ނަހުލާގެ ވާހަކަތައް ޕީޕީއެމްއިން ދޮގުކޮށްފި
މާލޭ ސިޓީ ކައުންސިލްގައި ވިލިމާލެ ދާއިރާ ތަމްސީލު ކުރައްވާ މެންބަރު ނަޙުލާ ޢަލީ ޕީޕީއެމްއާއި އެ ޕާޓީގެ ލީޑަރޝިޕް ބަދުނާމުކޮށް ދައްކައިފައި ވަނީ ޙަޤީޤަތާ ޚިލާފު ދޮގު ވާހަކަތަކެއް ކަމަށް ޕީޕީއެމްއިން ވިދާޅުވެއްޖެއެވެ.
ނަހުލާ ރޭ އޭނާގެ ފޭސްބުކް ހޭންޑަލްގައި ކުރެއްވި ޕޯސްޓެއްގައި ވިދާޅުވީ، ރައީސް އަބްދުﷲ ޔާމީން އަލުން ވެރިކަމަށް ގެނައުމާ ދެކޮޅަށް މަސައްކަތް ކުރާ ބަޔަކު ޕީޕީއެމްގެ ތެރޭގައި އުޅޭ ކަމަށެވެ.
ޕީޕީއެމްއިން ވިދާޅުވީ، ނަހުލާ އެ ފަދަ ދޮގު މައުލޫމާތުތައް ފަތުރަމުންދަނީ ވިލިމާލޭ ދާއިރާ، މާލޭ ސިޓީ އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ ބައި-އިލެކްޝަންގައި އެ ޕާޓީގެ ޓިކެޓްގައި ވާދަކުރާ ކެނޑިޑޭޓަށް އެންޓި ކެމްޕެއިންކޮށް، އިދިކޮޅުން ވާދަ ކުރަމުން ގެންދާ ކެނޑިޑޭޓަށް ވޯޓު ހޯދުމުގެ މަސައްކަތްތަކެއް ކުރާކަމުގެ މަޢުލޫމާތު ހެއްކާ އެކު ލިބި، އެމައްސަލަ ސުލޫކީ މައްސަލައެއްގެ ގޮތުގައި، ޕާޓީގެ ސުލޫކީ ކޮމިޓީން ބަލަން ފެށުމުން ކަމުގައެވެ.
ނަހުލާ ޕީޕީއެމް ވަކިކޮށްފައިވާކަމުގެ ވާހަކަތަކެއް ރޭ ސޯޝަލް މީޑިއާގައި އާއްމުވިއެވެ. މި ވާހަކަތަކާ އެކު، މިކަން ޕީޕީއެމްއިން ދޮގުކުރިއެވެ.
ޕީޕީއެމްގެ ބަޔާނުގައި އިތުރަށް ވިދާޅުވީ، ރައީސް އަބްދުﷲ ޔާމީންގެ ނަންފުޅު ބޭނުންކޮށް، ދޮގު ވާހަކަތައް ދައްކައި، މެންބަރުންގެ މެދުގައި ނުތަނަވަސްކަން އުފައްދައި، ފިތުނަ އުފެދޭ ވާހަކަތައް ނަހްލާ ދައްކަވަމުން ގެންދަވާ ކަމަށެވެ.
"އަދި މިކަންކަން ކުރުމުގައި ނަޙުލާއަލީއާ އެކު އޭނާއަށް ވާގިވެރި ވުމުގައި، އޭނާގެ މަންމަ އާމިނަތު ލީލާއާއި ސުލޫކީ ކޮމިޓީއަށް މައްސަލައެއް ހުށަހެޅި އެ މައްސަލަ ބަލަން ފެށުމާ އެކު، ދޮގު ވާހަކަތަކެއް ދެއްކުމަށް ފަހު ޕާޓިން ވަކިވެފައިވާ އޭނާގެ ކޮއްކޮ މަރްޔަމް ނަފްޙާ ޢަލީ ވެސް ހިމެނޭ ވާހަކަ ދެންނެވީމެވެ. އެހެންކަމުން ނަހުލާ ޢަލީގެ އިތުރުން އާމިނަތު ލީލާގެ ވެސް ސުލޫކީ މައްސަލައެއް ޕާޓިން ގެންދަނީ ބަލަމުންނެވެ. ނަޙުލާ ޢަލީ އަދި އާމިނަތު ލީލާއާ ގުޅިގެން ސުލޫކީ ކޮމިޓީން ބަލަމުން ގެންދާ މައްސަލަ ކުރިއަށް ގެންދިއުމުގައި އެ ދެބޭފުޅުންގެ އެއްބާރުލުން ނުލިބޭކަން ވެސް މިފުރުޞަތުގައި ފާހަގަ ކުރަމެވެ." އެ ބަޔާނުގައި ވިދާޅުވިއެވެ.
Ads by STO
