްޖެއަށް ހަދިޔާކޮށްފައިވާ އަސްކަރީ ޑޯނިއާ މަތިންދާބޯޓާ އެކު ތިބޭ އިންޑިއާގެ ޓެކްނިކަލް ސްޓާފުންނަށް ޑިޕްލޮމެޓިކް އިމިއުނިޓީ ލިބޭނެކަން ހާމަވެއްޖެއެވެ.
އިންޑިއާއާ އެކު ރާއްޖެއިން ހަދައިފައިވާ އެއްބަސްވުންތަކުގެ ސަބަބުން ރާއްޖޭގެ ސަލާމަތަށް ނުރައްކާ އޮތް ކަމަށް ބުނެ ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީއަށް ހުށަހަޅައިފައިވާ މައްސަލައާ ގުޅިގެން ރޭ އެ ކޮމިޓީއަށް އެމްއެންޑީއެފްގެ ބޭފުޅުން ވަނީ ހާޒިރުކޮށްފައެވެ. އެ ކޮމެޓީގައި ގިނަ ސުވާލުތަކެއް އެމްއެންޑީއެފްއަށް އަމާޒުވީ ޑޯނިއާ މަތިންދާބޯޓުގެ އެއްބަސްވުމާ ބެހޭ ގޮތުންނެވެ.
ބައްދަލުވުމުގައި އެމްއެންޑީއެފްގެ ލެފްޓިނެންޓް ކާނަލް ހަސަން އާމިިރު ވިދާޅުވީ، ޑޯނިއާ ބެލެހެއްޓުމަށް ޓަކައި ރާއްޖޭގައި ތިބޭ އިންޑިއާ ސިފައިންނަށް ޑިޕްލޮމެޓިކް އިމްތިޔާޒް ދީފައިވާ ކަމަށެވެ. ނަމަވެސް އެ މީހުން ރާއްޖޭން ބޭރުވުމާއި އެތެރެވުމަށް ދިވެހި ސަރުކާރުގެ ހުއްދަ ބޭނުންވާނެ ކަމަށް ވިދާޅުވިއެވެ. އަދި ޑޯނިއާ ބެލެހެއްޓުމަށް ޓަކައި ރާއްޖޭގައި ތިބޭ އިންޑިއާ ސިފައިންގެ ހުރިހާ ޚަރަދެއް ވެސް ބަލަހައްޓަނީ އެ ގައުމުގެ ސަރުކާރުން ކަމަށްވެސް އޭނާ ވިދާޅުވިއެވެ.
އެމްއެންޑީއެފުން ވިދާޅުވީ، ޑޯނިއާ ދުއްވަން އިންޑިއާގެ 25 މީހުން ތިބޭނެ ކަމަށާއި ހެލިކޮޕްޓަރާ އެކު، ޖުމްލަ 75 މީހުން ރާއްޖޭގައި ތިބޭނެ ކަމަށެވެ.
ޑޯނިއާ އެގްރީމެންޓާ ބެހޭ ގޮތުން ހާމަކުރި އިތުރު މައުލޫމާތުތަކަށް ބަލާއިރު، އެމްއެންޑީއެފްގެ ހުއްދަ ނެތި އެއްވެސް ބޭނުމެއްގައި ބޯޓަށް އުދުހުމުގެ ފުރުސަތެއް ނެތްކަން ފާހަގަކޮށްލެވެއެވެ. އަދިބޯޓުތަކުގެ މަރާމާތާއި ތެލުގެ ހަރަދު ކުރަނީ އިންޑިއާއިންނެވެ.
