ދޯނީގެ ކައްޕި ހޯދުމުގެ މަސައްކަތް "ސާފެސް ސާޗް"އަކަށް ބަދަލުކޮށްފި
މި މަހުގެ 3ވަނަ ދުވަހު ފ.ފީއަލީން ފުރައިގެން މާލެއަށް ދަތުރުކުރި އަލަމާ-05 ދޯނި އަޑިއަށް ދިޔުމުގެ ސަބަބުން، އެ ދޯނިން ގެއްލުނު ކައްޕި ހޯދުމުގެ މަސައްކަތް ނާކާމިޔާބުވެ ، އެ މަސައްކަތް ސާފަސް ސާޗަކަށް ބަދަލުކޮށްފި ކަަމަށް އެމްއެންޑީއެފްއިން ވިދާޅުވެއްޖެއެވެ.
އަލަމާ-05 އަަޑިއަށް ގޮސްފައި ވަނީ އެރޭ 10:50 ހައިއިރު ވ.ފުސްފަރު ހުޅަނގުންނެވެ.
އަލަމާ-05 ދޯނި އަޑިއަށް ގޮސް، އޭގެން ދަތުރުކުރި ތިން މީހުން ކަނޑުވުމާ ގުޅިގެން ކޯސްޓްގާޑުން ކަނޑާއި ވައިގެމަގުން ކުރެވުނު މަސައްކަތުން 2022 ޖެނުއަރީ 5ވަނަ ދުވަހުގެ ހެނދުނު 06:50ހައިއިރު އެ ދޯނިން ދަތުރުކުރި ދެ ފަޅުވެރިން ވަނީ ސަލާމަތްތެރިކަމާ އެކު ހޯދިފައެވެ. އަދި ދޯނީގެ ކައްޕި ހޯދުމުގެ މަސައްކަތް ނާކާމިޔާބުވި ނަމަވެސް އެމްއެންޑީއެފުން ވަނީ އޭނާ ހޯދުމަށް ގިނަ މަސައްކަތްތަކެއް ކުރައްވައިފައެވެ. މި ގޮތުން އޭނާ ހޯދުމަށް ކަނޑާއި ވައިގެ މަގުންް 7299.78 އަކަނޯޓިކަލް މޭލުގެ ބޮޑު ސަރަޙައްދެއް ބަލައިފައިވާ ކަމަށް ވެސް ވިދާޅުވިއެވެ.
އަލަމާ-05 ދޯންޏާއި ދޯނިން ގެއްލުނު ތިން މީހުން ހޯދުމަށް ކޯސްޓްގާޑުގެ ކަނޑާއި ވައިގެ އުޅަނދުފަހަރު ބޭނުން ކުރެވިފަައިވާ ކަމަށާއި، މި ހާދިސާގައި މީހުން ހޯދުމަށް ދޯނީގެ ވެރިފަރާތުގެ އިތުރުން މި ސަރަހައްދުގެ ރަށު ކައުންސިލް އިދާރާތަކާއި، ރިސޯޓްްތަކާއި، ދިވެހި ފުލުހުންގެ ޚިދުމަތް އަދި ރާއްޖޭގެ ފުލައިޓް އޮޕަރޭޓްކުރާ ފަރާތްތަކުގެ އެހީތެރިކަން ލިބިފައިވާކަން ވެސް ފާހަގަކޮށްފައިވެއެވެ.
އަލަމާ-05 ދޯނީގެ ކައްޕި ހޯދުމުގެ ސަރޗް އެންޑް ރެސްކިޔު އޮޕަރޭޝަނުގައި ޒަމާނީ ވަސީލަތްތައް ވަނީ ބޭނުން ކުރެވިފައެވެ. އަދި ކޯސްޓްގާޑާއި އާންމު ފަރާތްތަކާ ގުޅިގެން ހޯދަމުންދިޔަ ދޯނީގެ ކެޕްޓަންގެ އެއްވެސް ނިޝާނެއް މިހައިތަނަށް ފެނިފައި ނުވާތީވެ، ކޯސްޓްގާޑުން ހިންގި ސަރޗް އެންޑް ރެސްކިޔު އޮޕަރޭޝަން، 2022 ޖަނަވަރީ 8ވަނަ ދުވަހުގެ ރެއާ ހިސާބަށް ހިންގި އެކްޓިވް ސަރޗް ވަނީ ސަރފޭސް ސަރޗަކަށް ބަދަލުކުރެވިފައި ކަމަށް އެމްއެންޑީއެފްއިން ވިދާޅުވިއެވެ.
ހޯދަމުންދާ ދޯނީގެ ކައްޕިގެ އިތުރު މަޢުލޫމާތެއް ނުވަތަ ނިޝާނެއް ފެނިއްޖެ ނަމަ އެ ސަރަޙައްދުން ދަތުރު ކުރައްވާ ފަރާތްތަކުން ބައްލަވައިދެއްވައި، ކޯސްޓްގާޑުގެ ހިލޭ ގުޅޭ ނަންބަރު 191އަށް ގުޅައި ހިއްސާކޮށްދެއްވުމަށް އެމްއެންޑީއެފްއިން އެދިވަޑައިގެންފައި ވެއެވެ.
