އައިޖީއެމްއެޗްގެ ހިޔަލަ ވިންގުގެ ބައެއް ޚިދުމަތްތައް ދަރުމަވަންތަ ހޮސްޕިޓަލަށް ބަދަލުކޮށްފި
އިންދިރާ ގާނދީ މެމޯރިއަލް ހޮސްޕިޓަލް، އައި.ޖީ.އެމް.އެޗްގެ މާބަނޑުމީހުންނާ ތުއްތު ކުދިންނަށް ޚާއްސަ އިމާރާތް، ހިޔަލަ ވިންގުން ދެމުންދާ ބައެއް ޚިދުމަތްތައް ވަގުތީގޮތުން ދަރުމަވަންތަ ހޮސްޕިޓަލަށް ބަދަލުކޮށްފިއެވެ.
އައިޖީއެމްއެޗުން ނެރުނު ބަޔާނެއްގައި ބުނެފައިވަނީ ހިޔަލަ ވިންގުގައި ބަލިމީހުން އަރާ ފޭބުމަށް ބޭނުންކުރާ ލިފްޓަކަށް ދިމާވި ޓެކްނިކަލް މައްސަލައަކާގުޅިގެން ހިޔަލަ ވިންގުން ދެމުންދާ ބައެއް ޚިދުމަތްތައް ދަރުމަވަންތަ ހޮސްޕިޓަލަށް ބަދަލުކޮށްފައިވާ ކަމަށެވެ.
އެ އިމާރާތުން ދެމުންދާ ބައެއް ޚިދުމަތްތައް ބަދަލުކޮށްފައިވަނީ ދަރުމަވަންތައިގެ 12، 16 އަދި 17 ވަނަ ފަންގިފިލާއަށެވެ.
މިގެނެވުނު ބަދަލާއެކު ހިޔަލަ ވިންގުގެ 2 ވަނަ ފަންގިފިލާއިން ދެމުންދާ އިމަރޖެންސީ ޚިދުމަތްތައް ހޮސްޕިޓަލުގެ ޓްރޯމާ އެންޑް އިމަރޖެންސީ ޑިޕާޓްމަންޓުގެ (އަވަސްފަރުވާގެ ޚިދުމަތްދޭ ތަން) އައިސޮލޭޝަން އޭރިއާއަށް ވަގުތީ ވަނީ ބަދަލުކޮށްފައެވެ.
އަދި ހިޔަލަ ވިންގުގެ އެހެން ފަންގިފިލާތަކުގައި އެޑްމިޓްކުރެވޭ ބަލިމީހުން ދެން އެޑްމިޓްކުރާނީ ދަރުވަމަންތަ ހޮސްޕިޓަލުގެ 12، 16 އަދި 17 ވަނަ ފަންގިފިލާގައެވެ.
ހިޔަލަ ވިންގުގެ ފުރަތަމަ ފަންގިފިލާއިން މިހާރު ދެމުންދާ އޯޕީޑީގެ ޚިދުމަތްތަކަށް ބަދަލެއް ނައިސް މިހާރެކޭ އެއްފަދައިން ހިޔަލަ ވިންގުން ލިބޭނެކަމަށް އައި.ޖީ.އެމް.އެޗްއިން ވިދާޅުވެއެވެ. އަދި ހިޔަލަ ވިންގުގެ 10 ވަނަ ފަންގިފިލާއިން ދެމުންދާ އިންޓެންސިވް ކެއަރ، އެން.އައި.ސީ.ޔޫގެ ޚިދުމަތްތައްވެސް ބަދަލެއް ނައިސް މިހާރެކޭ އެއްފަދައިން ހިޔަލަ ވިންގުން ލިބޭނެކަމަށްވެސް އެ ހޮސްޕިޓަލުން ވިދާޅުވެއެވެ.
Ads by STO
