ބޮމުގެ ހަމަލާ: ރިޔާސަތު ބަލަހައްޓަވާ ގާޒީ އާދަމް މުހައްމަދު ތަނާޒުލްވެއްޖެ
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް މިދިޔަ އަހަރުގެ މެއި މަހުގެ ހަވަނަ ދުވަހުގެ ރޭ ދިން ބޮމުގެ ހަމަލާއާ ގުޅިގެން ދައުލަތުން ދައުވާ އުފުލައިފައިވާ މީހުންގެ މައްސަލަތައް ބައްލަވަމުން ގެންދަވާ ކްރިމިނަލް ކޯޓުގެ ފަނޑިޔާރުންގެ ބެންޗުގެ ރިޔާސަތު ބަލަހައްޓަވަމުން ގެންދަވާ ގާޒީ އާދަމް މުހައްމަދު އެ މައްސަލަތަކުން ތަނާޒުލް ވެއްޖެއެވެ.
ކްރިމިނަލް ކޯޓުގައި މިމައްސަލަ ބައްލަވަމުން ގެންދަވަނީ ތިން ގާޒީންގެ ބެންޗަކުންނެވެ. އެ ބެންޗުގެ ރިޔާސަތު ގާޒީ އާދަމް މުހައްމަދު ބަލަހައްޓަވާއިރު ބެންޗުގައި ދެން ހިމެނެނީ ގާޒީ ސޮފްވަތު ޙަބީބާއި، ގާޒީ މުހައްމަދު މިސްބާހުއެވެ.
ނަޝީދު އަވަހާރަކޮށްލަން މިދިޔަ އަހަރުގޭ މޭ ހަވަނަ ދުވަހުގެ ރޭ ދިން ބޮމުގެ ހަމަލާއާ ގުޅިގެން ދައުލަތުން ދައުވާކުރަނީ މއ. ފޭރުގޭ މުޖާޒް އަހުމަދާއި ގއ. ކޮނޑޭ ފޮޅޭމާ ތަހުމީން އަހުމަދާއި ނ. މަނަދޫ ނޫރީގޭ އަލީ ހައިޝަމާއި ގއ. ވިލިނގިލީ ހުދުރުވާގޭ ފަހުމީ އަލީގެ އިތުރުން މ، ކުދެހިގޭ އިސްހާގާއި އއ. މާޅޮހު، އަސަރީގޭ މުހައްމަދު ނާޒިމްގެ މައްޗަށެވެ.
ގާޒީ އާދަމް މުހައްމަދު މި މައްސަލައިން ތަނާޒުލުވާން ނިންމެވީ ބޮމުގެ ހަމަލާއާ ގުޅިގެން ދައުލަތުން ދައުވާކުރާ މ. ކުދެހިގެ އިސްހާގުގެ ފަރާތުން ފޮނުވި ސިޓީއަކާ ގުޅިގެންނެވެ. މީގެ ފަސް އަހަރު ކުރިން އަނިޔާވެރިކޮށް ވަޅިން ހަމަލާދީ ބްލޮގަރު ޔާމީން ރަޝީދު މަރައިލި މައްސަލައިގައި ޔާމީނަށް ފާރަލައި އޭނާ މަރައިލުމުގައި ބައިވެރިވުމުގެ ދައުވާ މ.ކުދެހިގެ ހަސަން ޝިފާޒްގެ މައްޗަށް ކުރިއެވެ. ނަމަވެސް، އޭނާގެ މައްޗަށް ކުށް ސާބިތެއް ނުވެއެވެ.
އިސްހާގުގެ ސިޓީގައި ބުނެފައިވާ ގޮތުގައި ޝިފާޒަކީ އިސްހާގުގެ ދަރީގެ ބޮޑުބޭބެއެވެ. އަދި ބްލޮގަރު ޔާމީންގެ މަރުގެ މައްސަލައިގައި އިސްހާގުގެ ދަރިއަކު ވަނީ ގާޒީ އާދަމް މުހައްމަދަށާއި އޭނާގެ އަނބިކަނބަލުންނަށް ބިރުދައްކައި މަރުގެ އިންޒާރު ދީފައެވެ. އެހެންކަމުން ގާޒީ އާދަމް މުހައްމަދު މި މައްސަލައިން ތަނާޒުލުވުމަށް އިސްހާގުގެ ސިޓީގައި އެދިފައިވެއެވެ.
މިކަމާ ގުޅިގެން ގާޒީ އާދަމް މުހައްމަދު ވަނީ މިމައްސަލައިން ތަނާޒުލުވެފައެވެ.
