މާސްކު ނާޅައި ބޭރުގައި އުޅުނު 73 މީހަކު ޖޫރިމަނާ ކޮށްފި
މާސްކް ނާޅައި ބޭރުގައި އުޅުނު 73 މީހަކު މިހާތަނަށް ޖޫރިމަނާ ކޮށްފިއިވާ ކަމަށް ހެލްތު އެމެޖެންސީ އޮޕަރޭޝަން ސެންޓަރުން ހާމަކޮށްފިއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުމަނާނު ޑރ. ނަޒްލާ ރަފީޤް ވިދާޅުވީ މާސްކު ނާޅާ އުޅުނު 272 މީހަކަށް ފުލުހުން މިއަދު ނަސޭހަތް ދީފައިވާކަމަށާ، 52 މީހަކު ޖޫރިމަނާކޮށްފައިވާކަމަށެވެ. މިއާއެކު މާސްކު ނާޅައިގެން މިހާތަނަށް ޖުމްލަ 642 މީހަކަށް ނަސޭހަތްދީ، 73 މީހަކު ޖޫރިމަނާކޮށްފައި ވާކަމަށް ނަޒްލާ ވިދާޅުވިއެވެ.
ސަރުކާރުން ވަނީ މިމަހުގެ ފުރަތަމަ ދުވަހުން ފެށިގެން މާސްކު ނާޅައި ޢާންމު ތަންތަނުގައި އުޅޭ މީހުން 1000 ރުފިޔާއިން ޖޫރިމަނާކުރުމަށް ނިންމާފައެވެ.
މާލެ ސަރަހައްދުގައި މާސްކުއެޅުން މަޖްބޫރުކޮށްފައިވާއިރު އެކަމުން އިސްތިސްނާވަނީ ހަމައެކަނި ދެ އަހަރުން ދަށުގެ ކުޑަކުދިންނާއި ކަސްރަތުކުރަން ނުކުންނަ މީހުން ކަސްރަތުކުރާ ވަގުތުއެވެ. މީގެއިތުރުން އެހެން މީހެއްގެ އެހީގައި މާސްކު އަޅާ މީހުންވެސް މިއެންގުމުން އިސްތިސްނާވެއެވެ. އަދި ރެސްޓޯރެންޓު، ކެފޭ ފަދަ ކާބޯތަކެތީގެ ހިދުމަތްދޭ ތަންތަނުގައި ވެސް މާސް އެޅުން މަޖުބޫރެއް ނޫނެވެ.
