ދަރިފުޅު ސަހަރާއަށް ދިޔައީ "ބައްޕި އަށް އެންމެ މީރު ޗޮކްލެޓު ހިފައިގެނެއް" ނޫން! އެއީ އިސްލާމީ ތަރުބިއްޔަތު ލިބިގެން ބޮޑުވާ ކުއްޖެއް: ސަނޫންގެ އަންހެނުން
މިމަހުގެ އެއް ވަނަ ދުވަހުގެ އިރާކޮޅު ވަގުތެއްގައި ދިވެހި ޒުވާން ޕައިލަޓެއް ނިޔާވި ޚަބަރު މުޅި ޤައުމުވެސް އަަޑުއެހީ ފުން ހިތާމައިގައެވެ.
ފްލައިމީގެ ޕައިލަޓެއް ކަމުގައިވާ ސ. ހިތަދޫ، ކޯޒްވޭ ވިލާ/ ސަނޫން ނަސީރު (35އ.) ހުޅުމާލޭގައި އޭނާ ދިރިއުޅޭ ގެ ކައިރިއަށް ވެއްޓިފައި އޮއްވާ އެރޭ 3:00 ޖަހާކަންހާއިރު ފެނިފައިވަނީ އޭނާގެ އަންހެނުންނަށެވެ. އަދި ހޮސްޕިޓަލަށް އޭނާ ގެންދިޔައިރު ވެސް ނިޔާވެފައިވާ ކަމަށް ހޮސްޕިޓަލާއި ހަވާލާދީ ފުލުހުން ވެސް ވިދާޅުވެފައިވެއެވެ. އަދި އާއިލާއިން ވާހަކަ ދެއްކި މީހަކު ބުނެފައިވާ ގޮތުގައި އޭނާ ނިޔާވީ ހާޓް އެޓޭކެއް ޖެހިގެންނެވެ.
ސަނޫން ނިޔާވުމުގެ ޚަބަރާއި ގުޅިގެން ބައެއް މީޑިއާ ތަކުން ޚަބަރު ފަތުރަމުން އައި ގޮތާއިމެދު އޭނާގެ އަނބިމީހާ ވަނީ ކަންބޮޑުވުންފާޅު ކޮށްފައެވެ.
އެގޮތުން ސަނޫންގެ 7 އަހަރުގެ "ދަރިފުޅު އެދުވަހު ސަހަރާއަށް ދިޔައީ ބައްޕިއަށް އެންމެ މީރު ޗޮކްލެޓު" ހިފައިގެން ކަމަށާއި "ބައްޕި އަށް އެންމެ މީރު ޗޮކްލެޓު ފާހަގަކުރި" ކަމަށް ބުނެވެސް ބައެއް މީޑިއާތަކުން ޚަބަރު ފަތުރާފައިވެއެވެ.
ްއެސުރުޙީ އާއި ގުޅިގެން އެކި މީހުންގެ ރަޙުމްކުޑަ ކޮމެންޓުތަކާއި ސަނޫންގެ އާއިލާއަށް، ޚާއްސަކޮށް އޭނާގެ އަނބިމީހާއަށް ވަނީ ކުރިމަތިލާން ޖެހިފައެވެ. ނިޔާވެފައި ތިބޭ މީހުންނަށް ޗޮކްލެޓު ނުކެވޭނެކަން 7 އަހަރު ކުއްޖަކަށް ނޭނގެނީތޯ އާއި، އިސްލާމީ ޢަޤީދާ ދަރިފުޅަށް ފުރިހަމައަށް ނޭނގޭ ނުވަތަ އުނގަންނައި ނުދޭ ކަމަށް ބުނެ ވެސް ވަނީ ތުހުމަތު ކޮށްފައެވެ.
އެފަދަ ތުހުމަތުތަކަށް ރައްދު ދެމުން ސަނޫން ގެ އަންހެނުން މިއަދު ބުނީ އޭނާގެ ދަރިފުޅު ސަހަރާއަށް އެދުވަހު ދިޔައީ "ބައްޕިއަށް އެންމެ މީރު ޗޮކްލެޓު ހިފައިގެނެއް ނޫން" ކަމަށާއި އެއީ "ސަހަރާއަށް ދަމުން ދަރިފުޅަށް އޭނަގެ ބޮޑުބޭބެއެއް ދިން ހަދިޔާއެއް" ކަމަށެވެ.
"އަހަރެން އަހަރެންގެ ދަރިފުޅަށް ދީފައި ހުންނާނީ އިސްލާމްދީނުގެ ތަރުބިޔަތު. އޭނާ އަކީ ހެޔު ވިސްނޭ ބަސްއަހާ ރަނގަޅު އިސްލާމީ ތަރުބިޔަތު ރަނގަޅަށް އުނގަންނައިދީގެން ބޮޑު ކުރާ ދަރިއެއް. މިފަދަ އާޓިކަލްތައް ލިޔެ މީހުން އެއަށް ކޮމެންޓު ކުރުމުގެ ކުރިން އަަހަރެން އޭނާއަށް ދީފައިވާ ތަރުބިއްޔަތަށް އެއްޗެހި ކިޔާއިރު އަހަރެން މި ތަހައްމަލްކުރާ ދަތި އުނދަގޫ ހިތްދަތިކަން އަމިއްލަ ނަފްސަށް ވިސްނާލަބަލަ!!! އަނެއްމީހާގެ އިހްސާސްތައް ވެސް ދެނެގަންނަން އެބަޖެހޭ" ސަނޫންގެ އަންހެނުން ބުނެފައިވެއެވެ.
ސަނޫންގެ އަނބިމީހާގެ އެވާހަކަތަކަށް އޭނަގެ ގާތް މީހަކު ވެސް ހެކިބަސް ދެއެވެ. އެގޮތުން އެމީހާ ފޭސްބުކްގައި ލިޔެފައިވާ ޕޯސްޓެއްގައި ބުނެފައިވަނީ ސަނޫންގެ ދަރިފުޅަކީ ވަރަށް ވެސް ހިތްވަރުގަދަ، ބަސްއަހާ، އެކުއްޖާގެ އުމުރާއި ބަލާފައި ވަރަށް ކެތްތެރިވެސް ކުއްޖެއް ކަމަށެވެ. ބައްޕަ ނިޔާވުމުގެ ހިތާމަވެރި ޚަބަރާއި ވެސް އެދަރިފުޅު ކުރިމަތިލީ ވަރަށް ހިތްވަރާއެކު ކަމަށާއި، ސަނޫން ނިޔާވުމުން އެވަގުތު ހިތާމަފާޅު ކުރަމުންދިޔަ އެހެން ކުޑަ ކުއްޖަކު މަސަލަސް ކުރެވޭތޯ ވެސް އުޅުނީ ހަމަ ސަނޫންގެ ދަރިފުޅުކަން ވެސް އެމީހާ ފާހަގަ ކޮށްފައިވެއެވެ.
މާތް ﷲ ސަނޫންގެ ފާފަތައް ފުއްސަވާ، ފުރާނައަށް ހެޔޮ ރަޙްމަތްލައްވާ ސުވަރުގޭގެ ދާއިމީ ނިޢުމަތް ދެއްވާށި. އާމީން. އަދި މިފަދަ ހިތްދަތި ވަގުތެއްގައި އޭނާގެ ދަރިފުޅަށާއި، އަނބިމީހާ އަދި އާއިލާއަށް ކެތްތެރިކަން ދެއްވާށި. އާމީން.
إِنَّا لِلّهِ وَإِنَّـا إِلَيْهِرَاجِعُون
