ހުކުރު ދުވަހުގެ އިދިކޮޅު އެއްވުމުގައި ކުށްކުރާ ގްރޫޕުތައް ބައިވެރި ކުރުމަށް ދަނީ ރާވަމުން: ފުލުހުން
އިދިކޮޅު ފަރާތްތަކުން އިސްނަގައިގެން އަންނަ ހުކުރު ދުވަހުގެ ހަވީރު މާލޭގައި ބޭއްވުމަށް ނިންމައިފައިވާ ހަރަކާތުގައި، ކުށްކުރާ ގްރޫޕުތައް ބައިވެރިކުރަން ރާވަމުންދާ ކަމަށް ފުލުހުން ވިދާޅުވެއްޖެއެވެ.
ރާއްޖޭގައި ތިބި އިންޑިއާ ސިފައިން ބޭލުމަށް ޓަކައި އިދިކޮޅު ޕްރޮގްރެސިވް ކޯލިޝަނުން އިސްނަގައިގެން މި މަހުގެ 25ވާ ހުކުރު ދުވަހު އެއްވުމެއް ބޭއްވުމަށް ވަނީ ނިންމައިފައެވެ.
އެކަމާ ގުޅޭގޮތުން ފުލުހުން މިއަދު ނެރުއްވި ބަޔާނެއްގައި ވިދާޅުވެފައި ވަނީ އެ ދުވަހުގެ ހަވީރު 4:00އިން އިރުއޮއްސި 6:00އަށް މާލޭގެ މަގުތަކާއި، ޕާޓީ އޮފީސް ސަރަހައްދާއި، ކާނިވާ ސަރަހައްދާއި، ރަސްފަންނު ސަރަހައްދާއި، ބޮޑުތަކުރުފާނުމަގާއި، މާލޭ ދެކުނު ފަރާތު އުސްފަސްގަނޑު ސަރަހައްދުގައި ޕީޕީއެމްއިން ބޭއްވުމަށް ރާވައިފައިވާ އެއްވުމަކީ ސުލްހަވެރިކަމާ އެކު އެއްވެ އުޅުމުގެ މިނިވަންކަމުގެ ގާނޫނާ އެއްގޮތަށް ބާއްވާ އެއްވުމެއް ނޫންކަމަށް ބެލެވޭ ތަފާތު ސަބަބުތައް ފެންނަން ހުރުމާއި މިފަދަ އެއްވުމުގެ ސަބަބުން އާންމު ސަލާމަތާއި ރައްކާތެރިކަމަށް ބުރޫ އެރުމުގެ ފުރުސަތު ބޮޑުވުމުގެ ސަބަބުން، މި އެއްވުން ނުބޭއްވުމަށް ފުލުހުން އެ ޕާޓީއަށް އަންގަވައިފައިވާ ކަމަށެވެ.
ފުލުހުން އިތުރަށް ވިދާޅުވީ، މި އެއްވުމުގައި ބައިވެރިވުމަށް ރަށްރަށުން މީހުން ގެންނަގޮތަށް ހަމަޖެހިފައިވާ ކަމަށް މައުލޫމާތު ލިބިފައިވާ ކަމަށެވެ. އަދި ގިނަ އަދަދެއްގެ ދުއްވާ އެއްޗެހި ބޭނުން ކޮށްގެން މާލެގެ ބޮޑެތި މަގުތައް ބްލޮކްކޮށް ރައްޔިތުންނާއި އާންމު ދަތުރުފަތުރާއި ހިދުމަތްތަކަށް ހުރަސް އެޅޭގޮތަށް ކަންތައްތައް ކުރުމަށް ރޭވުމާއި، މާލޭގައި އުޅޭ ކުށްކުރާ ގްރޫޕުތައް ހޯދައި އެ އެއްވުމުގައި ބައިވެރި ކުރުމަށާއި އެއްވުމުގެ ސަލާމަތީ ކަންކަން ބެލެހެއްޓުމަށް ދަތިކުރުމުގެ ގޮތުން އެއްވަގުތެއްގައި އެކި ސަރަހައްދުތަކަށް ބައިބަޔަށް މީހުން ނުކުތުމަށް އިންތިޒާމު ކުރާ ފަރާތުން ރާވަމުންދާކަމުގެ މައުލޫމާތު ލިބިފައިވާ ކަމަށް ވެސް ފުލުހުން ވިދާޅުވެފައިވެއެވެ.
ފުލުހުން ވިދާޅުވީ، މި އެއްވުމަކީ ސުލްހަވެރިކަމާ އެކު އެއްވެ އުޅުމުގެ ގާނޫނުގެ ދަށުން ބާއްވާ އެއްވުމަކަށް ނުވާތީ މި އެއްވުން ނުބޭއްވުމަށް އިދިކޮޅު ފަރާތްތަކަށް އެންގުމާ އެކު، މި އެއްވުމުގައި އެއްވެސް ފަރާތަކުން ބައިވެރި ނުވުމަށް ވެސް އިލްތިމާސް ކުރައްވައި ކަމަށެވެ. އަދި ގާނޫނާ ހިލާފަށް އެއްވުން ބޭއްވިޔަ ނުދޭނެ ކަމަށާއި މި އެއްވުމުގައި ބައިވެރިވެ، ގާނޫނާ ހިލާފު އަމަލުތަކަށް މަގުފަހި ކުރުވާ ކަމަށް ތުހުމަތު ކުރުވާ އެއްގަމު އުޅަނދާއި ކަނޑު އުޅަނދު ބަލައި ފާސް ކުރާނެ ކަމަށާއި އަދި މިފަދަ އެއްވުމެއް ބާއްވައިފި ނަމަ، އެއްވުން ރޫޅައިލައި، ގާނޫނާ ހިލާފުވާ ފަރާތްތަކާ މެދު ގާނޫނީ އިމުގެ ތެރެއިން އަޅަން ޖެހޭ ފިޔަވަޅު އަޅާނެ ކަމަށް ވެސް ފުލުހުން ވިދާޅުވެފައިވެއެވެ.
މިހާރު މިގައުމުގާ މިއޮތް ސަރުކާރުން ކުރީގާ ގޮވީ މަސްތުވާތަކެތި ވިއްކާ މީހުންނޯ އިނޑިއާ އައޓު ގޮވަނީ،
މިހާރު މި ކިއަނީ ގޭންގުތައް ބައިވެރި ވާ ވާހަކަ،
މީހަކު އަޅޭ ކޮހެއްނުވާނެތަ، ޕީޕީއެމްތެރެއިންނެއް އަދިވެސް ނުފެނެ އެ ބުނާ މަސްތުވުމަކާ ގޭންގުތަކެއް، ގޮތްހުސްވީމާ އެންމީހުންގެ އަބުރު ކަތިލާ އިއްޒަތާޝަރަފު ނަގާލަން ކިތަންމެ ވަރަކަށް އުޅުނަސް އެކަމެއް ނުވާނެ.