ސަރުކާރުން ގެންނަމުން މިދަނީ މީގެކުރިން ނުގެނެވޭފަދަ ބޮޑު އަދި ވަށާޖެހޭ ތަރައްޤީއެއް: އަމީރު

ސަރުކާރުން ގެންނަމުން މިދަނީ މީގެ ކުރިން ނުގެނެވޭފަދަ ބޮޑު އަދި ވަށާޖެހޭ ތަރައްޤީއެއް ކަމަށާއި, އެ ގޮތުން ހަނިމާދޫ އިންޓަނޭޝަނަލް އެއާޕޯޓު ތަރައްޤީގެ ބޮޑު މަޝްރޫއަކީ މުޅި ރާއްޖޭގެ އިޤްތިސާދަށް އިންޤިލާބީ ބަދަލެއް ގެންނާނެ މަޝްރޫއެއްކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.

Ads by MWSC

އަމީރު މިއަދު ވިދާޅުވީ ހަނިމާދޫ އެއާޕޯޓު ތަރައްޤީގެ ބޮޑު މަޝްރޫއަކީ ބޮޑު ތިލަދުންމަތީގެ އިތުރުން, މުޅި ރާއްޖޭގެ އިޤްތިސާދަށް އިންޤިލާބީ ބަދަލެއް ގެންނާނެ މަޝްރޫއެއް ކަމަށެވެ. އަދި މިއީ މާލެއިން ބޭރު ސަރަހައްދެއްގައި ރާއްޖޭގެ ތާރީޚުގައި ވެސް ކުރެވޭ އެންމެ ބޮޑު އެއް އިންވެސްޓްމެންޓުކަމަށް އޭނާ ވިދާޅުވިއެވެ.

މީގެއިތުރުން އަމީރު ވިދާޅުވީ ދުނިޔޭގެ އިޤުތިސާދަށް ކުރިމަތިވަމުން އަންނަ ގޮންޖެހުންތަކާއެކު ވެސް, މި ސަރުކާރުން ރާއްޖޭގެ އެކި ރަށްތަކުގައި, އެކި ދާއިރާތަކުން ތަރައްޤީ ގެންނަމުންދާ ކަމަށެވެ. އަދި އެއީ މީގެ ކުރިން ގެނެވިފައިނުވާވަރުގެ ބޮޑު އަދި ވަށާޖެހޭ ތަރައްޤީއެއްކަމަށް އޭނާ ސިފަކުރެއްވިއެވެ.

''ފެންނަން ހުރި ހަޤީޤަތަކީ, ދުނިޔޭގެ އިޤްތިސާދަށް ކުރިމަތިވަމުން އަންނަ ގޮންޖެހުންތަކާއެކު ވެސް, މި ސަރުކާރުން ރާއްޖޭގެ އެކި ރަށްތަކުގައ އެކި ދާއިރާތަކުން ގެންނަމުންދާ ތަރައްޤީއަކީ, މީގެ ކުރީގެ އެއްވެސް އަހަރުތަކަކަށް ވުރެ ބޮޑު އަދި ވަށާޖެހޭ ތަރައްޤީއެއް.''

އިންޑިއާގެ އެގްޒިމް ބޭންކުން ރާއްޖެއަށް ދީފައިވާ 800 މިލިއަން ޑޮލަރުގެ ކްރެޑިޓް ލައިންގެ ދަށުން ހިންގަން ހަމަޖެހިފައިވާ ހަނިމާދޫ އިންޓަނޭޝަނަލް އެއާޕޯޓް ތަރައްޤީކުރުމުގެ މަޝްރޫޢުގައި މާދަމާ ރޭ ސޮއިކުރާނެކަމަށް އިކޮނޮމިކް މިނިސްޓްރީން ވަނީ ބުނެފައެވެ. މަޝްރޫޢުގެ އެއްބަސްވުމުގައި ސޮއިކުރުމަށް ހަމަޖެހިފައިވަނީ މާދަމާ ރޭ 21:00 ގައި މީރުމާ އިވެންޓު ހޯލުގައި ބާއްވާ ރަސްމިއްޔާތެއްގައެވެ.

136.6 މިލިއަން ޑޮލަރަށް އިންޑިއާގެ ޖޭއެމްސީ ޕްރޮޖެކްޓްސްއާ ހަވާލުކޮށްފައިވާ މި މަޝްރޫޢުގެ ދަށުން ހަނިމާދޫ އެއާޕޯޓުގައި 2.46 ކިލޯ މީޓަރުގެ އާ ރަންވޭއަކާއި, އަހަރަކު 1.3 މިލިއަން ފަސިންޖަރުންނަށް ޚިދުމަތްދެވޭ ފެންވަރުގެ ޒަމާނީ އާ ޓާމިނަލެއް ހަދާނެއެވެ. އޭގެ އިތުރުން ބައިނަލްއަގުވާމީ ދަތުރުތައް ފުޅާކުރަން އިތުރު ވަސީލަތްތައް ގާއިމުކުރަން ހަމަޖެހިފައިވެއެވެ.

ސަރުކާރުން ބުނާ ގޮތުން މި އަހަރު ފަހުކޮޅު އެ މަޝްރޫޢުގެ އަމަލީ މަސައްކަތް ފެށޭނެއެވެ. އަދި 2024 ގައި އެ މަޝްރޫޢު ނިމި ޚިދުމަތްދޭން ފެށޭނެކަމަށް ސަރުކާރުން ބުނެފައިވެއެވެ.