"ސައީ" ވެސް ކޮވިޑް-19އަށް ފައްސިވެއްޖެ
ސްޓާޕްލަސްއިން ދައްކާ މަޝްހޫރު ޓީވީ ސީރީޒް "ގުމް ހެ ކިސީކޭ ޕިޔާރް މޭ"ގެ އެއް ލީޑް އެކްޓަރ އައިޝާ ސިންގް (ސައީ ޖޯޝީ) ވެސް ކޮވިޑް-19އަށް ފައްސިވެއްޖެއެވެ.
ރިޕޯޓުތަކުން ބުނެފައިވާ ގޮތުގައި އައިޝާ ކޮވިޑަށް ފައްސިކަން އެނގިފައި ވަނީ އިއްޔެގެ ވަގުތެއްގައެވެ. އޭގެ ދެ ދުވަސް ކުރިން ސެޓްގައި ހުއްޓައި، ކޮވިޑްގެ އަލާމާތްތައް ފެނިގެން ޝޫޓިންގ މެދުކަނޑައިލުމަށް ފަހު ސިއްހީ ހިދުމަތްތެރިންގެ އެހީއާއެކީ އައިޝާ ގެއަށް ދިޔަ ކަމަށް ވެސް ރިޕޯޓުތަކުން ބުނެއެވެ.
ގުމް ހެ ކިސީކޭ ޕިޔާރް މޭ ގެ ޕްރޮޑަކްޝަން ޓީމްގެ ފަރާތުން ބުނީ "ސައީ" ކޮވިޑަށް ފައްސިވުމުން، ދުވަސްކޮޅަކަށް ސީރީޒްގައި އޭނާގެ މަންޒަރުތައް ނުލައި ނަގަން ޖެހޭނެތީ އެ ސީރީޒްގެ ސްޓޯރީލައިނަށް ދެން ބަދަލުތަކެއް އައުން އެކަށީގެންވާ ކަމަށެވެ.
އައިޝާ ސިންގ މިވަގުތު ހުރީ ކަރަންޓީނުގައި ކަމަށާއި، ކޮވިޑަށް ފައްސިވުމުން އެ ސީރީޒްގެ އެހެން ހުރިހާ އެކްޓަރުންނާއި ކްރޫއިން ވެސް މިހާރު ކޮވިޑަށް ޓެސްޓު ކޮށްފައިވާ ކަމަށް ރިޕޯޓުތަކުން ބުނެއެވެ.
އިންޑިއާގައި މިދުވަސްކޮޅު ހަލުވިކަމާ އެކު ކޮވިޑް ފެތުރެމުން ދާއިރު، ވަރަށް ގިނަ އެކްޓަރުންތަކެއް ދަނީ މި ބައްޔަށް ފައްސިވަމުންނެވެ. އެގޮތުން ޑްރާމާ ސީރީޒް "ޕަންދްޔާ ސްޓޯރ"ގެ ހަތަރު އެކްޓަރަކު ވެސް ވަނީ މި ބައްޔަށް ފައްސިވެފައެވެ.
Ads by STO
