ހުރިހާ ޕާޓީއަކުން ވެސް ވަގު ފޯމު ހުށަހަޅާ، އެކަމާ އީސީއަށް ކުރެވޭނެ ކަމެއް ނެތް: ފުއާދު
ސިޔާސީ ޕާޓީތަކުން މެމްންރުން އިތުރުކުރުމަށް ވަގު ފޯމު ހުށަހެޅިޔަސް އެކަމާ ދެކޮޅަށް ކުރެވޭނެ މާބޮޑު ކަމެއް ނެތްކަމަށް އިލެކްޝަން ކޮމިޝަން (އީސީ)ގެ ރައީސް ފުއާދު ތައުފީގު ވިދާޅުވެއްޖެއެވެ.
"ސަންގު ޓީވީ"ގެ ޕްރޮގްރާމެއްގައި ވާހަކަ ދައްކަވަމުން ފުއާދު ރޭ ވިދާޅުވީ، މެންބަރުން އިތުރުކުރުމުގެ ބޭނުމުގައި ހުރިހާ ޕާޓީތަކުން ވެސް ވަގުފޯމު ހުށަހަޅާ ކަމަށާއި އަލަށް ޕާޓީ އުފެދިގެން އަންނައިރު ގިނަ އަދަދެއްގެ ފޯމުތައް އީސީއަށް ހުށަހަޅާ ކަމަށެވެ. އަދި އެ ފޯމުތަކުގައި ގިނަ އަދަދަކަށް ވަގު ފޯމު ހުންނަކަމަށް ވެސް ބުނެފައިވެއެވެ.
"ފޭކް ފޯމުތަކެއް ހުށަހެޅުމުން އަޅުގަނޑުމެން ހަމަ ދޭތެރެ ދޭތެރެއިން ހުރިހާ ޕާޓީތަކެއްގެ ބޭފުޅުންނާ އެކީ ވެސް މަޝްވަރާކޮށްހަދަން، ދެން ތި ވިދާޅުވާ މައްސަލައަކީ ހަމަ ހުރިހާ ޕާޓީއަކަށް ވެސް ދިމާވެފައި އޮތް މައްސަލައެއް އިނގޭތޯ، ވަކި ޕާޓީއަކަށް އިސްތިސްނާއެއް ނުކުރެވޭ، އެހެން ނަމަވެސް އައު ޕާޓީއެއް އުފެދިގެން އަންނައިރު ގިނަ އަދަދެއްގެ ފޯމުތައް ހުށަހަޅާތީވެ އެ އުފެދޭ ޕާޓީގައި އެކަހަލަ ފޭކު ފޯމު ހަމަ ގިނަ." ފުއާދު ވިދާޅުވިއެވެ.
ފުއާދު ވިދާޅުވީ، އީސީއަށް ހުށަހަޅާ ފޯމުތައް ވަކިވަކިން ޗެކްކުރުމުގެ އުސޫލެއް ނޯންނަ ކަމަށެވެ. އޭގެ ބަދަލުގައި އޮންނަނީ ޕާޓީގެ މެންބަރަކަށްވުމަށް އެދޭ ފޯމުގައި ޕާޓީގެ ޒިންމާދާރުވެރިޔަކު ސޮއިކުރަން ކަމަށެވެ. އޭނާ ވިދާޅުވީ ޕާޓީގެ މެންބަރަކަށް ވުމަށް އެދޭ ފޯމުގައި ޕާޓީއަށް އަލަށް ސޮއިކުރާ ފަރާތާއި، އޭނާ ސޮއިކުރިކަމަށް ހެކިވާ ދެ ހެކިވެރިންގެ ސޮއިގެ އިތުރުން ފޯމުތައް ހިފައިގެން ޕާޓީގެ ފަރާތުން އަންނަ މީހާ އިގުރާރެއްގައި ސޮއިކުރަން ޖެހޭ ކަމަށެވެ. އެ އިގުރާރުގައި އޮންނަނީ އެ ފޯމުތަކުގައި ހަގީގަތާ ހިލާފު ވާހަކައެއް ނެތް ކަމަށް އިގުރާރުވާ ކަމަށެވެ.
