އިނގިލީގެ ނިޝާނުން ކާކުކަން ދެނެގަނެވޭނެ ނިޒާމެއް ހަދަނީ
މީހާގެ ސިފައާއި އިނގިލީގެ ނިޝާނުން އެއީ ކާކުކަން ދެނެގަނެވޭނެ ނިޒާމެއް ގާއިމުކުރަން ހުށަހަޅައި ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީން ދިރާސާކޮށް ނިންމި ރިޕޯޓު، މިއަދު ފާސްކޮށްފިއެވެ.
މިދިޔަ މަހުގެ 25ވަނަ ދުވަހު އިންފޮމޭޝަން ޓެކްނޯލޮޖީ، ސައިންސް އަދި ކޮމިއުނިކޭޝަންގެ ދާއިރާގައި ރާއްޖެ އޮތް ހާލަތު ދެނެގަނެ އެސަސްމެންޓެއް ހެދުމަށް އެދި މަޖިލީހަށް ހުށަހެޅި މައްސަލަ ދިރާސާކޮށް ކޮމިޓީން އެކުލަވައިލި އެ ރިޕޯޓު ރައްޔިތުންގެ މަޖިލީހުގެ ތަޅުމުން މިއަދު ފާސްކުރީ 51 މެމްބަރުންގެ ވޯޓުންނެވެ. އެގޮތުން މަޖިލީހުން މިއަދު ފާސްކުރި ރިޕޯޓުން ނިންމައިފައި ވަނީ ދައުލަތުގެ ކަމާގުޅޭ އިދާރާތަކުން ގިނަ ކަންތައްތައް އިންތިޒާމް ކުރުމަށް ހުށަހެޅުމަށެވެ.
މިކަންތައްތަކުގެ ތެރޭގައި ސަރުކާރުގެ ވުޒާރާތަކާއި މުއައްސަސާތަކާއި އިދާރާތައް ހިންގުމަށް ބޭނުންވާ އެންމެހައި ސޮފްޓްވެއާތައް ދިރާސާކޮށް، ފަރުމާކޮށް އަދި ބަލަހައްޓާ ތަރައްގީކުރުމަށް މުޅި ނިޒާމު އެއް ވިއުގައަކުން ގުޅުވައިލެވިފައިވާ ޑިޖިޓަލް އޭޖެންސީއެއް ގާއިމުކުރުމާއި ވަޒީފާގައި މުވައްޒަފުން ހަރުލެއްވުމަށް ޓަކައި އެ މުވައްޒަފުން ކުރާ މަސައްކަތާ އެކަށީގެންވާ މުސާރައެއް ކަނޑައަޅައި ވަޒީފާގެ އޮނިގަނޑެއް ހެދުން ހިމެނެއެވެ.
އޭގެ އިތުރުން ޑިޖިޓަލް އޭޖެންސީން ތައްޔާރުކުރާ ސޮފްޓްވެއާތަކަކީ މޯބައިލް ފޯނާއި ކޮމްޕިއުޓަރުތަކުގައި ބޭނުންކުރެވޭ ގޮތަށް ދިވެހި އަދި އިނގިރޭސި ބަހުގެ އިތުރުން އެހެން ބަސްތައް ވެސް ހިމެނޭ ގޮތަށް ފަރުމާކުރެވިފައިވާ ސޮފްޓްވެއާތަކަކަށް ހެދުމާއި ސަރުކާރުގެ ރިކަރަންޓް ބަޖެޓްގެ އެކަށީގެންވާ އިންސައްތައެއް ޓެކްނޯލޮޖީ ދާއިރާއަށް ހާއްސަކުރުން ވެސް ހިމެނެއެވެ.
Ads by STO
