ކޮވިޑް ބަލިން ފަސޭހަވެ ރައީސް ޞާލިޙް އެނބުރި މަސައްކަތަށް
ކޮވިޑް-19ގެ އާލާސްކަންފުޅު ޖެހިވަޑައިގެންނެވިތާ ނުވަ ދުވަސް ފަހުން، ރައީސް އިބްރާހީމް މުހައްމަދު ޞާލިހު އެމަނިކުފާނުގެ މަސަައްކަތްޕުޅަށް އެނބުރިވަޑައިގެންފިއެވެ.
ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒު ވަނީ މިކަން ކަށަވަރު ކޮށްދެއްވައިފައެވެ. މަބްރޫކް ވިދާޅުވީ ރައީސް ކޮވިޑް ބަލިން ފަސޭހަވެ، މަަސައްކަތްޕުޅު އަލުން ފައްޓަވައިފައިވާ ކަމަށެވެ.
ރައީސް ޞާލިހު ކޮވިޑަށް ފައްސިވިކަން ހާމަކުރެއްވީ މިމަހުގެ 21ވަނަ ދުވަހުއެވެ. އެމަނިކުފާނު ބައްޔަށް ޓެސްޓު ކުރެއްވީ ށ.ކޮމަންޑޫ ދާއިރާއަށް ވަޑައިގަތުމަށާއި، ރ.އަލިފުށީގައި މިމަހުގެ 23ވަނަ ދުވަހު ބޭއްވި ޕްރެޒިޑެންސްޓް ކަޕު ބައްލަވައިލެއްވުމަށް އެރަށަށް ވަޑައިގެންނެވުމުގެ ކުރިންނެވެ.
ރައީސް ޞާލިހު ކޮވިޑަށް ފައްސިވީއިރު، އެމަނިކުފާނުގެ އަނބިކަނބަލުން ފަޒްނާ އަހުމަދާއި، ހެރިޓޭޖް މިނިސްޓަރު ޔުމްނާ މައުމޫން ވެސް މިބައްޔަށް ފައްސިވެފައި ވެއެވެ.
