ފަނަރަ ރަށެއްގެ ކަރަންޓު ވިޔުގަ އަޕްގްރޭޑު ކޮށްދޭނެ ފަރާތެއް ހޯދަނީ
ދިވެހިރާއްޖޭގެ 15 ރަށެއްގެ ކަރަންޓު ވިޔުގަ އަފްގްރޭޑުކޮށް، ޒަމާނީ ފެންވަރަށް ތަރައްގީކުރާނެ ފަރާތެއް ހޯދުމަށް މިނިސްޓްރީ އޮފް އެންވަޔަރްމަންޓް، ކްލައިމެޓް ޗޭންޖު އެންޑް ޓެކްނޮލޮޖީއިން އިއުލާނު ކުރައްވައިފިއެވެ.
އެ މިނިސްޓްރީގެ އިއުލާނުގައިވާގޮތުން، މި މަޝްރޫއު ކުރިއަށް ގެންދިޔުމަށް ހަމަޖެހިފައި ވަނީ ވޯލްޑްބޭންކުގެ އެހީގައި މިނިސްޓްރީން ހިންގާ "އެރައިސް ޕްރޮޖެކްޓް"ގެ ދަށުންނެވެ.
މަޝްރޫއު ނިމުމުން، މިހާރު ގާއިމުކޮށްފައިވާ ޑިސްޓްރިބިއުޝަން ނެޓްވޯކްގެ ކޭބަލް އަޕްގްރޭޑް ކުރެވިގެންދާނެ ކަމަށް އެންވަޔަރްމަންޓް މިނިސްޓްރީން ވިދާޅުވެއެވެ.
މިނިސްޓްރީން ވިދާޅުވީ މި މަޝްރޫއުގެ ދަށުން ރަށްރަށުން އަލަށް ހިއްކައިފައިވާ ސަރަހައްދުތަކާއި މީހުން އަލަށް އާބާދުވާ އެނޫން ވެސް ސަރަހައްދުތަކަށް ކަރަންޓް ނެޓްވޯކް ފުޅާ ކުރެވޭނެ ކަމަށެވެ.
އެރައިސް މަޝްރޫއުގެ ދަށުން ކަރަންޓު ވިޔުގަ އަޕްގްރޭޑު ކުރާ ރަށްތައް:
އައްޑޫ ސިޓީގެ ގުޅިފައިވާ ރަށްތައް
އައްޑޫ ހުޅުމީދޫ
ފުވައްމުލައް ސިޓީ
ކުޅުދުއްފުށި ސިޓީ
ގދ.ތިނަދޫ
ބ.އޭދަފުށި
ޅ.ހިންނަވަރު
ށ.ފުނަދޫ
ލ.ފޮނަދޫ
ލ.އިސްދޫ
ލ.ކަޅައިދޫ
ލ.ދަނބިދޫ
ލ.މާބައިދޫ
ލ.ކުނަހަންދޫ
ލ.ހިތަދޫ
މި މަޝްރޫއުގެ ދަށުން، ދުވަސްވެފައިވާ ޓްރާންސްފޯމަރުތައް ބަދަލު ކުރުމާއި، ނެޓްވޯކްގެ ޓްރާންސްމިޝަން ކެޕޭސިޓީ އިތުރު ކުރުމަށް އައު ސަބްސްޓޭޝަނެއް ވެސް ގާއިމު ކުރާނެ ކަމަށް އެންވަޔަރްމަންޓް މިނިސްޓްރީން ވިދާޅުވެއެވެ.
Ads by STO
