ވިނަރެސް ފްލެޓްގެ މަހު ކުއްޔަކަށް ރައީސް ޔާމީން ނިންމެވީ 7،000 ރުފިޔާ: މުޢިއްޒު
"ވިނަރެސް" ހައުސިންގ ޔުނިޓްގައި ހިމެނޭ ފްލެޓްތަކުގެ ކުއްޔެއްގެ ގޮތުގައި ރައީސް ޔާމީން އަބްދުލްޤައްޔޫމް ނިންމަވައިފައި ވަނީ 7،000 ރުފިޔާ ކަމަށް މާލޭ ސިޓީ މޭޔަރު ޑރ. މުޙައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވެފަ އިވަނީ، ވިނަރެސް ފްލެޓްތަކުގެ ކުލި ބޮޑުވެގެން، އެކަމުގެ ޝަކުވާ ކުރަމުން އަންނަ ދަނޑިވަޅެއްގައެވެ. ރަސްމީކޮށް ފްލެޓްގެ ކުލި އަދި އިއުލާންކޮށްފައި ނުވި ނަމަވެސް، މަހު ކުއްޔެއްގެ ގޮތުގައި ވިނަރެސް ފްލެޓުން ނެގުމަށް ހަމަޖެހިފައި ވަނީ 17،000 ރުފިޔާ ކަމަށް ބެލެވެއެވެ.
މިއަދު މުއިއްޒު ކުރެއްވި ޓްވީޓެއްގައި ވިދާޅުވީ، މި ސަރުކާރުން ކުރި ކަމަކީ، ރައީސް ޔާމީންގެ ވެރިކަމުގައި އިމާރާތް ކުރަން ފެށި ފްލެޓްތަކަށް "ވިނަރެސް"ގެ ނަމުން ނަންދީ ފްލެޓްގެ އަދަދު މަދުކޮށް ބޮޑު އަގުގައި ދިނުން ކަމަށެވެ. އަދި އެކަމާ ކަންބޮޑުވުން ފާޅުކުރެއްވިއެވެ.
ރައީސް ޔާމީން ސަރުކާރުގައި ފެއްޓި 1530 ޔުނިޓުގެ ހައުސިންގ މަޝްރޫޢު، މި ސަރުކާރުން 1340އަށް މަދުކޮށް، "ވިނަރެސް"ގެ ނަންދީ، އަތް ނުފޯރާހާ އަގުބޮޑުކޮށް ވިއްކަމުންދާ ދިޔުން ބަދަލުކުރެއްވުން އެދެން. ރައީސް ޔާމީންގެ ސަރުކާރުގައި މި ފްލެޓްތައް ދިނުމަށް ނިންމައިފައި ވަނީ މަހަކު 7000 ރުފިޔާއަށް.
މުޢިއްޒު ކުރެއްވި ޓްވީޓްގައި ވިދާޅުވިއެވެ.
ވިނަރެސް މަޝްރޫޢުގެ ދަށުން ފްލެޓްތައް ތަރައްޤީކޮށްފައިވަ ނީ 4 ކޮންސެޕްޓަކަށެވެ. އެއީ އިނާ ވިއު، އައުޓާ ވިއު، މެރީނާ ވިއު އަދި ސްޓޭންޑާޑް ވިއު އެޕާޓްމެންޓްތަކެވެ. މެރީނާ ވިއު ފްލެޓްތަކުގައި ހިމެނެނީ 172 އެޕާޓްމަންޓެވެ. އައުޓާ ވިއުގައި 372 އެޕާޓްމެންޓް ހިމެނެއެވެ. އިނާ ވިއުގައި ހިމެނެނީ 352 އެޕާޓްމަންޓެވެ. އަދި ސްޓޭންޑާޑް ވިއުގައި 448 އެޕާޓްމެންޓް ހިމެނެއެވެ.
