އިންޑިއާ ޓީޗަރުންނަށް ފުރައްސާރަ ކުރަމުންދާ ކަމަށް ބުނާ މައްސަލަ ފުލުހަށް ހުށަހަޅައިފި

އިދިކޮޅު ފަރާތްތަކުން އިސްނަގައިގެން ރާއްޖޭގައި ހިންގާ "އިންޑިއާ އައުޓް" ކެމްޕެއިނާ ގުޅިގެން، ރާއްޖޭގައި ތައުލީމު އުނގަންނައި ދެމުންދާ ބައެއް އިންޑިއާ ޓީޗަރުންނަށް ފުރައްސާރަ ކުރަމުންދާކަމަށް ބުނާ މައްސަލައެއް، ފުލުހުންނަށް ހުށަހަޅާފައިވާ ކަމަށް އެޑިއުކޭޝަން މިނިސްޓްރީން ވިދާޅުވެއްޖެއެވެ.

Ads by Hajj Corporation

އެނގިފައިވާ ގޮތުގައި ރާއްޖޭގައި ތިބި އިންޑިއާ ސިފައިން ރާއްޖެއިން ބޭލުމަށް ގޮވައިލައި، އިދިކޮޅު ފަރާތްތަކުން "އިންޑިއާ އައުޓް"ގެ ނަމުގައި ހިންގަން ފެށި ސިޔާސީ ހަރަކާތުގެ ސަބަބުން، އެ ޤައުމަށް ނިސްބަތްވާ ބައެެއް ޓީޗަރުންނާ މަގުމަތިން ވެސް ދިމާކޮށް ބައެއް ފަރާތްތަކުން ދަނީ ބައެއް ސްކޫލްތަކުގެ ފާރުގައި ވެސް "އިންޑިއާ އައުޓް" ގްރެފިޓީ ކުރަހަމުންނެވެ.

މިކަމާ ގުޅިގެން އެޑިއުކޭޝަން މިނިސްޓްރީގެ ޕާމަނަންޓް ސެކްރަޓަރީ "ދެން"އަށް މައުލޫމާތު ދެއްވަމުން ވިދާޅުވީ، ށ. ފުނަދޫ ސްކޫލު ސަރަހައްދުގައި ބެނާއެއް ހަރުކުރުމުގެ އިތުރުން، މިއަދު ހެނދުނު ކުދިން ސްކޫލަށް ދިޔައިރު "އިންޑިއާ އައުޓް" ލިޔެ، އެ ސްކޫލުގެ ފާރުގައި ގްރެފިޓީތަކެއް ވެސް ކުރަހައިފައި ހުރި ކަމަށެވެ.

އެކަމާ ގުޅިގެން ފޯކައިދޫ ސްކޫލުގެ އިންޑިއާ ޓީޗަރުން ކަންބޮޑުވުން ފާޅު ކުރި ކަމަށާއި އެ ޓީޗަރުންނަަށް ރައްކާތެރިކަން ފޯރުކޮށްދޭން އެދިފައިވާ ކަމަށް އަހުމަދު އަލީ ވިދާޅުވިއެވެ.

"އޭގެ އިތުރުން އެހެން ބައެއް ރަށްރަށުގައި ވެސް އަޅުގަނޑުމެންނަށް ފާހަގަ ކުރެވޭ އިންޑިއާ ޓީޗަރުން މަގުމަތިން ހިނގައިފައި ދާއިރު އެ ބޭފުޅުންނާ ދިމާކޮށް، ރަށުން ފައިބައިގެން ދިޔުމަށް ބުނާކަން ވެސް" އެޑިއުކޭޝަން މިނިސްޓްރީގެ ޕީއެސް ވިދާޅުވިއެވެ.

މީގެ އިތުރުން އަހުމަދު އަލީ ވިދާޅުވީ، މިފަދަ ކަންކަން ހިނގަމުންދާކަން މިދިޔަ ޓާރމުގެ ފަހުކޮޅުން ފެށިގެން އެ މިނިސްޓްރީގެ ސަމާލުކަމަށް އައިސް، ޝަކުވާތައް ލިބެމުންދާ ކަމަށެވެ.

"އަޅުގަނޑުމެން ވަރަށް ކަންބޮޑުވާކަމެއް މިއީ. ހަގީގަތުގައި ޤައުމީ މަސައްކަތެއް ކުރައްވާ ބޭފުޅުންތަކެއް އެއީ. އެބޭފުޅުންނަކީ މި ޤައުމުގައި އަޅުގަނޑުމެންނަށް ދިވެހި ޓީޗަރުން ލިބުމަށް ދަތިވެގެން، އަަޅުގަނޑުމެންގެ ސްކޫލުތަކުގެ ދަރިވަރުންނަށް ކިޔަވައިދޭން އައިސްފައި ތިބި ބައެއް. އެ ބޭފުޅުންނާ އެގޮތަށް ދިމާކޮށް، އެބޭފުޅުން މަސައްކަތް ކުރާ ތަންތަނުގައި އެގޮތަށް ލިޔެ ހެދުމަކީ އެއްގޮތަކަށް ވެސް ކޮށްގެންވާނެ ކަމެއް ނޫން. އެކަން މި މިނިސްޓްރީން އެންމެ ހަރުކަށި އިބާރާތުން ކުށްވެރިކުރަން" އެޑިއުކޭޝަންގެ ޕީއެސް ވިދާޅުވިއެވެ.

އަހުމަދު އަލީ އިތުރަށް ވިދާޅުވީ، އެފަދަ އަމަލު ހިންގި ފަރާތްތަކާ މެދު ފިޔަވަޅު އަޅައިދިނުމަށް އެދި ރަސްމީކޮށް މިއަދު މޯލްޑިވްސް ޕޮލިސް ސާވިސަސްއަށް އެ މައްސަލަ ހުށަހަޅައިފައިވާނެ ކަމަށެވެ.