ލ.ގަމު ފެނަކައިން ވަޒީފާއިން ވަކިކުރި ދެމީހަކަށް ވަޒީފާދޭން ހުކުމްކޮށްފި
ފެނަކަ ލ.ގަމު ބްރާންޗްތަކުން ވަޒީފާއިން ވަކިކުރި ދެ މުވައްޒަފަކަށް އަނބުރާ ވަޒީފާ ދިނުމަށް ވަޒީފާއާ ބެހޭ ޓްރައިބިއުނަލުން ޙުކުމް ކޮށްފިއެވެ.
މި މަހުގެ 15 ވަނަ ދުވަހު ވަޒީފާއާ ބެހޭ ޓްރިބިއުނަލުން ވަކިވަކިން ނިންމި ދެމައްސަލައެއްގައި ބުނެފައި ވަނީ ލ.ގަމު މަތިމަރަދޫ ބްރާންޗްގެ ސްޓޭޝަން މެނޭޖަރުގެ މަޤާމުގައި ހުއްޓައި 2019 ޑިސެމްބަރ 3ވަނަ ދުވަހު ވަޒީފާއިން ވަކިކުރި ލ.ގަމު މަތިމަރަދޫ ހަނދުވަރުދޭގޭ ޙުސައިން ޙަލީމާއި ލ.ގަމު ތުނޑީ ބްރާންޗްގެ އެސިސްޓެންޓް އިންޖިނިއަރގެ މަޤާމުގައި ހުއްޓައި 2019 ޑިސެމްބަރ 4ވަނަ ދުވަހު ވަކިކުރި ލ.ގަމު ތުނޑީ ޔަންމާ ޢަލީ ދާވޫދު ވަޒީފާއިން ވަކިކޮށްފައިވަނީ ޤާނޫނާ ޚިލާފަށް ކަމަށާއި އެ ދެ މީހުންނަށް އަނބުރާ ވަޒީފާ ދިނުމަށް އަމުރުކުރާ ކަމަށެވެ.
ޓްރައިބިއުނަލްގެ ޙުކުމްގައި އިތުރަށް ބުނެފައި ވަނީ ޙުސައިން ޙަލީމާއި އަލީ ދާވޫދު ވަޒީފާއިން ވަކިކޮށްފައި ވަނީ ލ.ރީޖަނަލް އޮފީސް އުވާލުމާ ގުޅިގެން މަޤާމު އުވާލެވިފައި ވާތީކަމަށް މައްސަލަ ރައްދުވި ފެނަކަ ކޯޕަރޭޝަން ލިމިޓެޑުން ބުނެފައިވީ ނަމަވެސް އެ ދެ ފަރާތް ވަޒީފާއިން ވަކިކުރުމުގައި މައުޟޫޢީ ޢަދުލުވެރިކަމާއި އިޖުރާޢީ ޢަދުލުވެރިކަން ޤާއިމްކޮށްފައި ނުވާ ކަމަށާއި އެ ދެ މީހުން ވަޒީފާއިން ވަކިކޮށްފައި ވަނީ ޤާނޫނާ ޚިލާފަށް ކަމުގައި ވުމުން އެއީ "ބޭއިންސާފު ވަކިކުރުމެއް" ގޮތުގައި ކަނޑައަޅާކަމަށެވެ. އެހެންކަމުން އެ ދެ މީހުންނަކީ ވަޒީފާއިން ވަކިވެފައިވާ ދެ މީހުންކަމަށް ނުބެލުމަށާއި އަނބުރާ ވަޒީފާ ދިނުމަށް ހުކުމްކުރާ ކަމަށް ޓްރައިބިއުނަލްގެ ހުކުމްގައި ވެއެވެ. މީގެ އިތުރުން ވަޒީފާއިން ވަކިކުރި ދުވަހުން ފެށިގެން އަނބުރާ ވަޒީފާ ލިބޭ ދުވަހާ ހަމަޔަށް އެ ދެމީހުންނަށް ލިބެންޖެހޭ މުސާރައާއި އިނާޔަތްތައް ދިނުމަށް ވެސް ޓްރައިބިއުނަލުން ފެނަކައިގެ މައްޗަށް އަމުރުކޮށްފައި ވެއެވެ.
ޙުސައިން ޙަލީމާއި ޢަލީ ދާވޫދު ވަޒީފާއިން ވަކިކޮށްފައި ވަނީ ސިޔާސީ ސަބަބުތަކަށް ޓަކައި ކަމަށް އެ ދެ ފަރާތުން ވަނީ ޓްރައިބިއުނަލްގައި ބުނެފައެވެ. ނަމަވެސް ސިޔާސީ އެއްވެސް ސަބަބަކާ ލައިގެން އެއްވެސް މީހަކު ވަޒީފާއިން ވަކި ނުކުރެއްވުމަކީ ރައީސް ޞާލިޙްގެ ރިޔާސީ ވައުދުފުޅެކެވެ.
ތިޔަކަހަލަ ވައުދު ވާ މީހެއް ތިޔަ ސޯލިހުއަކީ ސޯލލިހުކަމުންގޮސް އަރާހުރީ
ދެން އަތްޖަހާ!