ޝަރީފަކީ ޚާއިނެއް، އިންތިޚާބުގެ ކަންކަން ހިނގައިދިޔަ ގޮތް ސާފު ކޮށްދޭނަން: ރައީސް ޔާމީން
އިލެކްޝަންސް ކޮމިޝަން (އީސީ)ގެ ކުރީގެ ރައީސް އަހުމަދު ޝަރީފަކީ ޚާއިނެއް ކަމަށާއި 2018ވަނަ އަހަރުގެ ރިޔާސީ އިންތިހާބުގެ ކަންކަން ދިޔަ ގޮތް ދެން އަންނަ ޕީޕީއެމްގެ ވެރިކަމެއްގައި ރައްޔިތުންނަށް ސާފުކޮށްދެއްވާނެ ކަމަށް ކުރީގެ ރައީސް ، ރައީސް ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
އެންމެ ފަހުން ބޭއްވި ރިޔާސީ އިންތިޚާބުގެ ސައްޙަކަމާ މެދު އިދިކޮޅު ޕީޕީއެމްއިން ވަނީ ސުވާލު އުފައްދައިފައެވެ. އަދި އެ އިންތިހާބުގެ ނަތީޖާ ގަބޫލު ނުކޮށް އެދުވަސްވަރު އިހުތިޖާޖު ވެސް ކުރިއެވެ. އޭގެ އިތުރުން އީސީއަށާއި އެ ކޮމިޝަންގެ އެއިރުގެ ރައީސް ޝަރީފަށް އިދިކޮޅުން ވަނީ ވަރަށް ބޮޑެތި ތުހުމަތުތަކެއް ވެސް ކޮށްފައެވެ.
އިދިކޮޅު ޕްރޮގްރެސިވް ކޯލިޝަންގެ ފަރާތުން ރޭ ކާނިވާ ސަރަހައްދުގައި ބޭއްވި ޖަލްސާގައި ރައީސް ޔާމީން އަނެއްކާ ވެސް ވަނީ އެ ތުހުމަތުތަށް އައު ކުރައްވައިފައެވެ. އެމަނިކުފާނު ވިދާޅުވީ ވެރިކަން ބަދަލުވެ ދިޔަ ގޮތާއި އިންތިހާބުގެ އޮޅުވައިލުންތައް ދައުލަތުގެ މުއައްސަސާތަކުގެ ވެރިންގެ ގޮތުގައި ތިއްބެވި ބޭފުޅުންނަށް ވަރަށް ސާފުކޮށް އެނގިވަޑައިގަންނަވާނެ ކަމަށާއި ހާއްސަކޮށް އަސްކަރިއްޔާގައި އިސްކޮށް ތިއްބެވި ބޭފުޅުންގެ ދައުރު އެކަމުގައި ބޮޑު ކަަމަށެވެ.
"ވެރިކަން ބަދަލުވެގެން ދިޔަ ގޮތް އިންތިޚާބު ބަދަލުވެގެން ދިޔަ ގޮތް ނޭނގޭނެ އެއްވެސް މުއައްސަސާއެއްގެ އިސް މީހަކު ނުހުންނާނެ. އެ މީހުން މިއަދު ރައްޔިތުންނަށް ޖަވާބުދާރީވާން ޖެހޭ. ﷲގެ ރަހުމަތުން މޭޒުގެ އަނެއްކޮޅުގައި ޕީޕީއެމް ތިބޭ ދުވަހަކުން މިކަމުގެ ހަގީގަތް އެނގޭނެ. ރައްޔިތުންނަށް އެކަން އެނގޭނެ،" ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ، އިންތިހާބު އޮޅުވައިލުމުގެ މަސައްކަތް ފެށީ އެ މަނިކުފާނު ބަލި ނުކުރެވޭނެކަން ޔަގީންވުމުން ކަމަށެވެ.
