ރާނީގެ ޖަނާޒާގައި ބައިވެރިވެވަޑައިގަތުމަށްފަހު ރައީސްގެ ދެކަނބަލުން ރާއްޖެ ވަޑައިގެންފި
ރައީސް އިބްރާހީމް މުޙައްމަދު ޞާލިޙާއި, އެ މަނިކުފާނުގެ އަނބިކަނބަލުން ފަޒްނާ އަޙްމަދު އިނގިރޭސިވިލާތަށް ކުރެއްވި ރަސްމީ ދަތުރުފުޅު ނިންމަވާލައްވައި މިއަދު ރާއްޖެ ވަޑައިގެންފިއެވެ.
ރައީސްގެ ދެ ކަނބަލުންގެ މި މަހުގެ 17 ވަނަ ދުވަހު އިނގިރޭސި ވިލާތަށް ވަޑައިގަތީ ރާނީ އެލިޒަބަތު 2 ވަނަގެ ޖަނާޒާގައި ބައިވެރިވެވަޑައިގެންނެވުމަށެވެ.
ރާނީ އެލިޒަބަތު 2 ވަނަ އަވަހާރަވީ މި މަހުގެ 8 ވަނަ ދުވަހުގައެވެ. އޭނާގެ ޖަނާޒާ ބޭއްވީ މި މަހުގެ 19 ވަނަ ދުވަހުގައި ލަންޑަންގެ ވެސްޓްމިންސްޓަރ އެބީގައެވެ.
މީގެ އިތުރުން ރައީސްގެ ދެކަނބަލުން ވަނީ ރާނީ އަވަހާރަވުމާއި ގުޅިގެން ލަންޑަނުގެ ލެންކަސްޓަރ ހައުސްގައި ހުޅުވާފައިވާ ތަޢުޒިޔާގެ ދަފްތަރުގައި ތަޢުޒިޔާގެ މެސެޖު ވެސް ލިޔުއްވާފައެވެ.
ރާނީ އަވަހާރަވުމުގެ ހިތާމައިގައި ބައިވެރިވުމުގެ ގޮތުން މި މަހުގެ 9 އިން ފެށިގެން 3 ދުވަސް ވަންދެން ދިވެހި ޤައުމީ ދިދަ ވެސް ބައިދަނޑިއަށް ވަނީ ތިރިކޮށްފައެވެ.
Ads by STO
