ކޮމަންޑޫ ދާއިރާއަށް ވާދަކުރުމާ މެދު އަދި ވަކިގޮތެއް ނުނިންމަން: ޖޭޕީ
ހުސްވެފައިވާ ކޮމަންޑޫ ދާއިރާގެ މަޖިލިސް ގޮނޑިއަށް ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީން ވާދަކުރުމާ މެދު އަދި ގޮތެއް ނުނިންމާކަމަށް އެޕާޓީން ބުނެފިއެވެ.
ޖޭޕީން ބުނީ އެ ޕާޓީން ކޮމަންޑޫ ދާއިރާއަށް ވާދަކުރުމަށް ކެނޑިޑޭޓަކު ނެރުމާ ގުޅޭގޮތުން މަޝްވަރާކުރަމުން އަންނަ ކަމަށެވެ. ނަމަވެސް އަދި ވަކި ގޮތެއް ނުނިންމާކަމަށް ޖޭޕީން ބުންޏެވެ.
ކޮމަންޑޫ ދާއިރާގެ ބައި-އިލެކްޝަން އޮންނާނީ، 5 ފެބްރުއަރީ 2022ގައެވެ. ބައި އިލެކްޝަންގައި ބައިވެރިވުމުގެ ފަހު ތާރީޚަކީ މިމަހުގެ 30ވަނަ ދުވަހެވެ.
ކޮމަންޑޫ ދާއިރާގެ ގޮނޑި ހުސްވީ އެ ގޮނޑި ފުރުއްވަމުން ގެންދެވި ހުސެއިން ވަހީދު އަވަހާރަވުމާ ގުޅިގެންނެވެ.
ކޮމަންޑޫ ދާއިރާގެ ބައި-އިލެކްޝަންގައި ވާދަކުރާނެ ކަމަށް މިހައިތަނަށް އިއުލާން ކޮށްފައި ވަނީ އެމްއެންޕީގެ އިތުރުން އެމްޑީޕީއާއި ޕީޕީއެމުންނެވެ. ޕީޕީއެމްއިން ވެސް ވަނީ ޕްރައިމަރީގައި ވާދަ ކުރުމުގެ ފުރުސަތު ހުޅުވައިލައިފައެވެ.
