ޔޫކްރެއިންގައި ވަރުގަދަ ހަމަލާ ބަދަލުކުރުންތަކެއް
ޔޫކްރެއިންގައި މިހާރު އޮތް ސަރުކާރާ ދެކޮޅަށް ހަރަކާތްތެރިވާ ހަނގުރާމަވެރި ޖަމާއަތްތަކާ ދެކޮޅަށް އެގައުމުގެ އަސްކަރިއްޔާއިން ވަރުގަދަ ހަމަލާތަކެއް ދީފިއެވެ.
ޔޫކްރެއިންގެ ހަނގުރާމަވެރި ޖަމާއަތްތަކުން އެގައުމުން ވަކިވެ، ވަކި ދައުލަތެއް އުފެއްދުމަށް މަސައްކަތް ކުރަމުންދާތާ ދުވަސްތަކެއް ވެއްޖެއެވެ. މިޖަމާއަތްތަކަށް ރަޝިޔާއިން ވާގިވެރިވާކަމުގެ ތުހުމަތު ކުރެވުނު ނަމަވެސް ރަޝިޔާ ސަރުކާރުން ބުނެފައި ވަނީ އެ ޖަމާއަތްތަކާ ގުޅެނީ ސަރުކާރުން އަންގައިގެން ނޫން ކަމަށެވެ. އެހެން ނަމަވެސް ވޮލަންޓިއަރުންގެ ގޮތުގައި ރަޝިޔާގެ ބައެއް ފަރާތްތައް ގުޅޭކަން ސަރުކާރުން ވެސް ފާހަގަކޮށްފައިވެއެވެ.
ވޭތުވެ ދިޔަ 24 ގަޑިއިރުގެ ތެރޭގައި ޔޫކްރެއިންގެ ހަނގުރާމަވެރި ޖަމާއަތްތަކާ ދެކޮޅަށް ހަތަރު ފަހަރެއްގެ މަތިން ވަރުގަދަ ހަމަލާތަކެއް ދީފައިވާކަމަށް ޖަމާއަތްތަކުން ވަނީ ބުނެފައެވެ. ހަމަލާތަކުގައި ސީދާ ލިބުނު ގެއްލުންތައް ދެނެގަތުމުގެ މަސައްކަތް ކުރަމުން ދާކަމަށް ވެސް އެމީހުން ބުނެއެވެ.
ޖުމްލަ ފަސް ޕްރޮވިންސެއް އޮންނަ އިރުމަތީ ޔޫކްރެއިންގެ ކާކިވްއާއި ރަޝިޔާއާ ގުޅޭ ބޯޑަރު ސަރަހައްދަށް، މީގެ ކުޑަ ދުވަސްކޮޅެއް ކުރިން ރަޝިޔާގެ އަސްކަރިއްޔާއިން ހަތިޔާރާ އެކު ޖަމާވިއެވެ. ރަޝިޔާއިން ބުނެފައި ވަނީ އެއީ އަސްކަރީ ތަމްރީނުތަކެއް ކަމަށެވެ. އެހެން ނަމަވެސް ހުޅަނގުގެ ގައުމުތަކާއި އެމެރިކާއިން ބުނަމުންދަނީ ރަޝިޔާއިން ޔޫކްރެއިން ހިފަން މަސައްކަތްކުރަނީ ކަމަށެވެ.
ރިޕަބްލިކް އޮފް ލުހާންސްކް ގެ ނަމުގައި ވަކި ދައުލަތެއް އުފެއްދުމަށް މަސައްކަތް ކުރާ ޔޫކްރެއިންގެ ޖަމާއަތްތަކުން އެގައުމުގެ ސަރުކާރާއި ދެކޮޅަށް ހަރަކާތްތެރިވާން ފެށީ ޔޫކްރެއިންއިން ދިފާއީ ޖަމިއްޔާއެއްކަމަށްވާ ނޭޓޯއާ ގުޅެން ހުޅަނގާއި އެމެރިކާގެ ވާގި ހޯދަން މަސައްކަތް ކުރަމުންދާތީއެވެ. އިރުމަތީ ޔޫކްރެއިންގައި ދިރިއުޅެނީ ރަޝިޔާ ނަސްލުގެ މީހުންނެވެ. އެމީހުން ވާހަކަ ދައްކަނީ ވެސް ރަޝިޔާ ބަހުންނެވެ.
ޔޫކްރެއިންގެ އަސްކަރިއްޔާއާއި ހަނގުރާމަވެރި ޖަމާއަތްތަކާ ދެމެދު ހަމަލާ ބަދަލުކުރުންތައް ކުރިއަށް ދާތާ ދުވަސްތަކެއް ވެއްޖެއެވެ. މިހައިތަނަށް އައިއިރު މި ހަމަލާތަކުގައި 15،000އަށް ވުރެ ގިނަ މީހުން ވަނީ މަރުވެފައެވެ.
