ބޯހިޔާވަހިކަމާ ގުޅޭގޮތުން ރައީސް ދެއްކެވި ވާހަކައިން އުއްމީދެއް ނުލިބޭ: މުއިއްޒު
މާލޭ ރައްޔިތުންނަށް ދިމާވެފައިވާ ގޯތިގެދޮރުގެ މައްސަލަ ޙައްލުކުރުމާ ގުޅޭގޮތުން ރިޔާސީ ބަޔާނުގައި ރައީސުލްޖުމްހޫރިއްޔާ ދެއްކެވި ވާހަކަފުޅުން ފަނޑު އުންމީދެއް ވެސް ނުލިބޭ ކަމަށް މާލޭ ސިޓީގެ މޭޔަރު ޑރ. މުޙައްމަދު މުޢިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ މިއަހަރަށް ރައްޔިތުންގެ މަޖިލީސް ހުޅުވުމަށް ބޭއްވި ޖަލްސާގައި ރައީސުލްޖުމްހޫރިއްޔާ ދެއްވި ރިޔާސީ ބަޔާނުގައި މާލޭ ރައްޔިތުންގެ ގޯތިގެދޮރުގެ މައްސަލައާ ގުޅޭގޮތުން ދެއްކެވި ވާހަކަފުޅާ ގުޅޭގޮތުން އޮންލައިން ނޫސް “ވޮއިސް އިން ދެންނެވި ސުވާލަކަށް ދެއްވި ޖަވާބުގައެވެ.
ރިޔާސީ ބަޔާނުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަނީ މާލޭ ރައްޔިތުންނަށް ގޯތި ދިނުމަށް ނިންމަވައިފައިވާކަން އިޢުލާން ކުރައްވައިފައެވެ.
އެގޮތުން މާލޭ ރައްޔިތުންނަށް ހުޅުމާލެއިން މަދުވެގެން 1،000 ގޯއްޗާއި ގުޅިފަޅުން މަދުވެގެން 2،000 ގޯތި ދެއްވާނެ ކަމަށް ވިދާޅުވިއެވެ.
ރައީސްގެ ރިޔާސީ ބަޔާނާ ގުޅިގެން މާލޭ ސިޓީގެ މޭޔަރު ޑރ. މުޙައްމަދު މުޢިއްޒު ކުރެއްވި ޓުވީޓެއްގައި ވިދާޅުވީ މާލޭ ރަށްވެހިންނަށް ޙައްޤު މިންވަރަކީ އެންމެ ދެތިންހާސް ގޯއްޗާއި ހައެއްކަހާސް ފްލެޓު ނޫން ކަމަށެވެ.
ހުޅުމާލެއިން މަދުވެގެން 4،000 ގޯތި ދެވެން އެބައޮތް ކަމަށާއި ގުޅިފަޅުން މަދުވެގެން 10،000 ގޯތި ދެވެން އެބައޮތް ކަމަށާއި އަދި ހުޅުމާލެއިން 15،000 ފްލެޓާއި، ގުޅިފަޅުން 25،000 ފުލެޓު ދެވެން އެބައޮތް ކަމަށް ވެސް ރައީސް ޞާލިޙް ވިދާޅުވެފައި ވެއެވެ.
މިކަމާ ގުޅޭގޮތުން އޮންލައިން ނޫސް “ވޮއިސް”އަށް މޭޔަރު މުޢިއްޒު ވިދާޅުވީ މާލޭގެ އާދައިގެ ރައްޔިތުންނަކީ ގެދޮރުގެ ދަތިކަން އިންތިހާއަށް ބޮޑުވެ، އެކަމުގެ ތަކުލީފުތަކުގައި އުޅޭތާ އެތައް ދުވަހެއް ވެފައިވާ ބައެއް ކަމަަށެވެ.
ނަމަވެސް ރައީސްގެ ވާހަކަފުޅުން ކަމުގެ ސީރިއަސްކަން ނުފެންނަ ކަމަށާއި ރައްޔިތުންގެ އެންމެ ހައްސާސް މައްސަލައިގައި ރައްޔިތުންގެ އުދާސްތަކާއި ނުތަނަވަސްކަމަށް އެއްގޮތަކަށް ވެސް ޖަވާބު ނުދެވުނު ކަމަށް ވިދާޅުވިއެވެ.
