ރައީސް ޔާމީންގެ ޝަރީއަތް: އަޑުއެހުންތައް މަޑުޖައްސައިލާން އެދިވަޑައިގެންފި
އިދިކޮޅު ލީޑަރ އަދި ކުރީގެ ރައީސް ، ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް ދައުލަތުން އުފުލައިފައިވާ ދައުވާތަކާ ގުޅިގެން ކުރިއަށް ގެންދާ އަޑުއެހުންތައް ލައިވް ކުރެވޭނެ އިންތިޒާމު ހަމަޖެހެންދެން، އެ މައްސަލައިގެ އަޑުއެހުންތައް މަޑުޖައްސައި ދިނުމަށް މިއަދު ވެސް އެދިވަޑައިގެންފިއެވެ.
ކްރިމިނަލް ކޯޓުގައި މިއަދު ހެނދުނަށް ތާވަލުކޮށް، ކުރިއަށް ގެންގޮސްފައި ވަނީ ވ. އާރަށް ކުއްޔަށް ދޫކުރުމުގެ މައްސަލައިގައި ރައީސް ޔާމީން ރިޝްވަތު ބޭނުން ކުރެއްވި ކުށުގެ ދައުވާއާއި މަނީ ލޯންޑަރިންގެ ކުށުގެ ދައުވާގެ އަޑުއެހުމެކެވެ.
އަޑުއެހުންތައް މަޑުޖައްސައި ދިނުމަށް ކޯޓުގައި ރައީސް ޔާމީންގެ ފަރާތްޕުޅުން އެދިވަޑައިގަތް ނަމަވެސް، މިކަމާ ގުޅިގެން އިސް ގާޒީ އަހުމަދު ޝަކީލް އެއްވެސް އެއްޗެއް ވިދާޅެއް ނުވެއެވެ.
ރައީސް ޔާމީންގެ ޝަރީއަތްތައް ލައިވް ކޮށްދެއްވުމަށް ކުރިން އެދިވަޑައިގަތުން ގާޒީ ޝަކީލް ވިދާޅުވީ، ޝަރީއަތްތައް ލައިވް ކުރެވޭނެ އިންތިޒާމު މި ވަގުތު ކޯޓުގައި ނެތް ކަމަށާއި އެއީ އަޑުއެހުންތައް މަޑުޖައްސައިލެވޭނެ ސަބަބެއް ނޫން ކަމަށެވެ.
ރައީސް ޔާމީންގެ ޝަރީއަތްތައް ލައިވްކޮށްދިނުމަށް މީގެ ކުރިން ވެސް އެތައް ފަހަރެއްގެ މަތިން އެދިވަޑައިގަތުމުގެ އިތުރުން، އެ މަނިކުފާނުގެ ފަރާތްޕުޅުން ވަނީ، ލައިވް ކުރެވޭނެ ވަސީލަތްތައް ކޯޓުގައި ނެތް ނަމަ އަމިއްލަ ފަރާތްތައް މެދުވެރިކޮށް ލައިވްކޮށްދިނުމަށް ވެސް އެދިވަޑައިގެންފައެވެ. ނަމަވެސް އެކަމާ ގޮތެއް ނިންމާނީ ގާޒީންގެ މަޖިލީހުން ކަމަށް މީގެ ކުރީގެ އަޑުއެހުމެއްގައި ގާޒީ ވަނީ ވިދާޅުވެފައެވެ.
މި މައްސަލައިގައި ދައުވާ ލިބޭ ޔޫސުފް ނައީމް ވަނީ، މި ދައުވާއަށް މިއަދުގެ އަޑުއެހުމުގައި އިންކާރުކޮށްފައެވެ.
ޔޫސުފް ނައީމްއަށް ދައުލަތުން ކޮށްފައިވާ ދައުވާގައި ބުނެފައި ވަނީ، އޭނާ މިނިސްޓްރީ އޮފް ޓޫރިޒަމް އާއި މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ) މެދުވެރިކޮށް ރިސޯޓެއް ހެދުމަށް އާރަށް ކުއްޔަށް ނެގުމުގެ މުއާމަލާތުގެ ތެރެއިން އޭރުގެ ރައީސުލްޖުމްހޫރިއްޔާގެ ހައިސިއްޔަތުން ރައީސް ޔާމީން މަގާމުގެ ނުފޫޒު ބޭނުންކުރައްވައިގެން ރިޝްވަތުގެ ގޮތުގައި އެއް މިލިއަން ޔޫއެސް ޑޮލަރު ނަންގަވައި ލޯންޑާ ކުރައްވައިފައިވާ ކަމަށެވެ.
ނަމަވެސް މިއަދުގެ އަޑުއެހުމުގައި އޭނާ ބުނެފައި ވަނީ، އެ ދައުވާ ބިނާކޮށްފައި ވަނީ އެއްވެސް އަސްލެއް ނެތް މުއާމަލާތްތަކެއްގެ މައްޗަށް ކަމަށެވެ. ޔޫސުފް ނައީމްގެ ދިފާއުގައި ހެކި ހުށަހެޅުމަށް ދައުލަތުން މިއަދު ވަނީ 30 ދުވަހުގެ މުއްދަތެއް ދީފައެވެ.
