ދަތިކަމެއްނެތި ބޭހާއި ކާޑާއި ތެޔޮ ގަނެވޭ ވަރަށް ފައިސާ އެބަހުރި: ރައީސް ޞާލިޙް
ރާއްޖެއަށް މަހުން މަހަށް ބޭނުންވާ ބޭހާއި ކާޑާއި ތެޔޮ ދަތިކަމެއް ނެތި ގަނެވޭ ވަރަށް ދައުލަތުގައި ފައިސާ އެބަހުރި ކަމަށް ރައީސް އިބްރާހިމް މުހައްމަދު ޞާލިޙް މިއަދު ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ރައީސް ސޯލިހު ވިދާޅުވީ ދުނިޔޭގައި ތަކެތީގެ އަގު މައްޗަށް ދިޔަ ކަމުގައިވިޔަސް، އަސާސީ ބޭނުންތަކަށް ބޭނުންވާ ތަކެތި ހޯދޭނެ މަގު ފަހިކޮށްދެއްވާނެ ކަމަށެވެ.
"މިއަދު އަޅުގަނޑު ތިބޭފުޅުންނަށް ޔަގީންކޮށް މި އަރުވަނީ ކާޑުގެ ބާވަތްތަކާއި ތެލާއި ބޭސް ދަތިނުވެ, ރާއްޖެއަށް މަހުން މަހަށް ގަނެވޭ ވަރަށް ފައިސާ ހުންނާނެ ކަމަށް. އެއީ ޖޫން މަސް ކަމަށް ވިޔަސް, ޖުލައި މަސް ކަމަށް ވިޔަސް, އޮގަސްޓް, ސެޕްޓެމްބަރު, އޮކްޓޯބަރު, ނޮވެމްބަރު, ޑިސެމްބަރު މަސް ކަމަށް ވިޔަސް އެ ފައިސާ ހުންނާނެ،" އެމަނިކުފާނު ވިދާޅުވިއެވެ.
ރައީސް ޞާލިޙް މިހެން ވިދާޅުވެފައި ވަނީ، އަސާސީ ބޭނުންތަކަށް ވާ ވަރަށް ދައުލަތުގެ ރިޒާވްގައި ފައިސާ ހުރިތޯ ބެލުމަށް ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ވަނީ އިއްޔެ މަޖިލީހަށް ހުށަހަޅުއްވައިފައި ވަނިކޮށެވެ. އޭނާ އެ ގޮތަށް ހުށަހެޅުއްވި އިރު، ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ ދައުލަތުގެ ދަރަނި ބޮޑުވުމުގެ ކަންބޮޑުވުން ފާޅުކުރައްވައި އަންނަ ޖުލައި މަހު ދައުލަތުގެ ރިޒާވް ނުރައްކާ ވާ ވަރަށް ދަށްވެދާނެ ކަމުގެ އިންޒާރު ދެއްވައިފައެވެ.
ރައީސް ޞާލިޙް ވިދާޅުވީ މިހައިތަނަށް ޔޫސަބަލް ރިޒާވް އެންމެ ގިނައިން ހުރި އެއް އަހަރަށް މިއަހަރު ވާނެ ކަމަށާއި އަދި ދައުލަތަށް މި ބޭނުންވާ އަސާސީ ތަކެތި ގަތުމަށް ޓަކައި އެސްޓީއޯއަށް ފައިސާ ހޯދައިދީފައިވާނެ ކަމަށެވެ.
"ދައުލަތަށް މި ބޭނުންވާ މި ދެންނެވި އަސާސީ ތަކެތި ގަތުމަށް ޓަކައި އެސްޓީއޯއިން އަޅުގަނޑުމެން މި ގެންނަނީ. އެސްޓީއޯއަށް ދަތިނުވެ, އެ އިމްޕޯޓު ކުރުމަށް ޓަކައި އެސްޓީއޯއަށް ބޭނުންވާ ފައިނޭންޝަލް ފެސިލިޓީ ހޯދައިދޭން އައިޓީއެފްސީން 175 މިލިއަން ޑޮލަރުގެ ފެސިލިޓީއެއް އަޅުގަނޑުމެން މިހާރު ވާނީ ހޯދައިފައި. އެހެންވީމާ ދަތި ނުވެ, އެސްޓީއޯއަށް ތެލާއި ކާޑާއި ބޭހުގެ ބާވަތްތައް އިތުރުކުރެވިގެންދާނެ ކަމުގެ ޔަގީންކަން އަރުވަން،" އެ މަނިކުފާނު ވިދާޅުވިއެވެ.
