ރައީސް ޔާމީން ނޫން ބޭފުޅަކު ވެރިކަމަށް ގެންނަން ޕީޕީއެމް ތެރޭން މަސައްކަތްކުރޭ: ނަހުލާ
އިދިކޮޅު ލީޑަރު ރައީސް ޔާމީން އަބްދުލްޤައްޔޫމް ނޫން ބޭފުޅަކު ވެރިކަމަށް ގެންނަން ޕާޓީގެ ތެރެއިން މަސައްކަތް ކުރަމުންދާ ކަމަށް ޕީޕީއެމްގެ މާލެ ސިޓީ ކައުންސިލުގެ ވިލިމާލެ ދާއިރާގެ ކައުންސިލަރު ނަހުލާ އަލީ ވިދާޅުވެއްޖެއެވެ.
ނަހުލާ މިހެން ވިދާޅުވެފައި ވަނީ، ޕީޕީއެމްއިން އެކަމަނާ ވަކިކޮށްފައިވާ ކަމަށް ބުނެ ދައުރު ކުރަމުން އަންނަ ވާހަކަތައް ދޮގު ކުރައްވައި ފޭސްބުކްގައި މިއަދު ކުރެއްވި ޕޯސްޓެއްގައެވެ.
"އަޅުގަނޑު ޤަބޫލުކުރާ ސިޔާސީ ލީޑަރަކީ ރައީސް ޔާމީން. ރައީސް ޔާމީން ނޫން އެހެން މީހަކު ވެރިކަމަށް ގެންނަން މަސައްކަތް ކުރާ ފަރާތްތަކުގެ ޕްރެޝާ ޕީޕީއެމް ތެރެއިން އަޅުގަނޑަށް ވަރަށް ބޮޑު،" ނަހުލާ ކުރެއްވި ޕޯސްޓްގައި ވިދާޅުވިއެވެ.
ނަހުލާ އިތުރަށް ވިދާޅުވީ، ވިލިމާލެ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިޔުޑީސީ)ގެ ބައި އިލެކްޝަނަށް ދާއިރާގެ ކައުންސިލަރުގެ ހައިސިއްޔަތުން އޭނާ ކެނޑިޑޭޓެއްގެ ނަން ޕާޓީއަށް ހުށަހެޅި ކަމަށާއި ނަމަވެސް އޭނާ ހުށަހެޅި ކެނޑިޑޭޓްގެ ނަން ނަގަން އަންގައި, އެ ނަން ނުނެގުމުން ކެނޑިޑޭޓް ލައްވައި ނަން ނަގުވައި ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު ބޭނުންވާ ކެނޑިޑޭޓަށް ޓިކެޓު ދީފައިވާ ކަމަށެވެ. ނަމަވެސް ނަހުލާ އަލީ ހުށަހެޅުއްވި ކެނޑިޑޭޓް ވަނީ ނަހުލާގެ އެ ވާހަކަތައް ދޮގުކޮށްފައެވެ.
"ވިލިމާލެ ޑަބްލިޔުޑީސީ ބައި-އިލެކްޝަންގައި ވާދަކުރާ ޕީޕީއެމް ކެނޑިޑޭޓްގެ ފޯމް އިލެކްޝަން ކޮމިޝަނަށް ވަނުމާ އެކު އެ ދުވަހުން ފެށިގެން ޕީޕީއެމް ކެނޑިޑޭޓަށް ކާމިޔާބު ނުވެއްޖެ ނަމަ އަޅުގަނޑު ޕާޓީން ވަކިކޮށްފައި ނޫނީ ހުއްޓައިނުލާނެ ކަމަށް ހުޅުމާލެ ދާއިރާގެ ކައުންސިލަރު އަންނަނީ ތަކުރާރުކޮށް އަޅުގަނޑަށް އިންޒާރުދީ ބިރު ދައްކަމުން," ނަހުލާގެ ފޭސްބުކް ޕޯސްޓްގައިވެއެވެ.
ނަހުލާގެ މި ވާހަކަތަކާ ގުޅިގެން، ޕީޕީއެމްއިން ވަނީ ބަޔާނެއް ނެރެފައެވެ. އެ ބަޔާނުގައި ނަހުލާގެ ވާހަކަތައް ދޮގުކޮށް ވިދާޅުވީ، އެފަދަ ވާހަކަ ދައްކަމުން ދަނީ އިދިކޮޅު ކެނޑިޑޭޓަކަށް ކެންޕެއިންކޮށް، އެ މައްސަލަ ޕީޕީއެމްއިން ބަލަމުންދާތީ ކަމަށެވެ. އަދި އެމްއެންޕީގެ ކެނޑިޑޭޓަށް ތާއީދު ހޯދުމަށް ކުރި މަސައްކަތުގެ ސާބިތު ހެކި ހުރިކަމަށް ވެސް ޕީޕީއެމްއިން ބުނެފައި ވެއެވެ.
މައުލޫމާތު ލިބިފައިވާ ގޮތުގައި ނަހުލާ އަލީއާއި އޭނާގެ ކޮއްކޮ ނަފްހާ އަލީ ވަނީ ފައިސާގެ އެހީ ، ސިޓީ އުރަތަކެއް ވެސް ބަހައިފައެވެ. އަދި އެމްއެންޕީގެ ކެނޑިޑޭޓަށް ވޯޓް ދިނުމަށް އެދި ވާހަކަ ދައްކައިފައި ވެއެވެ. އެ ފަދަ ވާހަކަތަކެއްގެ ވީޑިއޯއެއް ވެސް ހެކީގައި ހިމެނޭކަމަށް މައުލޫމާތު ލިބިފައި ވެއެވެ.
Ads by STO
