ބޮޑުތަކުރުފާނު ރާއްޖެ ސަލާމަތް ކުރައްވަން ނިކުމެވަޑައިގަތްއިރަށްވުރެ މިއަދުގެ ހާލަތު މާ ގޯސް: އަދުރޭ
ބޮޑުތަކުރުފާނު ރާއްޖެ ސަލާމަތް ކުރައްވަން ނިކުމެވަޑައިގަތްއިރަށްވުރެ މިއަދުގެ ހާލަތު މާ ގޯސް ކަމަށާއި, ބޮޑުތަކުރުފާނު އޭރު އަދާކުރެއްވި މަސްއޫލިއްޔަތު މިއަދު އަދާކުރައްވަމުން ގެންދަވަނީ ރައީސް ޢަބްދުﷲ ޔާމީން ޢަބްދުލްޤައްޔޫމްކަމަށް ޕްރޮގްރެސިވް ކޮންގްރެސް ކޯލިޝަނުގައި ހިމެނޭ ޕީއެންސީގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.
ތުރާކުނުގައި މިއަދު އޮތް ޖަލްސާގައި ވާހަކަދައްކަވަމުން އަދުރޭ ވަނީ މި ޤައުމު މި އޮތީ އަޅުވެތިވެފައި ކަމަށާއި, އެންމެން ގުޅިގެން މަސައްކަތްކޮށްފިނަމަ މި އަޅުވެތިކަމުން ސަލާމަތްވާނެ ކަމަށެވެ.
''މި ހާލަތުން ރާއްޖެ ސަލާމަތްކުރެއްވުމަށް ނުވަތަ ބޮޑުތަކުރުފާނު އޭރު އަދާކުރެއްވި ވާޖިބު ނުވަތަ އެ އަދާކުރެއްވި މަސްއޫލިއްޔަތު މިއަދު އަދާކުރައްވަމުން ގެންދަވަނީ ރައީސް ޢަބްދުﷲ ޔާމީން ޢަބްދުލްޤައްޔޫމް. އެހެންވީމަ އެ މަނިކުފާނާއެކީ ތިޔަބޭފުޅުން ސާބިތުވެވަޑައިގެން ތިއްބަވާށޭ. އިރާދަކުރެއްވިއްޔާ އަޅުގަނޑުމެންގެ މި ޤައުމު ސަލާމަތްކުރުމުގެ ހިތްވަރު މާތްﷲ ދިވެހި ރައްޔިތުންނަށް ދެއްވާނެ.''
އަދުރޭ ވިދާޅުވީ ޕީޕީއެމް/ޕީއެންސީން ކުރަމުންދަނީ ޙައްޤު މަގުގައި ކުރާ މަސައްކަތް ކަމަށެވެ.
''މީ އިސްލާމްދީން މަތިވެރިކުރުމަށް ޢިއްޒަތްތެރިކުރުމަށް ކުރާ މަސައްކަތް. އަޅުގަނޑުމެންގެ މިނިވަންކަން ނަގަހައްޓާ ދެމެހެއްޓުމަށް ކުރާ މަސައްކަތް. ދިވެހިންގެ ލާބަޔާއި މަންފާއާއި ރައްޔިތުންގެ ތަރައްޤީއާއި ކުރިއެރުމަށް ކުރާ މަސައްކަތް.''
އަދުރޭ ވިދާޅުވީ އިޚްލާސްތެރިކަމާއެކީ މަސައްކަތްކުރާނަމަ އެ ބަޔަކާއެކީ މަތިވެރި އިލާހުގެ މަދަދުވާނެކަމީ ޝައްކެއް އޮތް ކަމެއް ނޫން ކަމަށެވެ.
ވަރަށް ރަގަޅުވާހަކައެއް ދައުލަތުގެ އަޑީގައި ތިބީ އެމްޑީއެން ލާދީނީ މީހުން އެބައިގަޑު ގުޅިފައިވަނީވެސް ބޭރުގެ އެޖެންޓުންނާއި !