ރެކޯޑު އަދަދެއް، 215 މީހުން ކޮވިޑަށް ފައްސި ވެއްޖެ
މިއަދު އިތުރު 215 މީހަކު ކޮވިޑް-19 އަށް ފައްސިވެ، ބަލި ޖެހުނު މީހުންގެ އަދަދު 4000 އިން މައްޗަށް އަރައިފިއެވެ.
ހެލްތު ޕްރޮޓެކަޝަން އެޖެންސީ(އެޗްޕީއޭ) އިން ބުނީ މި 215 މީހުންގެ ތެރެއިން 214 ކޭސް ފެނިފައިވަނީ މާލެއިން ކަމަށާއި އަނެއް ކޭސް ފެނިފައިވަނީ އަތޮޅުތެރެއިން ކަމަށެވެ.
މިއަދު ފައްސިވި މީހުންގެ ތެރޭގައި ހިމެނެނީ 149 ދިވެހިންނާއި، ބަންގްލަދޭޝްގެ 54 މީހަކާއި، އިންޑިއާގެ ހަތް މީހަކާއި ސްރިލަންކާ ދެ މީހަކާއި ނޭޕާލް ދެ މީހެއްގެ އިތުރުން އިންޑޮނޭޝިއާ މީހެއް ކަމަށެވެ.
މިއީ މިހާތަނަށް 24 ގަޑިއިރުގެ ތެރޭގައި އެންމެ ގިނަ އަދަދެއްގެ މީހުން ފައްސިވި ދުވަހެވެ. މިއަދު ފައްސިވި މީހުންނާއެކު ރާއްޖޭގެ އަދަދު ވަނީ 4164 އަށް އަރާފައެވެ. މީގެތެރެއިން ފަރުވާ ދެމުން އަންނަނީ 1489 މީހުންނަށެވެ.
ރާއްޖެއިން ކޮވިޑް ޖެހިގެން މިހާތަނަށް ނިޔާވެފައި ވަނީ 18 މީހެކެވެ. އޭގެ ތެރޭގައި ހިމެނެނީ 12 ދިވެހީންނާއި، ހަ ބިދޭސީންނެވެ.