އޭނާ ވިދާޅުވީ، އެކަން އެގޮތަށް އޮތް ނަމަވެސް ވަގު ފޯމު ހުށަހެޅި މައްސަލައެއް ފެންމަތިވުމުން އެކަން ބަލަން ޕާޓީތަކަށް ގުޅާލުމުން އެކަމުން ދިފާއުވެގަންނަ ކަމަށެވެ. އެހެންވެ އީސީއަށް ކުރެވޭނެ ކަމެއް ނެތް ކަމަށް ވެސް ވިދާޅުވެފައި ވެއެވެ.
ސިޔާސީ ޕާޓީއަކަށް ސޮއި ނުކުރަނީސް ޕާޓީއަކަށް ރަޖިސްޓަރ ވެފައިވާ ނަމަ އެކަމުގެ ޝަކުވާ ހުށަހެޅުމުން އެ މައްސަލައެއް ބަލާނެ ކަމަށް ފުއާދު ވިދާޅުވިއެވެ. އަދި ވިދާޅުވީ މައްސަލަ ބަލައިފައި އެއީ ވަގު ފޯމެއްކަން ޔާގީންވުމުން ޕާޓީގެ ދަފުތަރުން އުނިކޮށްދޭނެ ކަމަށެވެ. މީގެ އިތުރުން އޭނާ ވިދާޅުވީ، ވަގު ފޯމު ހުށަހެޅި މައްސަލައިގައި ސިޔާސީ ޕާޓީއަކާ ދެކޮޅަށް ޝަރުއީ ކޯޓަކަށް ނުވަތަ ފުލުހަށް މައްސަލަ ޖައްސަން ބޭނުންވާ ފަރާތްތަކަށް އީސީގެ ފުރިހަމަ އެއްބާރުލުން ވެސް ލިބޭނެ ކަމަށެވެ.
އަދި އޭނާ ވިދާޅުވީ ރާއްޖެއަށް އީވޯޓިން ތައާރަފު ކުރުމަށް 2008ގެ އިންތިހާބަށް ފަހު މަސައްކަތް ކުރަމުން އަންނަ ކަމަށާއި އީ ވޯޓިން ތައާރަފުކުރެވިއްޖެ ނަމަ ވަރަށް ބޮޑު ހަރަދެއް ސަލާމަތް ކުރެވޭނެ ކަމަށެވެ. ނަމަވެސް އީ ވޯޓިންއާ އަބަދުވެސް ދެކޮޅު ހަދަނީ އޭރަކު އިދިކޮޅުގައި އޮންނަ ޕާޓީއެއް ކަމަށާއި އެމްޑީޕީ އަދި ޕީޕީއެމުން ވެސް ވަނީ އީވޯޓިންއަށް ދެކޮޅު ހަދައިފައި ކަމަށެވެ.
2018ގައި ބޭއްވި ރިޔާސީ އިންތިހާބު އޮޅުވައިލިކަމަށް އިދިކޮޅު ޕީޕީއެމް/ޕީއެންސީ ކޯލިޝަނުން ކުރި ތުހުމަތަކާ ގުޅިގެން ފުއާދު ވިދާޅުވީ އެކަމާ ގުޅޭ ގޮތުން ހާއްސަ އޮޑިޓެއް ހަދައިފައި ވާނެ ކަމަށެވެ. އަދި އެ އޮޑިޓުން އެކަހަލަ އެއްވެސް ކަމެއް ފާހަގަކުރެވިފައި ނެތް ކަމަށް ވިދާޅުވިއެވެ.
"ރާއްޖޭގައި އަބަދުވެސް ކަން އޮންނަ ގޮތް އެއީ. ފުޓްބޯޅަ މެޗަކުން ބަލިވީމާ ރެފްރީ ވަކިއަތަކަށް ހިފާފަ، ނޫނީ ދަނޑުގެ މައްސަލަ، ވިނަގަނޑުގެ މައްސަލަ" ފުއާދު ވިދާޅުވިއެވެ.
