ހަޑި ހުތުރު އަމަލެއް، އައްސަދަށް ފިޔަވަޅު އަޅާ: ރައީސް މައުމޫން

ޤައުމީ ފުޓްބޯޅަ ޓީމުގެ ކުޅުންތެރިޔާ އަދި ޔޫތު މިނިސްޓްރީގެ ސްޓޭޓް މިނިސްޓަރު އައްސަދު އަލީ (އަޑުބަރޭ) އިއްޔެގއ މެޗުގައި ކުރީ ހަޑި ހުތުރު އަމަލެއް ކަމަށާއި އޭނާއާ މެދު ފިޔަވަޅު އެޅުމަށް ކުރީގެ ރައީސް، ރައީސް މައުމޫން ޢަބްދުލްޤައްޔޫމް ގޮވައިލައްވައިފިއެވެ.

Ads by STELCO

އަވައްޓެރި ޝްރީ ލަންކާގައި "ޕްރައިމް މިނިސްޓަރު މަހިންދަ ރާޖަޕަކްސަ ޓްރޮފީ 2021" ފުޓްބޯޅަ މުބާރާތުގައި ރާއްޖެއާއި ސީޝެލްސް ބައްދަލުކުރި މެޗުގެ އެންމެ ފަހު ވަގުތު ކުޅެން އެރުވި އަޑުބަރޭ ވަނީ ސީޝެލްސްގެ ކެޕްޓަން ސްޓީވް މެރީއަށް ވަރަށް އަނިޔާވެރި ގޮތަކަށް ހަމަލާ ދީފައެވެ. ކެޕްޓަން ސްޓީވަށް އަޑުބަރޭ ހަމަލާ ދިނީ ބޯޅަ ވެސް ނެތިއެވެ. އެއާ އެކު އޭނާއަށް ވަނީ ރަތް ކާޑު ދައްކާ ދަނޑުން ވެސް ބާލައިފައެވެ.

މިކަމާ ޓްވީޓް ކުރައްވަމުން ރައީސް މައުމޫން ވިދާޅުވީ އަޑުބަރޭގެ އެ އަމަލު ހަޑި ހުތުރު ކަމަށާއި އެކަށީގެންވާ ފިޔަވަޅު އެޅުމަށެވެ.

އަޑުބަރޭގެ އެ އަމަލު ކުށްވެރިކޮށް، ރައީސް މައުމޫންގެ އިތުރުން ގިނަ ދިވެހިން ވެސް ދަނީ އޭނާއާ މެދު ފިޔަވަޅު އެޅުމަށް ގޮވައިލައިފައެވެ.