"ވިޔަފާރިވެރިންގެ ޕާސްޕޯޓް ހިފެހެއްޓުމަކީ އެމީހުންގެ މުދަލާއި ފުރާނަ ހިފެހެއްޓުން"
ސަން ކުންފުނީގެ ވެރިޔާ އަދި ރައްޔިތުންގެ މަޖިލީހުގެ ދ. މީދޫ ދާއިރާގެ މެންބަރު އަހުމަދު ސިޔާމްގެ ޕާސްޕޯޓު ދޫކޮށްލަށް ކާށިދޫ ދާއިރާގެ މެންބަރު ޢަބްދުﷲ ޖާބިރު ގޮވައިލައްވައިފިއެވެ.
ސިވިލް ކޯޓުން މެންބަރު ސިޔާމްގެ ޕާސްޕޯޓް ހިފަހައްޓައިފައި މިވަނީ ނ.އަތޮޅުގައި ހިންގަމުން އަންނަ އިރުފުށި، ހިލްޓަން އިންޓަނޭޝަނަލްއާ ހަވާލުކުރި އެއްބަސްވުން ބާތިލްކުރި މައްސަލައިގައި ސަން ޓްރެވެލްއިން ހިލްޓަންއަށް ދައްކަން ޖެހޭ 28 މިލިއަނަށް ވުރެ ގިނަ ޑޮލަރު ނުދެއްކި މައްސަލައިގައެވެ.
ފެނާއި ނަރުދަމާގެ ގާނޫނަށް އިސްލާހު ގެނައުމަށް ރައްޔިތުންގެ މަޖިލީހުގައި މިއަދު ކުރިއަށް ދިޔަ ބަހުސްގައި ވާހަކަ ދައްކަވަމުން ޖާބިރު ވިދާޅުވީ އިންސާނާގެ ޕާސްޕޯޓަކީ އެމީހެއްގެ އައިޑެންޓީޓީ ކަމަށާއި އަދި ވިޔަފާރިވެރިންގެ ޕާސްޕޯޓް ހިފެހެއްޓުމަކީ އެ މީހުންގެ މުދަލާއި ފުރާނަ ހިފެހެއްޓުން ކަަމަށެވެ.
ވިޔަފާރިވެރިންގެ މުދާ ހިފެހެއްޓުމަށް ފަނޑިޔާރުން ހުކުމް ކުރުމަކީ މައްސަލައެއް ކަމަށް ސިފަކުރައްވަމުން ޖާބިރު ވިދާޅުވީ އެކަން ހިނގަމުންދަނީ ކުރީގެ ރައީސް މައުމޫން އަބްދުލްގައްޔޫމްގެ ޒަމާނުގައި ހަދައިފައިވާ އިޖުރާތްތަކުގެ ސަބަބުން ކަމަށެވެ.
"ފިލައިފާނެކަމުގެ ބިރަށް ސިޔާމްގެ ޕާސްޕޯޓު ހިފެހެއްޓީ. ސިޔާމަކީ މި ރާއްޖޭގައި އޭނާގެ ވޯލްޑް (ހަދައިގެން އުޅޭއިރު) ކޮންތާކަަށްތޯ ފިލައިގެން ދާނީ. އޭނާ އުޅެނީ މި ވޯލްޑްގައި ނޫންތޯ. މި ވޯލްޑްގައި އޭނާގެ ޕާސްޕޯޓް ކެންސަލްކޮށްގެން ނުވާނެ. ޖާބިރުގެ ޕާސްޕޯޓް، ރައީސް ނަޝީދުގެ ޕާސްޕޯޓް ކެންސަލްކޮށްގެން ނުވާނެ" ޖާބިރު ވިދާޅުވިއެވެ.
ސިޔާމްގެ އިތުރުން އޭނާގެ ކުރީގެ އަނބިކަނބަލުން އަދި ސަން ޓްރެވެލްގެ ޑިރެކްޓަރު އައިޝަތު ފާއިޒްގެ ޕާސްޕޯޓް ވެސް ވަގުތުން ވަގުތަށް ދޫކޮށްލަން މިއަދުގެ މަޖިލީހުގައި ޖާބިރު ގޮވައިލެއްވިއެވެ.
