މަޖިލިސް ހުއްޓެނީ ރައީސް ނަޝީދާއި ސަރުކާރުގެ ދެބަސްވުމާ ހެދި: އިދިކޮޅު

މަޖިލީހުގައި ކުރާނެ މަސައްކަތެއް ނެތި ކޮންމެ ދުވަހެއްގެ ޖަލްސާ ކުރުކޮށްލަން ޖެހެނީ، މަޖިލީހުގެ ރައީސް، ރައީސް މުޙައްމަދު ނަޝީދާއި ސަރުކާރާ ދެމެދު އޮތް ދެބަސްވުންތަކާ ހެދި ކަމަށް އިދިކޮޅު ކޯލިޝަނުން ތުހުމަތު ކުރައްވައިފިއެވެ.

Ads by STELCO

މަޖިލީހުގެ މަސައްކަތް ކުރިޔަށް ނުދާތީ އެކަމާ ކަންބޮޑުވުން ފާޅުކޮށް، މިއަދ އިދިކޮޅު ކޯލިޝަންގެ ޕާލިމެންޓްރީ ގްރޫޕުން ވަނީ ނޫސްވެރިންގެ ބައްދަލުވުމެއް ބާއްވަވައިފައެވެ.

ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މާވަށު ދާއިރާގެ މެންބަރު މުޙައްމަދު ސައީދު ވިދާޅުވީ، މިއަދުގެ ސަރުކާރު އައީ ޤާނޫނު އަސާސީން ލިބިދޭ ޚިޔާލުފާޅު ކުރުމުގެ މިނިވަންކަން ދިފާއު ކުރައްވާނެ ކަމަށް ވިދާޅުވެ ވާހަކަ ދައްކަމުން ކަމަށެވެ. ނަމަވެސް މިއަދު ފެންނަމުންދަނީ ދިމާ އިދިކޮޅު ކަމަށް ވިދާޅުވިއެވެ.

"ރައީސް ޞާލިޙް ހިތްޕުޅާ ނުވާ ވާހަކައެއް ދައްކައިފި ކޮންމެ މީހަކު، ކޮންމެވެސް ކަހަލަ ބިރެއް ދައްކަމުން އެ މީހެއްގެ މުޅި އާއިލާ ބިރެއްގެ ތެރޭގައި ތިބެން ޖެހޭ މިންވަރަކަށް ޤައުމުގެ ކަންކަން ވައްޓައިލައިފި" ސައީދު ތުހުމަތު ކުރެއްވި ގޮތުގައި، މިއަދު މަޖިލިސް ހުއްޓުމަކަށް އައިސްފައި ވަނީ މަޖިލީހުގެ ރައީސްގެ އިތުބާރު ސަރުކާރަށް ނެތުމުން ކަމަށެވެ.

"އޭގެ އެއް މިސާލު މަޖިލިސްގެ ރައީސް. މަޖިލީހުގެ ރައީސް މިއަދު ސަރުކާރުގެ އިތުބާރު އެ މަނިކުފާނަށް ނެތުމަކީ މަޖިލިސް ހިނގަން ނުޖެހެނޭ ސަބަބަކަށް ވެގެން ނުވާނެ"

މިއަހަރުގެ ދައުރު ފެށުނު ފަހުން ބޭއްވި ތިން ޖަލްސާގައި ވެސް ކުރާނެ މަސައްކަތެއް ނެތިގެން މަޖިލިސް ވަނީ ހުއްޓައިލައިފައެވެ. ކޮންމެ ދުވަހެއްގެ ޖަލްސާގައި ވެސް ވަޒީރުން ގެނެސް ސުވާލު ކުރުމަށް ފަހު މަޖިލިސް ކުރުކޮށްލައެވެ.

މިކަމާ ގުޅޭ ގޮތުން ވާހަކަފުޅު ދައްކަވަމުން ޕީއެންސީގެ ޕީޖީ ލީޑަރު އާދަމް ޝަރީފް އުމަރު ވިދާޅުވީ، ސަރުކާރުން މަޖިލިސް ހިންގުމަށް ފުރުސަތު ނުދެއްވާ ކަމަށާއި ކޮންމެ ބޭފުޅަކު މަޖިލީހުގެ ރައީސަކަށް އިންނެވި ކަމުގައި ވިޔަސް ދައުލަތް ހިންގުމުގެ އެއް ބާރުގެ މަސައްކަތް ހުއްޓުވަން މަސައްކަތް ނުކުރެވޭނެ ކަމަށެވެ.

"އެމްޑީޕީގެ އިންތިޚާބަށް ފަހުގައި ރައީސަށް ޖެހިލުންވެވަޑައިގަތުމަކީ އެކަށީގެންވާ ކަމެއް މަޖިލިސް ރައީސްގެ އިތުބާރު ނެތް ކަމުގެ ވޯޓެއް ނަގާ ބޭރުކޮށްފާނެ ކަމަށް. އަޅުގަނޑަށް ޤަބޫލު ކުރެވެނީ އެ ހުރިހައި ކަމަކަށް ރިއާޔަތް ކޮށްގެން ކަމަށް މަސައްކަތް ކުރިޔަށް ގެންދަވާނީ." ސަރުކާރުގެ ތެރެއިން މަޖިލީހަށް ފޯރުވާ ނުފޫޒު ކަމަށް ތުހުމަތު ކުރައްވަމުން އާދަމް ޝަރީފް ވިދާޅުވިއެވެ.