އައްޑޫސިޓީގެ ތަރައްޤީ ޕްލޭން ތައްޔާރުކުރަން ހަވާލެއް ނުކުރޭ: ރިޔަން
އައްޑޫސިޓީގެ ތަރައްޤީ ޕްލޭން ތައްޔާރު ކުރުމަށް ރިޔަން ޕްރައިވެޓް ލިމިޓެޑާ ހަވާލު ނުކުރާ ކަމަށް އެ ކުންފުނިން ބުނެފިއެވެ.
އައްޑޫސިޓީގެ މޭޔަރު އަލީ ނިޒާރު މީގެ ކުރިން ވިދާޅުވީ، އެ ސިޓީގެ ލޭންޑްޔޫސް ޕްލޭން ހަދަން ރިޔަން ޕްރައިވެޓް ލިމިޓެޑާ ހަވާލުކޮށްފައިވާތާ މިހާރު ގާތްގަނޑަކަށް އަހަރަކާ ގާތްވެފައިވާ ކަމަށާއި މަސައްކަތް އަވަސްކުރުމަށް ފާއިތުވި ފަސް މަސްދުވަސްތެރޭ އާދޭސްކޮށްފައިވާނެ ކަމަށެވެ. އަދި މިހާރު ރިއަންއާ ދައްކަމުންދަނީ މިކަމުގައި ދައްކާނެ އެންމެފަހުގެ ވާހަކަތައް ކަމަށް ވެސް މޭޔަރު ނިޒާރު ވިދާޅުވިއެވެ.
ނަމަވެސް މޭޔަރުގެ މި ވާހަކަތައް ދޮގުކޮށް، ރިޔަންއިން އިއްޔެ ވަނީ ބަޔާނެއް ނެރެފައެވެ. އެ ކުންފުންޏާއި ހަވާލުކޮށްފައި ވަނީ އައްޑޫސިޓީގެ ސަސްޓެއިނަބަލް އާރބަން ޑިވެލޮޕްމަންޓް މާސްޓަރ ޕްލޭން ހެދުމާއި އަދި އައްޑޫސިޓީގެ ލޭންޑްޔޫޒް ޕްލޭން ރިވިއުކުރުމުގެ މަސައްކަތް ކަމަށް އެ ކުންފުނިން ބަޔާނުގައި ބުނެފައިވެއެވެ.
އެ މަސައްކަތް ވެސް ނުނިމި ދިގުލައިގެން ގޮސްފައިވަނީ ކައުންސިލުން އެ ކުންފުންޏަށް ދޭންޖެހޭ މުހިންމު މައުލޫމާތެއް ނުދީގެން ކަމަށް ވެސް ރިޔަންއިން ބުނެފައިވެއެވެ.
"ރިޔަންއާ ހަވާލުކުރެވިފައިވާ ލޭންޑްއޫސް ޕްލޭން ހެދުމާއި މާސްޓަރ ޕްލޭން ހެދުމުގެ މަސައްކަތް ލަސްވެގެންދާ މައިގަނޑު ސަބަބަކީ އައްޑޫ ސިޓީގެ އެންމެފަހުގެ ބިމުގެ ސާވޭ މެޕްތައް ކައުންސިލުން ފައިނަލްކޮށް މިއަދާހަމައަށް ވެސް މިކުންފުންޏާ ހަވާލުކޮށްފައި ނުވާތީ،" އެ ކުންފުނިން ނެރުނު ބަޔާނުގައި ބުނެފައިވެއެވެ.
ރިޔަންއިން އިތުރަަށް ބުނެފައި ވަނީ އައްޑޫސިޓީގެ ސަސްޓެއިނަބަލް އާރބަން ޑިވެލޮޕްމަންޓް މާސްޓާ ޕްލޭން އެކުލަވާލުމާއި އަދި އައްޑޫސިޓީގެ ލޭންޑްޔޫޒް ޕްލޭން ރިވިއުކުރުމުގެ މަސައްކަތަށް 1 އެޕްރީލް 2021ގައި ގެނައި އިޞްލާޙުހެ 4 ވަނަ މާއްދާގެ (ރ) ގައި، މަސައްކަތް ކުރިއަށް ގެންދިއުމުގައި، "ކޮންޑިޝަން ޕްރެސިޑެންޓް" ނުވަތަ "ޝަރުޠު ސާބިޤު" ނުވަތަ ޝަރުތު ތަކެއް މަތިކޮށްފައިވާ ކަމަށެވެ.
