ސަރުކާރުން ޝަންގްރިއްލާ ރިސޯޓްގެ ހިއްސާ ދޫކޮށްލަނީ
އައްޑޫ ސިޓީގެ ޝަންގްރިއްލާ ރިސޯޓްގެ ހިއްސާ ދޫކޮށްލަން ސަރުކާރުން ނިންމައިފިއެވެ.
މިކަން ހާމަކުރެއްވީ ރައްޔިތުންގެ މަޖިލީހުގެ މިއަދުގެ ޖަލްސާގައި ޓުއަރިޒަމް މިނިސްޓަރު ޑރ.މައުސޫމެވެ.
ކޮވިޑް-19ގެ ބަލިމަޑުކަން ފެށުނުއިރު ބަންދުކުރި ގޮތަށް މިއަދާ ހަމައަށް ވެސް ޝަންގްރިއްލާ ނުހުޅުވި ވާތީއާއި މިކަމުގެ ސަބަބުން އައްޑޫގެ ގިނަ ބައެއްގެ ވަޒީފާ ގެއްލިފައި ވާތީ، މި ރިސޯޓް ހުޅުވޭނެ ތާރީހަކާ ގުޅޭ ގޮތުން އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ކުރެއްވި ސުވާލަށް ޖަވާބު ދެއްވަމުން މިނިސްޓަރު ވިދާޅުވީ 204 އެނދުގެ ޝަންގްރިއްލާ ރިސޯޓްގައި ސަރުކާރުގެ 30 އިންސައްތަ ހިއްސާ އޮންނައިރު، އައްޑޫ އިންވެސްޓްމަންޓް ޕްރައިވެޓް ލިމިޓެޑާ އެކު ވެފައިވާ އެއްބަސްވުމުގެ ދަށުން، ރިސޯޓަށް ގެއްލުންވާ ހާލަތުގައި ލޮސް ފައިނޭންސް ކުރުމަށްދޭ ލޯނުގައި ސަރުކާރުން ބައިވެރިވާން ޖެހޭ ކަމަށެވެ.
އެގޮތުން 68 މިލިއަން ޑޮލަރު ލޯނު ފައިނޭންސިންގެ ގޮތުގައި އެ ކުންފުންޏަށް ދައްކަން ޖެހޭ ކަމަށާއި، ހިއްސާ އޮވެމެ، ދައުލަތަށް އެއްޗެއް ނުލިބުމަކީ ހިއްސާ ދޫކޮށްލަން ބޭނުންވާ ސަބަބު ކަމަށް ވެސް މައުސޫމް ވިދާޅުވިއެވެ.
"30 ޕަސެންޓް ހިއްސާ އޮވެެމެ، ދައުލަތަށް އެއްޗެއް ނުލިބި އެހައި ގިނަ ދުވަސްވީމަ، ދައުލަތުން ވެސް ބޮޑަށް ބޭނުންވަނީ އެ ހިއްސާ އެބޭފުޅުންނަށް ދޫކޮށްލައިފައި، މިކަމައިގެން ކުރިއަށް ދެވޭނެ ގޮތެއް ހޯދަން." މައުސޫމް ވިދާޅުވިއެވެ.
ޓޫރިޒަމް ގާނޫނަށް ގެނައި 10 ވަނަ އިސްލާހުގެ އަލީގައި އެ 30 އިންސައްތައިގެ ހިއްސާ ބަދަލު ކުރެވެން އޮތްއިރު، މިނިސްޓަރު ވިދާޅުވީ މިކަމަށް އޮތް ހުރަހަކަށްވީ، އެރަށް ބޮޑުވުމުން، ހިއްސާ ބަދަލު ކުރުމަށް 80 މިލިއަން ރުފިޔާ ހަރަދުވާނެތީ ކަމަށެވެ.
އެހެންކަމުން މިކަމަށް މަގުފަހި ކުރުމުގެ ގޮތުން، ޓޫރިޒަމްގެ ގާނޫނަށް 11ވަނަ އިސްލާހެއް ގެނައުމަށް ޑްރާފްޓްކޮށްފައިވާ އިރު، އެ އިސްލާހުގެ ދަށުން 30 އިންސައްތައިގެ ހިއްސާ އައްޑޫ އިންވެސްޓްމެންޓް ޕްރައިވެޓް ލިމިޓެޑަށް ގަނެވޭނެ ގޮތް ވާނެ ކަމަށް އުއްމީދު ކުރައްވާ ކަމަށް މައުސޫމް ވިދާޅުވިއެވެ.
މިނިސްޓަރު ވިދާޅުވީ ޝަންގްރިއްލާ ރިސޯޓް ވީހާވެސް އަވަހަށް ހުޅުވޭނެ ގޮތް ހެދުމަށް ފިނޭންސް މިނިސްޓްރީއާއި، އަަައްޑޫ އިންވެސްޓްމަންޓް ޕްރައިވެޓް ލިމިޓެޑާ ދެމެދު ވާހަކަ ދެކެވެމުން އަންނަ ކަމަށެވެ.
ނަމަވެސް ރިސޯޓްގެ ބައެއް މަރާމާތުތައް ކުރަން ޖެހޭތީ، އެތަން ހުޅުވޭނެ ތާރީހެއް ދަންނަވަން އެނގިވަޑައިނުގަންނަވާ ކަމަށާއި، އުއްމީދަކީ މިއަހަރު ނިމުމުގެ ކުރިން ރިސޯޓް ހުޅުވިގެން ދިޔުން ކަމަށް ވެސް މިނިސްޓަރު ވިދާޅުވިއެވެ.
