ޔޫއޭއީގައި ހުކުރު ދުވަސް ދެން ބަންދެއް ނުވާނެ!
އެކުވެރި އަރަބި އިމާރާތް (ޔޫއޭއީ)ގައި ސަރުކާރު ބަންދު ދުވަސްތަކުގެ ގޮތުގައި ކަނޑައަޅައިފައި އޮތް ދުވަސްތައް ބަދަލުކޮށްފިއެވެ.
މީގެ ކުރިން އެ ޤައުމުގައި ބަންދު ދުވަސްތަކަކީ ހުކުރު އަދި ހޮނިހިރެވެ. އިސްލާމީ ގިނަ ޤައުމުތަކެއްގައި މި ދެ ދުވަހަކީ ބަންދު ދުވަސްތަކެކެވެ.
ޔޫއޭއީ ދައުލަތުގެ ނިއުސް އެޖެންސީ ޑަބްލިއުއޭއެމްއިން އަންގާރަ ދުވަހު ސަރުކާރާ ހަވާލާދީ އާއްމު ކުރި އިއުލާނެއްގައި ވިދާޅުވީ، މިހާރު ސަރުކާރު ބަންދު ދުވަސްތައް ދެ ދުވަހާއި ބަޔަށް އިތުރު ކުރަން ނިންމައިފައިވާ ކަމަށެވެ. މިގޮތުން ހުކުރު ދުވަހު ހެނދުނު މަސައްކަތަށް ނިކުންނަން ޖެހޭ ކަމަށާއި ހުކުރު ދުވަސް މިހާރު ހާފް ޑޭއަކަށް ބަދަލުކޮށްފައިވާ ކަމަށެވެ.
މި ފިޔަވަޅަށް އަމަލުކުރަން ފަށާނީ 1 ޖެނުއަރީ 2022އިން ފެށިގެންނެވެ. އެ ދުވަހުން ފެށިގެން އެ ޤައުމުގައި ސަރުކާރު ބަންދުވާނީ ހުކުރު ދުވަހު މެންދުރު ފަހުން ފެށިގެން އާއްދީތަ ދުވަހާ ހަމައަށެވެ.
އަބޫދާބީ ސަރުކާރުގެ މީޑިއާއިން އެންގި އެންގުމުގައި ވިދާޅުވީ، މިއީ އެ ޤައުމުން "އިގުތިސޯދީ އަދި ވިޔަފާރީގެ އެކި ދާއިރާތަކުން ދުނިޔޭގެ ވާދަވެރިކަން އިތުރުކޮށް، ދުނިޔޭގެ ކުރިއެރުންތަކާ އެއްހަމައެއްގައި ހިފެހެއްޓުމަށް ޔޫއޭއީއިން ގެންގުޅޭ ތަސައްވުރާ އެއްގޮތްވާ ގޮތުގެ މަތިން" ގެނައި ބަދަލެއް ކަމަށެވެ.
"ޔޫއޭއީއަކީ ދުނިޔޭގެ ފަސް ދުވަހުގެ ހަފުތާއަށް ވުރެ ކުރު ގައުމީ މަސައްކަތު ހަފުތާއެއް ތައާރަފުކުރި ދުނިޔޭގެ ފުރަތަމަ ގައުމު،" ޑަބްލިއުއޭއެމްއިން ވިދާޅުވިއެވެ
އައު ޤަވާއިދާ އެކު ހުކުރު ދުވަހު މަސައްކަތް ކުރަން ޖެހޭނީ 4.5 ގަޑިއިރަށެވެ. އަދި ހުކުރު ދުވަހު ހުކުރު ނަމާދު ކުރަން ވަގުތު ދޭން ނިންމައިފައިވާ އިރު، ހުކުރު ދުވަހަކީ ގޭގައި މަސައްކަތް ކުރާ ދުވަހަކަށް ހެދުމުގެ ބާރު އޮފީސްތަކަށް ސަރުކާރުން ވަނީ ދީފައެވެ.
ތިޔަތަނުގަ އަދި ހުކުރު ކުރުންވެސް ހުއްޓާ ލާނެ ފައިސާއާ ހެދި އާޚިރަތް ހަނދާން ނައްތާލަމުން ދާ ބައެއް ތިޔަ ބައިގަނޑަކީ . ކުރީގަ ވަކި ހުއްދައެއްގެ ދަށުން ރާވިއްކާ ތަންތަނަށް މުސްލިމުންނަށް ވަދެވެނީ . މިހާރު އެކަން އޯކޭ ހުއްދައެއް ބޭނުމެއް ނޫން ބޭނުން މީހަަކުު ވަދެ ބޮންޏާ ބޯންވީ