ބިދޭސީއަކު ކޮންޓެއިނަރެއްގައި ބަންދުކޮށްގެން ގެންގުޅުނު ކަމަށް ބުނާ މައްސަލައެއް
ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕު (ބީޔޫސީޖީ)ގެ މުވައްޒަފަކު ހަފުތާއެއް ވަންދެން ކޮންޓެއިނަރެއްގެ ތެރޭގައި ގެންގުޅުނު ކަމަށް ބުނާ މައްސަލައެއް ފެންމަތިވެއްޖެއެވެ.
ޕަބްލިކް އިންޓްރެސްޓް ލޯ ސެންޓާ (ޕީއައިއެލްސީ)އިން މިއަދު ނެރުނު ބަޔާނެއްގައި ބުނެފައިވަނީ ކޮންޓެއިނަރެއްގައި ބަންދުކޮށްފައި ވަނީ އުމުރުން 23 އަހަރުގެ ޗައިނާ މީހެއް ކަމަށެވެ. އޭނާއާ އެތާ އުޅޭ އެހެން ޗައިނާ އަންހެނަކާ ދެމެދު ހިނގައިދިޔަ ހަމަނުޖެހުމެއްގައި ކޮންޓެއިނަރު ތެރޭގައި ބަންދު ކުރީ ކަމަށް ޕީއައިއެލްސީން ހާމަކުރެއެވެ.
އޭގައި ބަންދުކުރުމަށްފަހު ވަޒީފާ އިން ވަކިވާން ބޭނުންވާކަން ބަޔާންކޮށް ނޯޓިސްއެއްގައި ސޮއިކުރަން މަޖުބޫރުކުރުވި ކަމަށާއި ކޮންޓެއިނަރު ތެރޭގައި ކުޑަ އެނދަކާއި ފާހާނާ ކުރަން އެއްޗެއް ބަހައްޓާފައި ހުރި ކަމަށް ބުނެފައިވެއެވެ.
ޕީއައިއެލްސީން ބުނީ އޭނާ ފިލީ ކޮންޓެއިނަރުގައި ހުރި ކުޑަދޮރެއް ކަހަލަ އެއްޗެއް ހަލާކުކޮށްލައިގެން ކަމަށާއި އެތަނުން ސަލާމަތްވުމާ އެކު އޭނާ އެންމެ ފުރަތަމަ ވެސް ދިޔައީ ހުޅުމާލޭ ޕޮލިސް ސްޓޭޝަނަށް ކަމަށެވެ.
ހުޅުމާލޭ ފުލުހަށް ދިޔަ ނަމަވެސް މައްސަލަ ބެލުމަށް ދެކޮޅުހެދުމުން އޭނާ ދެން މައްސަލަ ހުށަހެޅީ ހުޅުލޭ ޕޮލިސް ސްޓޭޝަނަށް ކަމަށާއި އެތަނުގެ ފުލުހުން ބަންދުކުރި ތަނަށް ގޮސް މައުލޫމާތު ނެގި ކަމަށް ޕީއައިއެލްސީން ބުންޏެވެ.
ޕީއައިއެލްސީން ބުނީ، މި މައްސަލަ ހިއުމަން ރައިޓްސް ކޮމިޝަން (އެޗްއާރްސީއެމް)އަށް ވެސް ހުށަހެޅި ކަމަށާއި އެ ކޮމިޝަނުން ވެސް އޭނާއަށް ރައްކާތެރިކަން ފޯރުކޮށްދީފައިނުވާ ކަމަށެވެ.
މީގެ އިތުރުން ޕީއައިއެލްސީން ބުނީ އެ މީހާއަކީ ގެއްލިފައިވާ މީހެއް ކަމަށް ބީޔޫސީޖީން ވަނީ ކަމާ ބެހޭ މުއައްސަސާތަކަށް އަންގާފައި ކަމަށެވެ.
