"އީމާގެ މުސާރަ ހޯދަން އާއިލާއިން އެދިފައެއް ނުވާނެ"
ހުޅުމާލޭގައި ދުއްވައިފައި ދިޔަ ސައިކަލަކުން ވެއްޓި ލިބުނު އަނިޔާތަކަށް ފަރުވާ ހޯދަމުންދަނިކޮށް މިމަހު ނިޔާވި، މާލޭ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރު އާމިނަތު އީމާންގެ މުސާރަ ހޯދަން އޭނާގެ އާއިލާއިން އެދިފައި ނުވާނެކަމަށް އާއިލާއިން މިއަދު ބުނެފިއެވެ.
ހިތާމަވެރި އެކްސިޑެންޓެއްގައި ލިބުނު ޒަހަމްތަކަށް ފަރުވާ ހޯދަމުން ދަނިކޮށް އީމާން ނިޔާވީ މި މަހުގެ 1ވަނަ ދުވަހު އޭޑީކޭ ހޮސްޕިޓަލުގައެވެ.
އީމާން ނިޔާވި ހިތާމަވެރި ހާދިސާއާ ގުޅިގެން މާލޭ ސިޓީ ކައުންސިލުން ފާސްކޮށް، ސަރުކާރަށް ހުށަހެޅީ މާލޭ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ މެމްބަރުންނަށް ލިބެމުންދާ 5،000 ރުފިޔާގެ އެލަވެންސް ފަސް އަހަރު ދުވަހުގެ ދައުރު ހަމަވަންދެން އީމާންގެ އާއިލާއަށް މެދުކެނޑުމެއް ނެތި ދިނުމަށެވެ.
އެ ނިންމުން ތަންފީޒުކޮށް ދިނުމަށް ފިނޭންސް މިނިސްޓްރީއާއި އެލްޖީއޭގައި ވެސް ސިޓީ ކައުންސިލުން އެދުނު ނަމަވެސް، މިކަމާ ގުޅިގެން އަދި މިހައިތަނަށް ޖަވާބެއް ލިބިފައި ނުވާކަމަށް ސިޓީ ކައުންސިލުން ހާމަ ކޮށްފައިވެއެވެ.
މިކަމާ ގުޅިގެން އީމާންގެ ބޭބެ އަޙްމަދު އައިމަން ފޭސްބުކް މެދުވެރިކޮށް މިއަދު ލިޔުނު ޕޯސްޓެއްގައި ބުނެފައިވަނީ، އީމާން ޑަބްލިޔުޑީސީގައި ކުރި ބުރަ މަސައްކަތަކީ ޤައުމީ މަސައްކަތެއް ކަމަށެވެ.
"ޑަބްލިޔުޑީސީގައި އީމާ ކޮށްފައިވާ ޕްލޭންތައް ފުރިހަމަ ކުރުމުގައި މިއާއިލާގެ ފުރިހަމަ އެއްބާރުލުން ސިޓީ ކައުންސިލަށާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީއަށް ކުރިއަށް އޮތްތާ ވެސް ލިބެމުން ދާނެ" އައިމަން ބުންޏެވެ.
މީގެ އިތުރުން އައިމަން ބުނީ އީމާންގެ މުސާރަ ހޯދަން އެ އާއިލާއިން އެދިފައި ނުވާނެ ކަމަށާއި އީމާން ކަށްވަޅުގެ ދާނުގައި ހަމަޖެހިގެން އޮތަދިނުމަށެވެ.
