ރައީސް ޞާލިޙާއި ނަޝީދު ވާދަ ޖަހަނީ މޯދީއަށް ވަފާތެރިވުމުގައި: ސައީދު

ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވާދަޖަހަނީ އިންޑިއާގެ ބޮޑުވަޒީރު ނަރެންދްރަ މޯދީއަށް ވަފާތެރިވުމުގެ ރޭހުގައި ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.

Ads by STELCO

މެންބަރު ސައީދު މިހެން ވިދާޅުވެފައި ވަނީ ރައީސް ނަޝީދު މިއަދު އިންޑިއާއަށް ކުރައްވާ ދަތުރުފުޅާ ގުޅިގެންނެވެ. ރައީސް ނަޝީދު އިންޑިއާއަށް ވަޑައިގެންނެވީ އިންޑިއާގެ ވެރިރަށް ނިއުދިއްލީގައި ބާއްވާ 7ވަނަ ރައިސީނާ ޑައިލޮގުގައި ބައިވެރިވެވަޑައިގަތުމަށް ކަމަށް ރައްޔިތުންގެ މަޖިލީހުގެ އިދާރާއިން ވިދާޅުވެއެވެ.

ރައީސް ނަޝީދުގެ އެ ދަތުރާ ގުޅިގެން މެންބަރު ސައީދު މިއަދު ވިދާޅުވީ ރައީސް ޞާލިޙާއި ނަޝީދު ވާދަޖަހަނީ މޯދީއަށް ވަފާތެރިވުމުގެ ރޭހުގައި ކަމަށާއި އާމްދަނީއާ ނުގުޅޭ ބޮޑެތި ލޯނުތަކުން ދަރަނިވެރިކޮށް ދިވެހިބިމުގެ މިލްކުވެރިކަން ހޯދުމާއި، ކަނޑާއި އަސްކަރީ ސިއްރު އެއްބަސްވުންތައް ހާމަކުރުމުގެ ފުރުސަތު ވަނީ ބަންދުކޮށްފައި ކަމަށެވެ.

"މިދެމީހުންގެ ފައިދާ BJPއިން ނަގަނީ ދިވެހިން އަގުކޮށްފައި! އާމްދަނީއާ ނުގުޅޭ ބޮޑެތި ލޯނުތަކުން ދަރަނިވެރިކޮށް ދިވެހިބިމުގެ މިލްކުވެރިކަން ހޯދުމާއި، ކަނޑާއި އަސްކަރީ ސިއްރު އެއްބަސްވުންތައް ހާމަކުރުމުގެ ފުރުސަތުވަނީ ބަންދުކޮށްފައި." ސައީދު ވިދާޅުވިއެވެ.

ރައީސް ނަޝީދު އިންޑިއާއަށް ކުރައްވާ މި ދަތުރުފުޅުގެ ތެރެއިން ރައިސީނާ ޑައިލޮގުގައި ބައިވެރިވެވަޑައިގަތުމުގެ އިތުރުން، އިންޑިއާގެ ޤާނޫނު ހަދާ މަޖިލީހުގެ ރައީސާއި، އިންޑިއާގެ އެކްސްޓާނަލް އެފެއާޒް މިނިސްޓަރުގެ އިތުރުން އެ ޤައުމުގެ އިސް އޮފިޝަލުންނާއި ބައްދަލުކުރެއްވުމަށް ވަނީ ހަމަޖެހިފައެވެ.