ރައީސް ޔާމީން އަލުން ޖަލަށް ބަދަލު ކުރަން އަދި ގޮތެއް ނުނިންމަން: ކޮމިޝަނަރ
ކުރީގެ ރައީސް ، ރައީސް ޢަބްދުﷲ ޔާމީން ޢަބްދުލްޤައްޔޫމް އަލުން ޖަލަށް ބަދަލު ކުރަން އަދި ގޮތެއް ނުނިންމާ ކަމަށް ކޮމިޝަނަރ އޮފް ޕްރިޒަންސް އަަހްމަދު މުޙައްމަދުފުޅު ވިދާޅުވެއްޖެއެވެ.
މާފުށީ ޖަލުގައި ކުރިން ހަލުވި ކަމާއެކު ކޮވިޑް-19 ފެތުރުމުގެ ސަބަބުން ރައީސް ޔާމީން ހިމެނިވަޑައިގަންނަވާ ގޮތަށް 54 މީހަކު ގޭބަންދަށް ބަދަލު ކުރިއެވެ. އެމީހުންނަކީ ހައި ރިސްކު މީހުން ކަމަށް ވެސް އެއިރު ވަނީ ބުނެފައެވެ.
މިއަދު ހަވީރު ކުރިއަށްދިޔަ ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ކޮމިޝަނަރ އޮފް ޕްރިޒަންސް ވިދާޅުވީ، ގޭ ބަންދަށް އެއިރު ދޫކޮށްލި 54 މީހުން ވެސް ކަރެކްޝަންސްއިން މޮނިޓާ ކުރަމުންދާ ކަމަށާއި އެއިން އެކަކު ވެސް އަލުން ޖަލަށް ބަދަލު ކުރަން އަދި ވަކި ގޮތެއް ނިންމައިފައި ނުވާ ކަމަށެވެ.
"އެކަމާ މެދު (ރައީސް ޔާމީން ޖަލަށް ބަދަލު ކުރަން) ގޮތެއް ނިންމައިފައެއް ނުވޭ އަދިއެއް،" ސީޕީ އަހްމަދު މުހައްމަދުފުޅު ވިދާޅުވިއެވެ.
މަނީ ލޯންޑަރިންގެ ދައުވާ ސާބިތުވާކަމަށް ކަނޑައަޅައި ރައީސް ޔާމީންގެ މައްޗަށް ފަސް އަހަރު ދުވަހުގެ ޖަލު ހުކުމެއް އިއްވީ 2019 ވަނަ އަހަރުގެ ނޮވެމްބަރު މަހުގެ 28ވަނަ ދުވަހުގައެވެ. އެ ހުކުމަށް ހައިކޯޓުން ވެސް ތާއީދު ކުރުމުން، މިހާރު އެމަނިކުފާނުގެ ފަރާތުން އެ ހުކުމް ސުޕްރީމް ކޯޓުގައި ވަނީ އިސްތިއުނާފު ކޮށްފައެވެ. އެ ކޯޓުން އަމާޒު ހިފައިފައި ވަނީ މި މަސް ނިމުމުގެ ކުރިން ރައީސް ޔާމީންގެ މައްސަލައިގައި ގޮތެއް ކަނޑައަޅައި ހުކުމް ކުރުމަށެވެ.
