ޚުތުބާ: ރަސޫލާ (ޞޢވ)ގެ ހަޔާތްޕުޅުން އިބްރަތް ލިބި، ޅަ އުމުރުން ފެށިގެން މަސައްކަތް ކުރުމުގެ މުހިންމުކަން
އެންމެހައި ޙަމްދު ތައުރީފާއި ޘަނާ ޙައްޤު ވެގެން ވަނީ މަތިވެރި ﷲއަށެވެ. ފާފަ ފުއްސެވުމަށާއި، އެހީތެރިކަމަށާއި މަދަދަށް އެދެނީ އެކަލާނގެ ޙަޟްރަތުންނެވެ. އަދި ވަކީލު ކުރަނީ ވެސް ހަމަ އެކަލާނގެއަށެވެ. އަދި ﷲ މެނުވީ ޙައްޤުވެގެން އަޅުކަން ވެވޭ އެހެން އިލާހަކު ނުވާ ކަމަށާއި މުޙައްމަދު (ޞޢވ)އަކީ އެކަލާނގެ ފޮނުއްވި ރަސޫލާކަމަށް އަޅު ހެކިވަމެވެ. އެ މާތް ނަބިއްޔާއަށާއި އެކަލޭގެފާނުގެ އާލު އަސްޙާބުންނާއި، ޤިޔާމަތަށް ދާންދެން އެބޭކަލުންނަށް ތަބަޢަވީހައި ބަޔަކަށް ޞަލަވާތާއި، ސަލާމާއި، ބަރަކާތް ލައްވާށިއެވެ. އާމީން!
މިއަދުގެ ހުކުރު ޚުތުބާ ހާއްސަ ކޮށްފައި ވަނީ އިޖުތިމާއީ މަސައްކަތުގައި ދަރިން ބައިވެރި ކުރުމުގެ މައްޗަށެޗެ.
އެ ގޮތުން ޚުތުބާގައި ވަނީ، އިސްލާމްދީނުގައި މަސައްކަތްތެރިކަމަށް ދެއްވައިފައިވާ އަހައްމިއްޔަތުކަން ބޮޑުކަން ފާހަގަ ކުރައްވައިފައެވެ. އިސްލާމްދީން ގޮވައިލައްވަނީ މަސައްކަތް ނުކޮށް، ކަންނެތްވެފައި ނުތިބުމަށެވެ. މުރާލިކަމާ، ހީވާގިކަމާ އެކު ހުއްދަ މަސައްކަތްކޮށް ރިޒްޤު ހޯދައި އުޅުމަށް އިސްލާމްދީނުގައި ބާރު އަޅުއްވައި ގޮވައިލައްވައިފައިވެއެވެ. ހަމަ އެފަދައިން އިސްލާމް ދީން ގޮވައިލަނީ މަސައްކަތް ކޮށްގެން ތިމާގެ ދިރިއުޅުން ބިނާ ކުރުމަށެވެ.
މާތް ނަބިއްޔާ (ޞޢވ) ހަދީޘްކުރެއްވި ބަސްފުޅެއްގެ މާނައިގައިވެއެވެ.
އިންސާނާ ކައިފި އެންމެ ހަލާލު އެއްޗަކީ، އޭނާގެ މަސައްކަތުން ހޯދައިގެންފި އެއްޗެކެވެ.
ރަސޫލާ (ޞޢވ)އަކީ ހުރިހާ ކަމެއްގައި ވެސް މާތް ﷲ އަހަރެމެންނަށް ދެއްކެވި އެންމެ ފުރިހަމަ ނަމޫނާއެވެ. އެކަލޭގެފާނު ތުއްޕުޅުއިރުން ފެށިގެން މަސައްކަތްޕުޅު ކުރައްވައިފައިވެއެވެ. އަދި އެހެން މީހުންނަށް މަސައްކަތް ކޮށްދެއްވުމާއި، ވިޔަފާރީގެ މަސައްކަތުގައި ވެސް ބައިވެރިވެ ވަޑައިގެންފައިވެއެވެ. އަދި ގޭތެރޭގެ ބައެއް މަސައްކަތްތަކާއި، އަމިއްލަފުޅު ބައެއް މަސައްކަތްޕުޅުތަކުގެ އިތުރަށް، ޤައުމީ މަސައްކަތްތަކުގައި ވެސް އެކަލޭގެފާނު ބައިވެރިވެވަޑައިގެންނެވިއެވެ.
މިގޮތުން ރަސޫލާ (ޞޢވ) މަސްޖިދުލްނަބަވީ ބިނާ ކުރެއްވުމުގައި ހިލަ އުފުއްލެއްވުމާއި، ވެލި އުފުއްލެއްވުން ފަދަ ކަންކަމުގައި އަސްޙާބު ބޭކަލުންނާ އެކު މަސައްކަތް ކުރެއްވިއެވެ. އަދި އަޙުޒާބު ހަނގުރާމަ ފެށުމުގެ ކުރިން ޚަންދަގު ކޮންނެވުމުގެ މަސައްކަތުގައި، އެހެން މުސްލިމުންނެކޭ އެއްފަދައިން އެކަލޭގެފާނު ޢަމަލީގޮތުން ބައިވެރިވެވަޑައިގެންނެވިއެވެ.
ތިމާ ކުރާ ކޮންމެ ކަމެއް ވެސް ކުރަންވާނީ ވީ އެންމެ ރަނގަޅަކަށެވެ. އަދި އެކަމެއް ކުރަން އޮތް އެންމެ ފުރިހަމަ ގޮތަށެވެ. އޭރުން އެމީހަކު ދެކެ މާތް ﷲ ލޯބިވެވޮޑިގަންނަވާނެއެވެ. އަދި މީސްތަކުންގެ މެދުގައި އޮންނަ ލޯތްބާއި އިތުބާރު ބޮޑުވެގެންދާނެއެވެ.
ކަން މިހެން އޮތް ނަމަވެސް މުޖުތަމައުގެ ތެރެއިން ގިނައިން ފެންނަމުން ދަނީ، މިއާ ޚިލާފު ގޮތްތަކެވެ. ކުރާ މަސައްކަތުގައި ފަރުވާތެރިކަމެއް، ތެދުވެރިކަމެއް ނެތި، ހަމައެކަނި ފައިސާގެ ދަހިވެތިކަމުގައި، ފަރުވާކުޑަކޮށް، އެ މަސައްކަތެއް ކުރުމުގެ ސަބަބުން ވެރިފަރާތަށް ބަރުދާސްތު ނުކުރެވޭފަދަ ބޮޑެތި ގެއްލުން ލިބެމުންދާތަނެވެ.
މިއީ ރަސޫލާ (ޞޢވ)އަށް ތަބާޢަވެގެން ތިބި މުސްލިމު މުޖުތަމައުއެއްގައި ހިނގައިގެންވާނެ ކަންތައްތަކެއް ނޫނެވެ. މީގެ ސަބަބުން އެންމެންނަށް ލިބޭނީ ގެއްލުމާއި ހަލާކެވެ. މިހެންކަމުން މަކަރެއް، ހީލަތެއް ނެތި، ތެދުވެރިކަމާއެކު އެންމެންވެސް މަސައްކަތް ކުރާށެވެ!
ރަސޫލާ (ޞޢވ) ހަދީޘްކުރެއްވި ބަސްފުޅެއްގެ މާނައިގައިވެއެވެ.
އަހަރުމެންނަށް މަކަރު ހަދައިފި މީހަކީ އަހަރުމެންގެ ތެރެއިންވާ މީހެއް ނޫނެވެ!
މުޖުތަމައުގެ ތެރެއިން މިފަދަ ނުބައި ވިހަ އަސަރުތައް ފިލައިގެންދާނީ، މުސްލިމުންގެ ޅަދަރީންނާއި، ޒުވާނުންގެ މެދުގައި މަސައްކަތްތެރިކަމާއި، މަސައްކަތްތެރިކަމުގެ އޮށް އިންދިގެންނެވެ. އޭތުން އެ އޮށްތަކުން ފަޅައިގެން ހެދި ބޮޑުވަމުންދާ ގަސްތަކުން މުޅި މުޖުތަމަޢު ފެހިވުމަށް ފަހު، ނުބައި ވިހަ އަސަރުތައް މުޖުތަމައުގެ ތެރެއިން ފިލައިގެން ހިނގައިދާނެއެވެ.
